Müdafiə Nazirliyində aşkarlanan maliyyə pozuntuları ilə bağlı daha bir hərbçi həbs edilib. Həyata keçirilən əməliyyat tədbirlərinin davamı olaraq Hərbi Hava Qüvvələrinin maliyyə xidmətinin sabiq rəisi, polkovnik Cəlal Kazımov da tutulub.
Ona Cinayət Məcəlləsinin 313-cü (vəzifə saxtakarlığı), 179.4-cü (mənimsəmə – xüsusilə külli miqdarda ziyan vurmaqla törədildikdə), 341.2.1-ci (vəzifə səlahiyyətlərini aşma, bir qrup şəxs tərəfindən törədildikdə) və 341.2.3-cü (vəzifə səlahiyyətlərini aşma, ağır nəticələrə səbəb olduqda) maddələri ilə ittiham elan edilməklə barəsində məhkəmənin qərarı ilə 4 ay müddətinə həbs qətimkan tədbiri seçilib. Hazırda istintaq tədbirləri davam etdirilir.
Qeyd edək ki, bir neçə gün əvvəl Müdafiə Nazirliyində həyata keçirilən həbslərlə bağlı xəbər vermişik.
Belə ki, nazirlikdə qeydə alınan maliyyə pozuntuları ilə bağlı Maliyyə İdarəsinin rəisi Rafael Xəlilov, “N” hərbi hissənin maliyyə şöbəsinin rəisi Fəzail Əliyev, Quru Qoşunların maliyyə idarəsinin rəisi Bayram Bayramov və maliyyə idarəsinin zabiti Əlizadə Vüsal Ədalət oğlu həbs edilib. Ümumi zərərin 10 milyon manatdan çox olduğu bildirilir.
Belə halların vaxtında qarşısının alınmamasına görə hansı qurumlar məsuliyyət daşıyır? Orduda maliyyənin neçə xərclənməsinə kim nəzarət etməlidir?
İqtisadçı ekspert Elçin Qurbanov “Bakı-Xəbər”ə açıqlamasında bildirdi ki, bu cür təşkilatlarda məxfiliyə çox önəm verirlər: “Bu baxımdan da belə qurumlardakı maliyyə əməliyyatlarında olan kənarlaşmalar və yayınmalar çox vaxt qapalı qalır, cəmiyyətə bu barədə ətraflı məlumatlar verilmir. Buna Maliyyə Nazirliyinin aidiyyəti strukturları nəzarət etməlidir. Orduya ayrılan vəsait milyardlarla ölçülür. Pulun necə xərclənməsilə bağlı məsələni bilavasitə MN həyata keçirmir. Təsəvvür edin ki, ödəmə tapşırığı göndərilir Maliyyə Nazirliyinə, oranın da müvafiq qurumu tərəfindən podratçı təşkilata köçürülür. Mənimsəmə ilə bağlı imkanlar hər zaman olur. Adətən, mınimsəmə imkanları dövlət qurumlarının podratçı təşkilatlarla qarşılıqlı sövdələşməsi əsasında baş tutur. Əsasən də satınalmalarla bağlı vəziyyət daha pis olur. Bu qurumda isə satınalmalarla bağlı vəziyyət fərqlidir. Hərbidə bir qədər məxfilik gözlənilir. Belə hallarla bağlı hərtərəfli yoxlamanı həyata keçirən qurum Hesablama Palatasıdır. Bu qurum büdcə vəsaitlərinin proqnozlaşmasından tutmuş xərclərinə nəzarəti həyata keçirən bir nömrəli yoxlayıcı orqandır. Büdcə təşkilatlarında maliyyə təsərrüfatına dövlət nızarətini də bu qurum həyata keçirir. Həmin qurum birbaşa Milli Məclisə tabedir”.
Məhəmmədəli QƏRİBLİ
