Məlum olduğu kimi, terrorçu Robert Köçəryanın sağ əli sayılan Samvel Karapetyan Xankəndinin mərkəzində 4 gəncə odlu silahdan atəş açıb. Yayılan məlumata görə, məlum olayla bağlı cinayət işi başlanıb.
Xatırlatmaq yerinə düşər ki, Samvel Karapetyan erməni cəmiyyətində cani və Robertin cəlladlarından biri kimi tanınır. Məşhur 2008-ci il mart hadisələri zamanı Karapetyan özünün birbaşa rəhbərliyi ilə 20 nəfərlik qrupu həmin vaxt Prezident iqamətgahının zirzəmisində gizlətmiş, 1 mart mitinqləri zamanı məhz həmin dəstənin üzvləri müxalifətin, o cümlədən Ter-Petrosyan və Paşinyanın tərəfdarlarına atəş açmışdı.
Görünən odur ki, atəş açmaqda və terrorda xüsusi təcrübələri olan Robert Köçəryan, Samvel Karapetyan, Serj Sarkisyan bəzi xarici dairələrdən uzun müddətdən sonra aldıqları xeyir-dua ilə Nikol Paşinyana qarşı genişmiqyaslı təzyiqə start veriblər. Belə çıxır ki, İrəvanda, Gümrüdə, Üçkilsədə və s. regionlarda davam etməkdə olan aksiyalar Xankəndiyə də təsirsiz ötüşməyəcək.
Bu kontekstdə, yaxın vaxtlarda revanşist qüvvələrin, məqsədlərinə çatmayacaqları təqdirdə, Qarabağdakı ermənilər arasında da bölgü aparacaqları istisna deyil. Bəzi iddialara görə, Robert yaxın ətrafı vasitəsilə Arutunyandan mövqe nümayiş etdirməyi tələb edib. Samvel Karapetyan tərəfindən açılan atəş separatçılar arasında da vəziyyətin yaxşı olmadığından, Ermənistandakı siyasi mübarizənin yaxın vaxtlarda Xankəndidə daha ciddi şəkildə hiss ediləcəyindən xəbər verir.
Belə fiqurların Qarabağda təxribatlar törətməsinin qarşısını almaq üçün dövlətimiz və Ordumuz yetərincə imkanlara malikdir. Odur ki, zərurət yarandığı anda Azərbaycan Ordusu Qarabağda revanşistlər tərəfindən tərədilə biləcək cinayətlərin və təxribatların qarşısını almaq üçün proseslərə birbaşa müdaxilə edə bilərmi?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bizim təcrübəmiz və indiyə qədər gördüklərimiz bunun ümumi sülh prosesinə qarşı təxribat olduğunu deməyə əsas verir: “ Ermənistan münaqişənin mövcud olduğu illər ərzində danışıqlarda bir balaca irəliləyiş olan kimi hər zaman təxribatlar törədirdi. Hazırda da biz belə prosesə şahidlik edirik. Etiraf etməliyik ki, Ermənistandakı hadisələr sülh prosesinə ziyan vura bilər. Ermənilər əmin olmalıdırlar ki, Paşinyanın mövcud vəziyyət fonunda üzərinə götürdüyü öhdəliklərə əməl etməməsi və ya yeni gələcək hakimiyyətin öhdəliklərdən yayınması yeni müharibəni labüd edəcək. Hazırda müəyyən dövlətlər və müxalifət Paşinyanı devirmək üçün “uyğun” vaxt seçiblər. 1998-ci ildə olduğu kimi, bu dəfə də Azərbaycan və Ermənistan arasında ciddi danışıqların getdiyi bir vaxtda Robert Köçəryan keçmiş təcrübəsini ikinci dəfə reallaşdırmaq və legitim hakimiyyəti kürsüdən qovmaq iddiasına düşüb. Sadəcə, indi Ter-Petrosyanın yerində Paşinyandır. Radikal müxalifətin arxasında isə elə həmin xarici dairələrdi. Həmin vaxt Ermənistan parlamenti gülləbaran edildi və dövlətin aparıcı simaları öldürüldü. Onda da Ermənistan hakimiyyəti konstruktivlik nümayiş etdirmək istəyirdi. Ermənilər indi də bu gərginliyi Qarabağda yaradırlar. Ancaq bilməlidirlər ki, Qarabağ Azərbaycanın ərazisidir və biz ölkəmizin hüdudları daxilindəki bütün təhlükəsizliyə cavabdehik. Artıq Qarabağda yaşayan ermənilər də deyir ki, separatçı rejimdən beziblər. Azərbaycanın Xankəndidə asayişi bərpa etməyə həm təcrübəsi, həm də yetərincə hərbi gücü var. Bu baxımdan da, biz istənilən vaxt öz ərazi subyektimizə aid olan Xankəndidə antiterror əməliyyatı keçirə bilərik”.
Məhəmmədəli QƏRİBLİ
