“Arsax yaralanıb, amma sınmayıb. Bizim addımlarımız Arsax ermənilərinin hüquqlarını qorumaq və onların beynəlxalq səviyyədə tanınmasına yönəlib”. Bu cəfəng fikirləri Ermənistanın baş naziri Nikol Paşinyan “Arsaxın” “Dirçəlişi günü” münasibətilə xalqa müraciətində deyib.
Siyasi ekspert Rövşən Rəsulov bizimlə söhbətində bildirdi ki, ermənilər 1988-ci ildə daha da alovlandırdıqları separatizm hərəkatını yanlış olaraq “azadlıq hərəkatı” adlandırırlar, əslində isə bu, böyük faciələrə yol açan erməni separatizmin tam çılpaqlığı ilə ortaya çıxması idi. 34 il əvvəl Qarabağda separatçıların törətdiyi hərəkətlərin ziyanını ermənilər özləri daha çox çəkir. Onun qeyd etdiyinə görə, Paşinyanın bu cür ziyanlı açıqlama verməsi onu göstərir ki, Ermənistan Azərbaycanla sülh sazişi imzalamağa hazır deyil. “Bildiyimiz kimi, bu günlərdə Qarabağ separatçıları separatçılığın ayaq açdığının “34-cü ildönümünü” qeyd eidrlər. Həmin tarix eyni zamanda bizim Qarabağımızın sonrakı illərdə işğalı ilə nəticələndi. Təbii, 44 günlük müharibədə Qarabağın işğaldan azad olunması, yalnız kiçik anklavların Rusiya sülhməramlılarının müvəqqəti olaraq nəzarəti altında qalması belə deməyə əsas verir ki, separatçılığın toxumunun bir hissəsi kəsilib. Sadəcə, həmin anklavlarda qalan kiçik bir hissə öz sərsəm iddialarını səsləndirir. Lakin digər tərəfdən, Ermənistanın baş naziri Nikol Paşinyanın “Arsax hərəkatının” başlanmasının “34 illiyi” ilə bağlı müraciət etməsi bilavasitə qarşıda dayanan sülh danışıqları prosesinin əngəllənməsinə səbəb olmaqdadır. Təsəvvürünüzə gətirin, Ermənistan Azərbaycanla delimitasiyası və demarkasiyası ilə bağlı fikirlər səsləndirir, eyni zamanda Azərbaycan da həmin fiklirləri səsləndirir. Bir tərəfdən Ermənistan Zəngəzur dəhlizinin açıqlması ilə bağlı öz mənfi və ya müsbət fikirlərini, ideyalarını səsləndirir, lakin digər tərəfdən də, Ermənistanın baş naziri Nikol Paşinyan Qarabağdakı separatçılara separatçılıqlarının başlanmasının 34-cü ili ilə bağlı məktub göndərir. Paşinyanın bu fikirləri açıq şəkildə separatizmin dəstəklənməsidir və sülhə böyük zərbədir. Paşinyan bununla Ermənistan Respublikasının rəsmi olaraq separatçı rejimi dəstəklədiyini bəyan edir”.
R.Rəsulovun fikrincə, bunun qarşısının alınması üçün Azərbaycan müvafiq tədbirlər görür, bundan sonra da görəcək. Rusiya sülhməramlılarının orada olması o demək deyil ki, yerdə qalan anklavda erməni separatçıları istədikləri hərəkətlərini, işğalçılıq və separatçılıq meyillərini davam etdirsinlər, səngərlər qazsınlar, istehkamlar, dayaq nöqtələri qursunlar. “Yəni bunlar heç biri əsas vermir ki, separatçılar bundan sonra öz təxribatçı əməllərini davam etdirsinlər. Bu o anlamı vermir. Bu o anlamı verir ki, əslində onlar bu kimi davranışları ilə ömürlərinin başa çatdığını, siyasi sonluqlarını anlayırlar. Separatçılığın son akkordları vurulur. Bu baxımdan, Paşinyanın fikirləri üzərində daha çox dayanmaq lazımdır. Yəni Azərbaycan Xarici İşlər Nazirliyi artıq bununla bağlı rəsmi bəyanatını verib, bunun qarşıda dayanan sülh prosesinə əngəllər yaratdığını deyib. Təbii ki, Ermənistan belə davam edəcəksə və separatçıların da sərsəm bəyanatları səslənəcəksə bunun qarşısı bir yolla alına bilər, yalnız antiterror əməliyyatı ilə. Məhz bu əməliyatların nəticəsində separatçıların kökü Qarabağdan tamamilə kəsilməli olacaq. Təbii ki, Paşinyan da bu iddiasına görə cavab verməli olacaq” - deyə R.Rəsulov bildirdi.
İradə SARIYEVA
