Müdafiə Nazirliyinin maliyyə sektorunda həbslər davam edir. Tutulanlar nazirliyin Maliyyə İdarəsinin rəisi Rafael Xəlilov, N saylı hərbi hissənin maliyyə şöbəsinin rəisi Fəzail Əliyev, Quru Qoşunlarının maliyyə idarəsinin rəisi Bayram Bayramov, maliyyə idarəsinin zabiti Vüsal Ədalət oğlu Əlizadə və Hərbi Hava Qüvvələrinin maliyyə xidmətinin sabiq rəisi, polkovnik Cəlal Kazımovdir.
Cəlal Kazımov son həbs edilənlərdəndi. Onların hər biri barəsində 4 aylıq həbs qətimkan tədbiri seçilib. İlkin olaraq həbs edilən 4 şəxsə Cinayət Məcəlləsinin 179.4-cü - xüsusilə külli miqdarda mənimsəmə maddəsi ilə ittiham verilib.
Müdafiə Nazirliyinin daha bir yüksək vəzifəli şəxsi həbs edilib. Yayılan ən son məlumata görə, Müdafiə Nazirliyinin Satınalmalar və Təchizat İdarəsinin rəisi, polkovnik Qurbanov Məlikməmməd Oruc oğlu da saxlanılıb. O, Hərbi Prokurorluğun Ağır Cinayətlərə dair İstintaq İdarəsi tərəfindən cinayət məsuliyyətinə cəlb edilib.
Polkovnik M.Qurbanov dövlətə 3,5 milyon manat maddi ziyan vurmaqda ittiham edilir.
Hazırda istintaq tərəfindən onun barəsində həbs qətimkan tədbiri seçilməsi üçün təqdimat verilib. Sual olunur: MN-də baş verən bu tip maliyyə maxinasiyalarına kim rəhbərlik edib? Ola bilməz ki, hakim mövqeyə sahib olan şəxslər bu cür yeyintiləri görə bilməsin.
Silahlı Qüvvələrin Baş Qərargahının sabiq rəisi, ehtiyatda olan general Nəcməddin Sadıqovun Bakıda qəza törətməsi olayında maraqlı bir detal ortaya çıxdı. Sadıqovun idarə etdiyi Az 90 AS 020 nömrəli “Toyota Land Cruiser” markalı avtomobillə “Toyota Prius” markalı avtomobilin toqquşmasından sonra bəlli olub ki, sabiq rəisin maşını zirehlidir.
Maraqlıdır, belə zirehli avtomobillər neçəyidir? Ondan başlayaq ki, Nəcməddin Sadıqov zirehli maşını hansı pulla alıb. O da var ki, vəzifədə olduğu dönəmdə adı büdcə vəsaitlərinin külli miqdarda mənimsənilməsi olaylarında təkrar-təkrar hallanıb. Onun yüz belə avtomobil almaq imkanına sahib olması da təəccüblü olmamalıdır. Ordudakı zirehli döyüş maşınlarının pullarının hara getdiyini bilmək üçün Nəcməddin Sadıqovun sürdüyü maşının dəyərinə diqqət etmək kifayətdir. Zirehli maşınların bazar qiyməti 200 min dollardan başlayır və 2-3 milyon dollara qədər ola bilir. Bir sıra hərbi ekspertlər qeyd edir ki, Nəcməddin Sadıqov Müdafiə Nazirliyinin Baş Qərargah rəisi postunu tutduğu dönəmlərdə büdcədən müdafiə xərcləri üçün ayrılan vəsaitlərin 10 faizi ona çatıb. Təsəvvür edin ki, Müdafiə Nazirliyinə ayrılan 200 milyonun 10 faizi Nəcməddinə çatıb. 300 milyon ayrılıb, yenə də 10 faizi onun cibinə gedib. Hər dəfə 20-30 milyona sahiblənib. Pullar təyinatı üzrə xərclənmədən, işlər başlanmazdan öncə Nəcməddin Sadıqova çatdırılıbsa, onun da bu yöndə məsuliyyətə cəlb edilməsi baş tuta bilərmi?
Hüquqşünas Mehman Muradlı qəzetimizə bildirdi ki, MN-in maliyyə qurumlarında baş verənlər maraqlı faktları üzə çıxarır:
“Müdafiə Nazirliyinin maliyyə işlərinə baxan dörd idarəsinin, bir şöbəsinin rəisləri 15 milyon manatlıq mənimsəmədə ittiham olunaraq həbs olunub. Bu məbləğ istintaq zamanı 15-20 dəfə, bəlkə də daha çox arta bilər. Hər gün yeni həbslərin şahidi oluruq. İstintaqın gedişində bütün şəbəkə açıla bilər. Çünki adətən belə işlərlə bağlı tam əhatə dairəsi istintaq zamanı müəyyənləşir. Söhbət xırda məbləğlərdən getmir. Təbiidir ki, milyonlarla manat vəsaiti rəhbər şəxslərin məlumatı olmadan mənimsəmək mümkün deyil. Mən hüquqşünas olduğum üçün daha çox ehtimallara deyil, konkret faktlara söykənərək danışmağa üstünlük verirəm. Proseslərin gedişi göstərir ki, həbslərin əhatə dairəsi daha yuxarılara qədər gedib çata bilər. Nəcməddin Sadıqov həmin sistemdə çox böyük təsir gücünə malik adam olub”.
Məhəmmədəli QƏRİBLİ
