Münhendə Ermənistan xarici işlər naziri Ararat Mirzoyan Almaniya Federativ Respublikasının xarici işlər naziri Tobias Lindner ilə görüşüb.
Nazirlər iki ölkə arasında ikitərəfli və çoxtərəfli formatda səmərəli əməkdaşlığa dair fikir mübadiləsi aparıblar. A.Mirzoyan Ermənistan və Almaniya arasında tarixi bağlara, ümumi dəyərlərə və qarşılıqlı maraqlara əsaslanan dostluq münasibətlərinin müsbət dinamikasını məmnunluqla qeyd edib. Tərəflər regional və beynəlxalq gündəlikdəki bir sıra aktual məsələlər ətrafında fikir mübadiləsi aparıblar. Nazir Mirzoyan Ermənistan-Azərbaycan sərhədində yerləşən Dağlıq Qarabağdakı vəziyyəti təqdim edib. Dağlıq Qarabağ münaqişəsinin ATƏT-in Minsk Qrupu həmsədrlərinin mandatı altında hərtərəfli və davamlı həllinin zəruriliyi vurğulanıb.
Təəssüf doğuran məqam odur ki, Almaniya da həmsədrlərin yenidən fəaliyyətə başlaması mövqeyindən çıxış edir. Bundan əvvəl Böyük Britaniyanın Ermənistandakı səfiri analoji mövqedən çıxış etmişdi. Qeyd etmişdi ki, Qarabağ münaqişəsi həll olunmayıb və məsələ ATƏT-in Minsk Qrupu çərçivəsində tənzimlənməlidir. Görünən odur ki, Almaniya da bu baxımdan səhv mövqedən çıxış edir. Bütün bunlar isə Ermənistanın mənafeyinə xidmət edir.
“Azərbaycan müharibə zamanı ərazilərini azad edəndə Fransadan sonra narahat olan ölkələrdən biri də Almaniya idi”
Məsələyə münasibət bildirən AMİP funksioneri Əli Orucovun fikrincə, Avropanın böyük və aparıcı dövlətlərinin Qarabağ məsələsi ilə bağlı belə yanlış mövqedən çıxış etməsi narahatlıq doğurur: “Bunlar sanki bilərəkdən Minsk Qrupunun özünü doğrultmadığı faktını qəbul etmək istəmir. Almaniya həmsədr olmasa da ATƏT-in Minsk Qrupunun üzvüdür. Ancaq müharibəyə qədər rəsmi Berlin Qarabağ məsələsinin həlli ilə bağlı təşəbbüslə çıxış etməyib. Halbuki, onlar da görürdülər ki, Ermənistan Azərbaycanın ərazilərini işğal etməklə yanaşı, danışıqları uzadır. Bunun nəticəsində yüzminlərlə məcburi köçkün yurd-yuvasına qayıda bilmir. İki dəfə dünya müharibələrinin aktiv iştirakçısı olan, böyük dağıntılara məruz qalan Almaniya, əfsuslar olsun ki, Ermənistana hansısa təzyiq göstərmədi. Viran qoyulan yaşayış məntəqələrinə görə bir dəfə də olsun hansısa qınaqla çıxış etmədi. Bənzər dağıntıları Azərbaycan törətsəydi, o zaman bizi linc edərdilər. Azərbaycan 44 günlük müharibə zamanı ərazilərini azad edəndə Fransadan sonra narahat olan ölkələrdən biri də Almaniya idi. O zaman bu ölkənin mediası Azərbaycana qarşı həqiqətə uyğun olmayan məlumatlar yayırdı. Digər tərəfdən, Almaniyanın o vaxtkı xarici işlər naziri Azərbaycanı atəşkəsdə maraqlı olmamaqda ittiham etdi. Görünən odur ki, Almaniyada hakimiyyət dəyişsə də Ermənistana olan isti münasibət dəyişmir. Bunun nəticəsidir ki, rəsmi Berlin Minsk Qrupunun yenidən fəallaşmasını istəyir”.
Partiya funksioneri, istənilən halda, bunun qəbuledilməz olduğunu qeyd etdi.
Vidadi ORDAHALLI
