Avropa Parlamentinin sədri Roberta Metsola verdiyi müsahibəsində bəyan edib ki, Ukraynaya hər cür dəstək veriləcək və baş verənlərə görə Rusiya məsuliyyət daşıyır. Bununla belə o qeyd edib ki, Rusiyaya qarşı sanksiyalar sərtləşdiriləcək: “Mesajımız çox aydın idi. Əvvəla, diktatorlar bizi parçalamayacaq. Avropa İttifaqında sabitliyi pozmağa çalışan hər kəs bunu bizim birliyimizi pozmaq üçün edir. Biz həmişə gərginliyin azaldılmasında israr edəcəyik. Biz Rusiyanı nəzərdə tutan sanksiyalarla bağlı qətnamələrimizə qayıdırıq. Biz Ukrayna ilə həmrəyik və açıq şəkildə bildiririk ki, vəziyyətin gərginləşməsi halında parlament digər qurumlarla birgə təcili, kütləvi və sürətli addım atmaqda israr edəcək”.
Görünən odur ki, Ukrayna ətrafında yaranan vəziyyətlə əlaqədar Avropa qurumları fəal, ardıcıl, davamlı olaraq mövqe sərgiləyirlər. Aydın şəkildə beynəlxalq hüquq prinsiplərindən çıxış edirlər.
Maraqlıdır, niyə Qarabağla bağlı Avropa strukturları belə fəal və konkret deyildilər? Halbuki, sözügedən məsələ ilə bağlı daha böyük imkanlara malik idilər.
“Avropa təsisatları Qarabağ məsələsində konkret mövqe sərgiləməkdə maraqlı olmayıblar”
Məsələyə münasibət bildirən AMİP sədri Arzuxan Əlizadənin fikrincə, Avropa təsisatları Qarabağ məsələsində konkret mövqe sərgiləməkdə maraqlı olmayıblar: “Çünki hər zaman Ermənistanın mənafeyi nəzərə alınıb. İstəməyiblər ki, bu dövlət zəif duruma düşsün. Xanım Roberta Metsola da bu siyasəti davam etdirir. Avropa qurumları Ukrayna ilə bağlı sərgilədikləri mövqeyin onda birini Qarabağla bağlı ortaya qoysaydılar, Ermənistan bu dərəcədə azğınlaşmazdı. Nə Azərbaycan əraziləri uzun müddət işğal altında qalardı, nə də sülh sazişinin imzalanması yubanardı. Ancaq təəssüflər olsun ki, ikili standartlardan və xristian təəssübkeşliyindən çıxış edərək işğalçı tərəfi cilovlamadılar. Avropa təsisatları Abxaziya, Cənubi Osetiya, Dnestryanı bölgə, Donbasla bağlı daha konkret mövqe sərgiləyirdilər, nəinki Qarabağla bağlı. Yəni sözügedən məsələlərlə bağlı Gürcüstanın, Moldovanın, Ukraynanın ərazi bütövlüyünə açıq və birmənalı dəstək verirdilər. Qarabağ məsələsinə gəldikdə isə nala-mıxa vururdular. Ümumi sözlərlə kifayətlənirdilər. O baxımdan Avropa qurumlarının məlum ədalətsizliyi yeni deyil. Zaman-zaman sərgilənən ikili standartların davamıdır. Baxmayaraq ki, Azərbaycan davamlı şəkildə etibarlı tərəfdaş olaraq Avropanın enerji təchizatına töhfə verir. Bununla bağlı nə mümkündürsə onu edir. Ancaq biz görürük ki, işğala, dağıntılara məruz qalan Azərbaycana Ermənistanla müqayisədə daha az maliyyə paketi təklif olunur. Bütün bunlar, təbii ki, Ermənistanın daha destruktiv mövqedən çıxış etməsinə yardım edir”.
Bu baxımdan partiya sədri hesab edir ki, Avropa qurumları belə ədalətsiz yanaşmalara son qoymalıdır.
Vidadi ORDAHALLI
