Prezident İlham Əliyev yeni təyin olunmuş icra başçılarını videoformatda qəbul edən zaman bildirib ki, Kürdəmir rayonunun kəndlərində mövcud olan problemlər təhlil edilməlidir: ”İcra başçısı bütün kəndlərə getməlidir, insanlarla görüşməlidir. Əgər hər bir kəndin problemi həll olunarsa, onda demək olar ki, bütün problemlər həll olunar”.
Dövlət başçısı deyib ki, o cümlədən Nizami və Nərimanov rayonlarının bütün guşələrində işlər elə getməlidir ki, bu rayonlar nümunəvi olsun: “Yerlərdə həlli mümkün olmayan problemlərin, - elə problemlər təbii ki var, - həlli üçün siz mərkəzi icra orqanlarına müraciət etməlisiniz, həlli mümkün olan problemləri isə özünüz həll etməlisiniz ki, insanlar sizdən razı olsun. İnsanlar sizdən razı olsalar, mən də sizin işinizdən razı olacağam.
Bir daha demək istəyirəm ki, sizə böyük etimad göstərilir. Bu təyinatı mən ictimaiyyət üçün açıq edirəm ki, hər kəs bir daha görsün mənim tövsiyələrimi və sizin məsuliyyətinizi. Sizə uğurlar diləyirəm”.
Göründüyü kimi, Prezident icra başçılarına konkret fəaliyyət istiqamətləri göstərdi: “Hətta bəzilərinə kəndlərə gedib əhali ilə görüşməyi də məsləhət gördü. Prezidentin dediyi meyarlara ölkədə neçə faiz icra başçısı uyğun gəlir?
Elşən Həsənov: “Təəssüflə qeyd etməliyəm ki, yeni təyin olunan icra başçılarının da fəaliyyətində ciddi neqativliklər görürük”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Prezident dəfələrlə məmurlara bu yöndə tövsiyələr verir, neqativliklərlə bağlı konkret xəbərdarlıqlar edir: “Ancaq təəssüf ki, biz onların Prezidentin tövsiyələrinə tam əməl etmədiklərinin şahidi oluruq. Məhz buna görə də, icra hakimiyyəti korpusunda kütləvi həbslərin şahidi olduq. Hətta bir rayonda həyata keçirilən əməliyyatdan sonra başqa bir rayondakı icra başçısının yenə rüşvət aldığı mənzərəsi ortaya çıxdı. Ölkə başçısı son çıxışında bir daha həmin məmurların son aqibətini yeni icra başçılarına pis nümunə kimi göstərdi. Təəssüflə qeyd etməliyəm ki, yeni təyin olunan icra başçılarının da fəaliyyətində ciddi neqativlikləri görürük. Mediada ictimailəşən mövzular buna əyani sübutdur. Prezidentin dediyi meyarlara çox az icra başçısı uyğun gəlir. Çoxları rayonlarda özlərini xalqın xidmətçisi kimi deyil, əsl ağa kimi aparır. Prezidentin verdiyi məsləhətlərə ciddi əməl olunmasa, bu başçıların da aqibəti yaxşı olmayacaq. Mən hesab edirəm ki, yaxın zamanlarda icra hakimiyyətləri ilə bağlı köklü islahat aparılmalıdır. Onların bütün fəaliyyəti bələdiyyələrə tapşırılmalıdır. Belə olarsa, biz ciddi irəliləyişlərə şahid olarıq”.
Məhəmmədəli QƏRİBLİ
