Rusiya Qarabağdakı erməniləri nə olursa-olsun həm əlində saxlamağa çalışır, həm də siyasi məqsədləri üçün istifadə etməkdədir. Musavat.com xəbər verir ki, Qarabağdan olan ermənilərə Rusiya pasportları paylanması daha qabarıq şəkil almaqdadır. Erməni mənbələrinin yaydığı statistik məlumatlar prosesin ciddiliyindən xəbər verir.
2021-ci ildə 46 min 900-dən çox erməni Rusiya vətəndaşlığını qəbul edib. Bu, son illərin ən rekord göstəricisi hesab olunur. 2020-ci ildə 30 min 558, 2019-da 24 min 24, 2018-də 27 min 134, 2017-də 25 min 144 nəfər erməni Rusiya vətəndaşlığı alıb. Ümumilikdə, 2017-2021-ci illərdə 153 min 800 erməni Rusiya pasportuna malik olub. Ermənistanın daimi əhalisinə nisbətdə bu, təxminən 5,2 faiz təşkil edir.
Aydındır ki, "rus pasportu" alan 153 min 800 erməninin hər biri Qarabağda yaşamır. Bu rəqəmin 10 faizi qədər erməninin Qarabağda yerləşməsi isə Rusiyaya məkrli planlarını gerçəkləşdirməyə imkan verir. Nəzərə alaq ki, artıq Rusiya Qarabağda yerləşən erməni əhalisi içərisində "rus icması" yaratmağa start verib və bu "icmaya" rəhbər də tapıb. Bu şəxs Rusiya Federal Təhlükəsizlik Xidməti Akademiyasının keçmiş məzunu Aleksandır Bordovdur! Ermənilərə kütləvi şəkildə rus pasportları paylanması iddiasını nə dərəcədə əsaslı saymaq olar?
Politoloq Yeganə Hacıyeva “Bakı-Xəbər”ə açıqlamasında bildirdi ki, son vaxtlar Qarabağdakı ermənilərə kütləvi şəkildə Rusiya pasportlarının paylanması ilə bağlı xəbərlər müxtəlif dairələr tərəfindən tirajlanır: “Bunu əsasən Rusiyanın daxilindəki erməni şəbəkəsi və Qarabağda hüquq müdafiəçisi adı ilə fəaliyyət göstərən şəxslər edir. Rusiya bu praktikadan digər separatçı regionlarda istifadə edib. Öz pasportlarını Abxaziyada, Ukraynadakı separatçı bölgələrdə də paylayıb. Rusiya eyni praktikadan Krımda da istifadə edib. Ancaq onun bu yöndə olan cəhdləri Qarabağda səmərə verə bilməz. Əvvəla ona görə ki, Qarabağda Azərbaycanın mövqeyi güclüdür, situasiyanı kontrol edə bilir. Orada yaşayan ermənilər Azərbaycan vətəndaşı sayılır. Bizim qanunvericiliyə görə isə ikili vətəndaş anlamı yoxdur. Təbiidir ki, Azərbaycan bu mexanizmdən istifadə edib, Rusiya vətəndaşlığını qəbul edən erməniləri bizim vətəndaşlıqdan çıxara bilər. Onda həmin adamlar Qarabağda yaşamaq haqqını da itirəcəklər. Bütün bunlara rəğmən, Rusiyadan gələn bu təşəbbüslər iki ölkə arasındakı münasibətlərə xələl gətirir, qarşılıqlı etibarı sarsıdır. Yəqin ki, bununla bağlı Azərbaycan öz etirazını Rusiyanın müvafiq qurumlarına bildirəcək”.
Məhəmmədəli QƏRİBLİ
