Azərbaycan Prezidenti İlham Əliyev rusiyalı həmkarı Vladimir Putinlə görüşəcək. Bu barədə “Rossiya 1” telekanalında yayımlanan “Moskva. Kreml. Putin” verilişində bildirilib. Vurğulanıb ki, görüşün gələn həftə baş tutması gözlənilir: “Xarici liderlərin mühüm səfərləri gələn həftə də davam edəcək. Azərbaycan prezidentinin Rusiyaya rəsmi səfəri, həmçinin Pakistanın baş nazirinin də Kremlə gələcəyi gözlənilir”.
İlham Əliyevin Moskva səfəri olduqca maraqlı zamana təsadüf etmiş olacaq. Bəllidir ki, hazırda ermənilər Qarabağdakı təxribatlarının çeşidini və sayını artırır. Eyni zamanda, Ukrayna ilə Rusiya arasındakı vəziyyət çox gərgindir. Qısa müddət əvvəl İlham Əliyevin Ukraynaya səfəri reallaşdı. Bütün bunların fonunda İlham Əliyevin Rusiyaya nəzərdə tutulan səfərindən hansı gözləntilər ola bilər?
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, çox güman, Moskvada nəzərdə tutulan görüş əvvəlcədən planlaşdırılıb: “Güman edirəm ki, bu, İlham Əliyevin Ukraynaya səfəri və Putinlə telefon danışığından sonraya təsadüf edib. Təbiidir ki, Qarabağda ermənilərin təxribatı davam edir, Ermənistan delimitasiya və demarkasiya prosesini yubadır. Hələ də bununla bağlı işçi komissiyasını yaratmayıb. Bizi narahat edən digər problemlər də var. Ancaq bugünki dünya gündəmi Ukrayna mövzusu ilə bağlıdır. Rusiya nə qədər böyük ordu toplasa da, təxribatlar törədib Ukrayna ərazisinə keçməyə çalışsa da, həm də ciddi ehtiyat edir. Vəziyyətdən çıxmaq üçün müxtəlif vasitəçilərin əməyindən yararlanmaq istəyir. Makronun xüsusi fəallığı nəzərə çarpır. Rusiya və ABŞ xarici işlər nazirlərinin görüşü alınsa, ola bilər ki, Fransa, Rusiya və ABŞ prezidentlərinin görüşü baş tutsun. Hətta Ukrayna və Rusiya prezidentlərinin görüşünün təşkili barədə söhbət gedir. Təbiidir ki, bizim Prezidentin həm Ukraynada, həm də Rusiyada böyük nüfuzu var. Hesab olunur ki, İlham Əliyev də bu prosesə öz töhfəsini verə bilər. Bu baxımdan ehtimal olunur ki, keçirilən görüşün əsas mövzusu Ukrayna ilə bağlı olacaq. Rusiya prosesdən qalib kimi çıxmaq istəyir. Ümid edirlər ki, İlham Əliyevin onların vəziyyətdən çıxmasına töhfəsi ola bilər. Təbiidir ki, görüşdə Qarabağda baş verənlər və Azərbaycan-Rusiya münasibətləri də müzakirə edilə bilər”.
Məhəmmədəli QƏRİBLİ
