Ermənistanın xarici işlər naziri Ararat Mirzoyan Münhendə Səudiyyə Ərəbistanının xarici işlər naziri Feysəl bin Fərhan Al Səud ilə görüşüb.
Tərəflər Ermənistan və Səudiyyə Ərəbistanı arasında münasibətlər, əməkdaşlığın qurulması perspektivləri barədə fikir mübadiləsi aparıb. O cümlədən, iki ölkə arasında ikitərəfli və çoxtərəfli gündəliyin formalaşdırılması üzərində işləməyə hazır olduqlarını bildiriblər. Ararat Mirzoyan informasiya və yüksək texnologiyalar, səhiyyə, turizm və mədəniyyət sahələrində əməkdaşlığın inkişafı üçün müvafiq potensialın olduğuna əminliyini ifadə edib. Xarici işlər nazirləri görüş zamanı iki ölkə arasında ticarət-iqtisadi əlaqələrin intensivləşdirilməsinin, investisiya proqramlarının həyata keçirilməsinin və işgüzar dairələr arasında əlaqələrin qurulmasının vacibliyini vurğulayıblar.
Ermənistan İslam irsinə, abidələrinə divan tutan bir ölkədir. Azərbaycanın əraziləri 30 ilə yaxın işğal altında qalan dövrlərdə dəfələrlə bu sübut olunub. Müsəlmanlar üçün müqəddəs sayılan məscidlər dağıdılmaqla yanaşı, məscidlərdə donuz saxlayıblar. Dəfələrlə Azərbsaycan bəyan edib ki, İslam abidələrini dağıdan, məscidlərə donuz bağlayan Ermənistandan müsəlman ölkələrə dost olmaz. O zaman Ermənistanla bu əməkdaşlıq, yaxınlaşma nə deməkdir?
“Ər-Riyad Türkiyənin məlum savaşda Azərbaycanın yanında olmasına cavab olaraq bunu edib”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov hesab edir ki, ərəb ölkələrinin Ermənistanla yaxınlaşma kursu götürməsi qəbuledilməzdir: “Səudiyyə Ərəbistanının rəsmən Ermənistanla diplomatik münasibətləri yoxdur. Ermənistanın Azərbaycana məxsus torpaqları işğal etməsindən sonra rəsmi Ər-Riyad Ermənistanın təcavüzünü qətiyyətlə pisləyib. 1994-cü ildən sonra onunla bütün münasibətləri, o cümlədən diplomatik münasibətləri kəsib. Səudiyyə Azərbaycanın ərazi bütövlüyünü tanıyır və Daglıq Qarabağ probleminin ölkəmizin ərazi bütövlüyünü çərçivəsində həllinin tərəfdarı olduğunu dəfələrlə bəyan edib. Lakin 2018-ci ildə Səudiyyədə axırıncı şahzadə Məhəmməd ibn Səlmanın iqtidara gəlməsi ilə bu ölkənin Ermənistanla münasibətlərində bir mülayimləşmə müşahidə olunur. Bunun səbəbi Türkiyənin regionda, o cümlədən ərəb dünyasında getdikcə artmaqda olan nüfuz və təsiri ilə əlaqədardır. Səudiyyə şahzadəsi Məhəmməd ibn Səlman Ərdoğanı eksponsionist siyasətin həyata keçirilməsində ittiham edir. Onun "Yeni Osmanlı" geopolitik layihəsinin ərəb birliyi və dünyası üçün təhdid olduğunu bildirir. Ərdoganı Osmanlını reanimasiya çəhdlərində ittiham edən Səudiyyə vəliəhdi ərəb liderlərini ona qarşı birləşməyə, müqavimət göstərməyə çağırır. Türkiyənin Ermənistanla olan münasibətlərində məlum problemlərə görə Səudiyyə Ermənistana müttəfiq kimi yanaşmağa başlayib. Hətta 2018-ci ildə şahzadə "erməni genosidi" ilə bağlı məsələnin ABŞ Konqresində müzakirəyə çıxarılması üçün Ermənistana dəstək olacağını bildirib. 2020-ci ildə Azərbaycanın Ermənistanla məlum 44 günlük savaşı müddətində isə Səudiyyə tərəfi hətta Ermənistana gizli dəstək də verib. Türkiyənin məlum savaşda Azərbaycanın yanında olmasına cavab olaraq bunu edib. Azərbaycanı İranla qarşıdurmada öz yanında görmək məqsədilə Səudiyyə hələlik rəsmi Bakını incik sala biləcək hərəkətlərə yol vermək istəmir. Bütovlükdə isə Səudiyyənin bu və ya digər dövlətlərlə münasibətləri necə və nə cur qurması onun daxili işidir. Əsas olanı bu münasibətlərdə beynəlxalq hüquq normalarının gözlənilməsidir. Ancaq reallıq odur ki, Ermənistan müsəlman irsini dağıtmaq siyasəti yeridib. Bu ilin əvvəlində Ermənistanın artıq sabiq prezidenti Armen Sarkisyanın Ər-Riyadda yüksək səviyyədə qəbulu və bu ölkə ilə bir sıra sahələrdə əməkdaşlıq barədə əldə edilmiş razılıqlar, habelə ayrılmış kreditlər də göstərir ki, Səudiyyənin Ermənistanla normal münasibətlərə gedəcəyi istisna deyil”.
Bir sözlə, politoloq hesab edir ki, Ermənistanla yaxın əlaqələrin qurulmasının kökündə Səudiyyə Ərəbistanı-Türkiyə münasibətlərinin soyuqlaşmasının özünəməxsus rolu var.
Vidadi ORDAHALLI
