“Ermənistanın baş naziri Nikol Paşinyanın etimad reytinqi aşağı düşür. Bu, bütövlükdə onun siyasi komandasının reytinqinin aşağı düşməsi fonunda baş verir”. Belə bir açıqlma ilə erməni siyasi ekspert Vigen Akopyan çıxış edib.
Ekspertin fikrincə, baş nazirin komandasının reytinqi Paşinyanın şəxsi populyarlığı sayəsində yüksək olub. Buna baxmayaraq, Akopyan hesab edir ki, Ermənistan əhalisinin indiki hakimiyyətdən məyusluğu hər gün artır: "Amma bunları nəzərə alsaq belə, parlament müxalifətinin heç bir ümidi olmamalıdır, çünki hazırkı hakimiyyətdən məyus olan Ermənistan sakinləri çətin ki, hazırkı müxalifəti dəstəkləməyə hazırdır. Səslərin bir hissəsi, belə demək mümkünsə, yiyəsiz qalıb. Yəni bu bazar günü seçkilərin keçirilməsinə qərar verilsəydi, indiki hakimiyyətdən məyus olan vətəndaşların əhəmiyyətli hissəsi sadəcə olaraq seçkilərə getməzdi”. Akopyan revanşist qüvvələrin Ermənistanda hakimiyyətə gəlmək şanslarının olmadığını bildirib. Üstəlik, bu açıqlamalar Ermənistanda revanşist qüvvələrin yenidən fəallaşmağa çalışdığı bir vaxtda verilib. Yeri gəlmişkən qeyd edək ki, Ermənistanın ikinci prezidenti Robert Köçəryan yenidən Qarabağ kartı ilə indiki hakimiyyətin üzərinə hücuma keçib. O, Rusiya prezidenti Vladimir Putinin Qarabağın Azərbaycanın ayrılmaz hissəsi olması ilə bağlı bəyanatına munasibət bildirib və “bu bəyanata Ermənistandan niyə heç bir reaksiya yoxdur” sualını cavablandırıb: “Mənim hakimiyyətim dövründə Qarabağın Azərbaycanın tərkibində ola biləcəyini göstərən heç bir sənəd yox idi. Düşünürəm ki, müharibə zamanı və ondan sonra baş verən hadisələr belə bir bəyanatın yaranmasına səbəb olub. Səbəb də budur və ölkəmizin hakimiyyət orqanları İlham Əliyevin bəyanatlarına münasibət bildirməsə, guya məsələ nəhayət həllini tapıbsa, Ermənistanın Rusiyanın bəyanatlarına hansısa formada nə cavab verəcəyini gözləyirsiniz? Axı Rusiya Federasiyasının prezidenti Əliyevin, Ərdoğanın açıqlamalarını eşidir və Ermənistandan heç bir reaksiya eşitmir. Vladimir Putinin Ermənistanın baş nazirindən daha çox erməni olmasını istəyirsiniz?.. Mən, üçüncü prezident Serj Sarkisyan Qarabağın Azərbaycanın tərkibində olmaması üçün mübarizə aparacağıq, biz əlimizdən gələni edəcəyik, lakin biz bu hökumətin adından danışa bilmərik”. Erməni politoloq Levon Şirinyanın sözlərinə görə, Köçəryanın nə deməsindən asılı olamayaraq, ölkədə revanşistlərə nifrət böyükdür və onların yenidən hakimiyyətə gəlmək şansları yoxdur: “Gəlin ondan başlayaq ki, revanşistlər ümumiyyətlə parlamentdə olmamalı idilər. Onlar parlamentə gələndə hər vasitə ilə hakimiyyət dəyişikliyinə nail olmaq məqsədini bəyan etdilər. Bunun üçün istənilən vasitəyə əl atırlar. Bir daha deyirəm, onların yeganə məqsədi hakimiyyət dəyişikliyidir və bu, Rusiyadan əsən küləkdir”. Şirinyan qeyd edib ki, revanşist müxalifət qüvvələrinin konstruktiv mənada təklif edəcəyi müsbət heç nə yoxdur. Erməni politoloq vurğulayıb ki, revanşistlərin yeganə məqsədi hakimiyyətin devrilməsidir: “Lakin cəmiyyət onları dəstəkləmir və revanşistlər istəklərinə çata bilməyəcəklər”. Erməni cəmiyyətində böyük əksəriyyət başa düşür ki, bu gün Ermənistanın əsas hədəfi və xilas yolu qisas hissindən qurtulmaq, revanş ideyası ilə yaşamamaqdır. Nə bu gün, nə də gələcəkdə ermənilərin günahkar axtarışı heç bir nəticə verməyəcək. Azərbaycan ordusunun onlara verdiyi dərs Ermənistanın öz rolunu dərk etməsi və sivil dünya birliyində özünün düzgün yolunu və yerini axtarıb tapması üçün növbəti fürsətdir. Elə bu fonda da revanşistlərə erməni cəmiyyətində ciddi dəstək yoxdur. Təsadüfi deyil ki, erməni cəmiyyəti Ermənistanın ağır məğlubiyyətindən sonra özünü “xilaskar” kimi daxili auditoriyaya sırımağa çalışan və əslində, çoxdan bitmiş siyasi karyerasını Nikol Paşinyanın məğlubiyyəti üzərində dirçəltmək istəyən “Qarabağ klanı”nı rədd edir. Erməni cəmiyyətinin düşünə bilən kəsimi, ruh düşkünlüyündən savayı, həm də anlamağa çalışır ki, revanşistlər öz aqressiv açıqlamaları ilə təkcə Azərbaycana, Türkiyəyə meydan oxumur. Onların mövqeyi həm də Rusiyaya meydan oxumaqdır. Çünki 10 noyabr razılaşması Rusiyanın birbaşa vasitəçiliyi ilə imzalanıb və şəxsən Vladimir Putinin iştirakı və səyi ilə baş tutub. Bu razılaşmanın pozulmasına isə Rusiya razı olmaz. Nikol Paşinyan bəyanata qol çəkib və bu bəyanatdan kənar hansısa addım atmaq Ermənistanın daha ağır şəkildə cəzalandırılması ilə yekunlaşa bilər. Ümumiyyətlə, hazırda Ermənistanda revanşist qüvvələrin şansı o qədər də yüksək deyil. Keçirilən sosioloji sorğuların nəticələri də göstərir ki, erməni cəmiyyəti hazırda müxalifət düşərgəsinə ciddi etimad bəsləmir. Vəziyyət birmənalı şəkildə onu sübut edir ki, Ermənistan əhalisinin az bir qismi istisna olmaqla, əksər hissəsi konkret olaraq iqtisadiyyatın dirçəldilməsinin tərəfdarıdır və onlar heç bir müharibə, revanş ideyalarının arxasında dayanmaq istəmir. Onların əsas istəyi Azərbaycan və Türkiyə ilə normal münasibətlərin qurulmasına nail olmaqdır. Çünki Ermənistanın gələcəyi sırf bundan asılıdır.
Samirə SƏFƏROVA
