Rusiyadan Ermənistana yönəlik növbəti aşağılayıcı yanaşma yaşanıb. Adətən yeni səfirlərin etimadnaməsinin surəti xarici işlər nazirinə təqdim edilir. Aİİ, KTMT və Rusiyaya yaxın olan ölkələrə münasibətdə bu məqama xüsusi diqqət edilir. Ancaq Ermənistanın yeni səfiri Vaqarşak Arutyunyanın Moskvada Sergey Lavrovun on müavinindən biri tərəfindən qarşılanması ermənilər tərəfindən onların alçaldılması kimi dəyərləndirilib.
Ermənilər yeni təyin edilən səfirin etimadnaməsinin Rusiya XİN rəhbərinin müavinlərindən biri Andrey Rudenko tərəfindən qəbul edilməsini özlərinə həqarət sayırlar. Rusiya Xarici İşlər Nazirliyinin məlumatına görə, Andrey Rudenko Ermənistanın Moskvadakı yeni səfiri Vaqarşak Arutyunyanla görüşüb və sonuncu etimadnaməsini ona təqdim edib. Ermənistanda hesab edirlər ki, müasir diplomatiyanın norma və qaydalarına bələd olmayanlar bu məlumatda qeyri-adi heç nə tapmayaraq ötüb keçəcəklər. Lakin diplomatik protokolun incəliklərinə bələd olan şəxslər Rusiya tərəfinin Ermənistan səfirinə qarşı həddindən artıq hörmətsiz davrandığını görür. Bu isə Ermənistan və onun səfirinin aşağılanması deməkdir. Prosedura əsasən, diplomatik nümayəndə öz funksiyasını yerinə yetirmək üçün etimadnaməsini ölkənin başçısına təqdim etməyə borcludur. Sonra etimadnaməsinin surətini vermək üçün xarici işlər naziri ilə görüşür. Yəni diplomatik protokola görə, Ermənistanın Rusiyadakı səfiri etimadnaməsinin surətini xarici işlər naziri Sergey Lavrova verməli idi. Amma sonuncu Vaqarşak Arutyunyanla görüşmədi. Əvəzində isə Ermənistan səfirini, hətta birinci müavin deyil, sadəcə müavinlərindən biri qəbul etdi.
“Rusiyanı qorxudan odur ki, Türkiyə və Azərbaycanla münasibətlər qaydasına düşəndən sonra...”
Məsələyə münasibət bildirən Dirçəliş və Tərəqqi Partiyasının sədri Ramil Hüseynovun sözlərinə görə, Ermənistan səfirinin çox ustalıqla aşağılanması təsadüfi deyil: “Düzdür, Ermənistan tarixən Rusiyanın forpostu olub. Ermənistanın var olması Rusiyanın hesabına olub. Ancaq səfir Vaqarşak Arutyunyana göstərilən “münasibət” Ermənistanda Nikol Paşinyan hakimiyyətinə göstərilən münasibətin nümunəsidir. Fikrimcə, buna daha çox bu prizmadan yanaşsaq doğru olar. Məsələ ondadır ki, Robert Köçəryan və Serj Sarkisyanın prezidentliyi dönəmlərində Ermənistan rəsmiləri Rusiyada çox böyük təmtəraqla qarşılanırdı. Elə boş görüntü yaradırdılar ki, sanki Ermənistan çox ciddi çəkiyə malik olan önəmli bir ölkədir. Moskvanın timsalında belə bir münasibət ona görə sərgilənirdi ki, Ermənistanda hakimiyyətdə olan “Qarabağ klanı” sırf Kremlin maraqlarından çıxış edirdi. Kreml nə deyirdisə, Köçəryan-Sarkisyan cütlüyü də onu edirdi. Qərbin Ermənistanı Rusiyanın təsirindən çıxarmaq cəhdlərinə hakimiyyətdə olan “Qarabağ klanı” səd qoymuşdu. Hətta xaricdəki güclü erməni lobbisi də onlara təsir edə bilmirdi. Məlum olduğu kimi, 2018-ci ildə Nikol Paşinyanın timsalında Ermənistanda yeni qüvvələr hakimiyyətə gələndən sonra vəziyyət dəyişdi. Baxmayaraq ki, Ermənistanın Rusiyadan asılılığı böyük idi, amma bu, Paşinyanın Qərblə yaxın əməkdaşlığına mane ola bilmədi. Üstəlik, Ermənistan cəmiyyətində də anti-Rusiya ovqatı güclü idi. Belə olan halda Rusiya Azərbaycanın öz ərazilərini güc yolu ilə azad etməsinə müəyyən həddə qədər mane olmadı. Kreml hesab edirdi ki, bütün bunlar Qərbə yaxın olan Paşinyan hakimiyyətinin devrilməsini sürətləndirəcək. Nəticədə revanşistlər yenidən hakimiyyətə gələcək. Ancaq bütün bunlara baxmayaraq, 2021-ci ilin 20 iyununda keçirilən parlament seçkilərində erməni cəmiyyəti Paşinyana səs verdi. Ondan əvvəl baş qərargah rəisi Onik Qasparyanın timsalında çevriliş cəhdi də baş tutmadı. Belə olan halda Rusiya Paşinyan hakimiyyətini hörmətdən salmaq üçün digər vasitələrə əl atır. Arada bir Rusiya media vasitələri Paşinyanı aşağılayır, Moskva çoxgedişli kombinasiyalarla kommunikasiyaların açılmasını, sərhədlərin delimitasiyasını və digər məsələləri yubadır. Rusiyanı qorxudan odur ki, Türkiyə və Azərbaycanla münasibətlər qaydasına düşəndən sonra Ermənistan sürətlə Qərblə yaxınlaşacaq. Ona görə də səfiri sıradan bir müavinin qəbul etməsilə Paşinyan hakimiyyətinin mövqelərini zəiflətmək istəyirlər”.
Bu baxımdan partiya sədri hesab edir ki, qarşıdakı dövrdə belə halların sayı arta bilər.
Vidadi ORDAHALLI
