“Rusiya prezidenti Vladimir Putin fevralın 20-də Donbasla bağlı mühüm qərar qəbul edə bilər”.
Bu barədə Kommunist Partiyasının lideri Gennadi Züqanov bildirib.
O, bazar ertəsi bütün rusları vəziyyəti və xəbərləri diqqətlə izləməyə çağırıb: “Putin fevralın 20-də Donbasla bağlı mühüm qərar qəbul edə bilər. Mən bazar ertəsi, fevralın 20-də bütün rusiyalıları vəziyyəti diqqətlə izləməyə və xəbər gözləməyə çağırıram”.
Bu arada “DNR” separatçılarının başçısı Denis Puşilin Donbasda vəziyyətin son dərəcə kritik olduğunu və “işlərin genişmiqyaslı müharibəyə gedəcəyini” bildirib.
Gennadi Züqanov ayrıca partiyanın sədri olsa da, siyasi təşkilatın rəhbəri kimi yox, sanki V.Putinin sözçüsü kimi danışır.
Maraqlıdır, ayın 20-də V.Putin qərar versə nə olacaq? Rusiya kommunistləri niyə belə quyruq bulayır?
“Hakimiyyət nə deyirsə, kommunistlər onu edir”
Məsələyə münasibət bildirən Aydınlar Partiyasının sədri Qulamhüseyn Əlibəylinin sözlərinə görə, G.Züqanovun belə bir açıqlama ilə çıxış etməsi təsadüfi deyil: “Məsələ ondadır ki, Rusiya Dövlət Duması iki separatçı rejimin “müstəqilliyini” tanımaqla bağlı qanun layihəsini qəbul edib. Bunun təsdiq olunması ilə bağlı Duma Putinə müraciət edib. Çox güman ki, Rusiya prezidenti sözügedən separatçı qurumların tanınması ilə bağlı qərar verəcək. Belə bir variant mümkün görünür. Ancaq indiki situasiyada Rusiya üçün digər aqressiv variantı mümkün görünmür. Çünki hazırkı dövrdə Rusiyanın Ukraynaya qarşı müharibə elan etməyini hələlik mümkün saymıram. Putin vəziyyəti nə qədər gərginləşdirsə də müharibəyə girməyəcək. Ona görə ki, bu, Rusiya üçün ciddi fəsadlara səbəb olacaq. Bu zaman Rusiyaya qarşı sanksiyalar daha da kəskinləşdiriləcək və ölkə iqtisadiyyati pis duruma düşəcək. Nəticədə Rusiyada sosial narazılıqlar artacaq. Digər tərəfdən, Qərb Ukraynaya hərbi yardım göstərir. Bu isə o deməkdir ki, Rusiya ordusu ciddi müqavimətlə üzləşəcək. Eyni zamanda, iki slavyan xalqı arasında düşmənçilik dərinləşəcək. O baxımdan müharibənin olacağını düşünmürəm. G.Züqanovun sərgilədiyi mövqeyə gəldikdə isə, RKP hakimiyyətin mövqeyindən çıxış edir. Hakimiyyət nə deyirsə, kommunistlər onu edir. Eyni zamanda, Rusiya kommunistləri separatçı qurumların tanınmasında maraqlıdır. Dəfələrlə bu yöndə çağrışlar ediblər”.
Partiya sədri onu da qeyd etdi ki, Ukrayna ətrafında gərginlik davam edəcək.
Vidadi ORDAHALLI
