Bir neçə gün əvvəl qondarma Abxaziya rejiminin “prezidenti” Aslan Bjaniya bəyanat yayaraq bildirirdi ki, Abxaziya “Donetsk və Luqansk Xalq Respublikaları”na dəstək verməyə hazırdır. “Abxaziya, lazım gələrsə, DXR və LXR-ə hərbi və humanitar yardım göstərməyə hazırdır”. Separatçı lider açıq bəyan edirdi ki, Liqanska və Donetskə kömək etməyə hazırdırlar.
Abxaziya separatçıları qondarma “Donetsk və Luqansk Xalq Respublikaları”nın qayğısına qaldığını açıqlamaqdan çəkinmir. Maraqlıdır, Rusiya prezidenti Vladimir Putin Rusiyanın “Donesk Xalq Respublikasının” və “Luqansk Xalq Respublikasının” “müstəqiliyini” tanıması ilə bağlı fərman imzaladıqdan dərhal sonra Putinin bu addımına dəstək verənlərdən biri məhz qondarma Abxaziya rejiminin lideri oldu.
“Putinin qurduğu teatr tamaşasında hər kəs öz rolunu oynayır...”
İSBAM sədri, siyasi şərhçi Samir Adıgözəlli bizimlə söhbətində hazırda Ukraynada olduğunu və Putinin məlum addımından sonra ermənilərin aktivləşdiyini bildirdi. S.Adıgözəllinin sözlərinə görə, separatçı yuvalarından biri olan Abxaziyanın “prezidentinin” bu cür bəyanat verməsi onu göstərir ki, hadisələr əvvəlcədən qurulub və proseslər Putinin dirijor çubuğu ilə idarə olunub. “Bir neçə gün əvvəldən başlayaraq Putinin dirijor çubuğu işə düşdü və qondarma, separatçı Abxaziyanın qondarma “prezidenti” DXR və LXR dəstəyini ifadə etdi. Separatçı Aslan Bjaniya dəstək “bəyanatını” özbaşına verməyib ki, onu Putin danışdırıb. Bu, Putinin qurduğu bir tamaşadır və bu tamaşanı da çox yaxşı idarə edir. Yəni Putinin qurduğu teatr tamaşasında hər kəs öz rolunu oynayır, heç kəs cızığından çıxa bilmir. Təbii ki, söhbət separatçılardan gedir. Gürcüstanın ayrılmaz tərkib hissəsi olan Abxaziya separatçı qurumu da Rusiyanın yaratdığı bir oyuncaq rejimdir. Abxaziya separatçılarının başçısı Kremlin ağızına baxıb danışır. Bu adam DXR və LXR-ə dəstəyini ifadə etmişdi, Putinin məlum bədnam fərmanından sonra isə onların “müstəqilliyini” tanıdğını bəyan edib. Kreml, Putin nə deyir separatçılar da onu edir. Görünən odur ki, Rusiya 2008-ci ildə Abxaziyanın və Cənubi Osetiyanın “müstəqilliyini” tanıyıb dünyaya meydan oxudu. Rusiyanın separatizmi dəstəkləməsi onun imperiya maraqlarından irəli gəlir. Rusiya bölgədə öz maraqlarının qorunması naminə nə desən edir. Necə ki, öz maraqlarını təmin etmək üçün müstəqil dövlətlər olan Ukrayna, Gürcüstan və başqa dövlətlərin milli təhlükəsizliyinə təhdid yaradır, xələl gətir. Öz maraqları naminə müstəqil dövlət olan Ukraynanın ərazi bütövlüynə qəsd etdiyini açıq şəkildə göstərdi. Putin dünən sözügedən fərmanı imzalamaqla öz imperialist maraqlarını ifadə etdi. Söz yox ki, qondarma DXR və LXR separatçı rejimləri indi eyforiya içindədir. Putinin fərmanı separatçıları “ruhlandırsa” da, onlara heç bir xeyri yoxdur. Rusiyadan başqa dünyaya çıxışı olmayan, dünyada tanınmayan separatçı qurumlar heç də sevinməsinlər. Onları Rusiya qəbul etsə də, dünya birliyi qəbul etmir. Odur ki, Abxaziya separatçılarının başçısı da, DXR və LXR qondarma rejimləri də Rusiyadan o yana gedə bilməyəcəklər. Ola bilsin, Rusiyanın maraqlarına xidmət edən bəzi ölkələr onların “müstəqiliyini” tanısın. Necə ki, dünən iki-üç ölkə belə bəyanat verdi və Putinin fərmanını dəstəklədi və sair” - deyə S.Adıgözəlli qeyd etdi.
İradə SARIYEVA
