Ermənistan mediasının iddia etdiyinə görə, UNESCO-nun sözçüsü Tomas Mallard “Armenpress”ə deyib ki, UNESCO Dağlıq Qarabağa müstəqil texniki missiya göndərmək üzərində işləyir.
UNESCO Azərbaycan dövləti ilə bu məsələni əlaqələndirmədən Qarabağ ərazisinə necə missiya göndərə bilər? Yəni UNESCO Azərbaycanın xəbəri və razılığı olmadan Qarabağa necə gedə, orada necə missiya həyata keçirə bilər? Ümumiyyətlə, UNESCO-nun Qarabağa ayrıca missiya göndərməsi qətiyyən yolverilməzdir. Çünki Qarabağ Azərbaycanın tərkib hissəsidir və ümumi şəkildə UNESCO missiyası Azərbaycan hökuməti ilə razılıq əsasında işğaldan azad edilmiş ərazilərdə yoxlama apara bilər. Eyni zamanda Azərbaycan hökuməti ilə razılaşdırılmış qaydada və dövlətimizin xüsusi nümayəndəsinin iştirakı ilə Qarabağın ərazisində missiya həyata keçirə bilər. Yoxsa UNESCO durub deyir ki, Ermənistana bir missiya göndəririk, Azərbaycana bir missiya, Qarabağa da bir missiya göndəririk. Qarabağ ayrı bir subektdir ki, ora Azərbaycandan kənarda missiya göndərilsin? Bu qətiyyən yolverilməzdir. Bu səbəbdən də Qarabağa UNESCO-nun ayrıca missiya göndərməsi bir pozuculuq aksiyasıdır və Ermənistanın, erməni lobbisinin maraqlarını ifadə edir. UNESCO-nun missiyası yalnız Azərbaycana və Ermənistana gələ bilər, Azərbaycana gələn missiyanın da işi həm azad olunmuş ərazilərimizdə, həm də hazırda müvəqqəti olaraq Rusiya sülhməramlılarının nəzarətində olan ərazilərimizdə missiya aparmaq olmalıdır. Qarabağa ayrıca bir subyekt kimi yanaşılması isə qətiyyən yolverilməzdir.
UNESCO-nun Qarabağa ayrıca missiya göndərmək kimi təhlükəli planını pozmaq üçün nə etmək lazımdır? Biz bunun üçün nə etməliyik ki, UNESCO bu təxribata yol verməsin?
“UNESCO-nun missiyası Qarabağa mütləq Bakıdan getməlidir, belə də olacaq”
Qafqaz Tarixi Mərkəzinin direktoru Rizvan Hüseynov “Bakı-Xəbər”ə bildirdi ki, Ermənistan mediasının yaydığı bu məlumat dezinformasiyaya daha çox bənzəyir. “Ermənistan mediası bu şübhəli fikirləri UNESCO-nun mətbuat katibinin adından yayıb. Bu qondarma bir şeydir. Əslində, dövlət xətti ilə UNESCO-ya müraciət olunmalıdır ki, bu Tomas Mallard, bu uşaq kimdir erməni toruna salıblar, erməni mətbuatı bundan istifadə edib? Hər şey danışılıb, hər şey həll olunub. Bilirsiz ki, Azərbaycan Prezidenti İlham Əliyevin, Fransanın Avropa İttifaqına sədrliyi qismində Prezident Emmanuel Makronun, Avropa İttifaqı Şurasının Prezidenti Şarl Mişelin və Ermənistan Baş naziri Nikol Paşinyanın iştirakı ilə videoformatda keçirilən görüşdə razılıq əldə olunub. Fevralın 4-də keçirilən görüşdə UNESCO-nun Azərbaycana və Ermənistana missiyası məsələsi də müzakirə olunub və missiyanın hər iki ölkəyə göndərilməsinə dair razılıq ifadə edilib. Bu barədə rəsmi razılaşma var. UNESCO-nun missiyası Bakıya gələcək və Azərbaycanın ayrılmaz hissəsi olan Qarabağa da Bakıdan gedəcək. UNESCO-nun missiyası Qarabağa mütləq Bakıdan getməlidir, belə də olacaq. Hesab edirəm ki, yayılan məlumat yüz faiz növbəti erməni təxribatıdır. Bu təxribatda da birbaşa erməni qriqorian kilsəsinin əli var. Görürsüz ki, məlumatda erməni kilsəsinin də adını çəkirlər. UNESCO-nun həmin nümayəndəsinə müraciət olunmalıdır ki, siz belə demisiz, yoxsa sizin fikirləriniz təhrif olunub? Bu şəxsdən bizim dövlətimiz və mətbuatımız açıqlama tələb etməlidir. Hansı hüquqla bu şəxs 4 tərəfli razılaşma əsasında qəbul edilən qərara bu cür yanlış don geydirmək istəyir, onu təhrif edir? 4 tərəfli görüşdə razılığa gəlinən məsələlərdən biri UNESCO-nun bölgəyə iki missiya göndərməsi ilə bağlıdır. Razılaşmaya əsasən, UNESCO Azərbaycana və Ermənistana missiya göndərəcək. Azərbaycana gələn missiya isə Bakıdan Qarabağa gedəcək. Ortada qəbul olunmuş bu cür ciddi qərar olduğu halda bu kimi uydurma iddianın ortaya atılması yolverilməzdir”.
R.Hüseynov qeyd etdi ki, bu məsələ ciddi şəkildə araşdırılmalıdır. Yazı çapa hazırlandığı ərəfədə Rizvan müəllim bizimlə əlaqə saxlayaraq Ermənistan mediasının T.Mallardın fikirlərini təhrif etdiyini bildirdi və mətnin qondarma və orjinal variantlarını bizə təqdim etdi. O vurğualdı ki, bu yaxınlarda UNESCO-nun mətbuat katibi Tomas Mallardın erməni rusdilli seqmentində şərhinin tərcüməsi dərc olunub və hər iki təqdimat arasında ciddi fərq var. “Biz 1954-cü il Konvensiyasına əsasən UNESCO-nun Müstəqil Texniki Missiyasının Dağlıq Qarabağa göndərilməsi üzərində işi davam etdiririk”. Bunu erməni mediası verib və onun fikrini özlərinə sərf edən formaya yönəldərək daxili auditoriyanın başını qatıblar. UNESCO sözçüsünün fikirlərini tamamilə təhrif edən Ermənistan mətbuatı cidanı cuvalda çox da gizlədə bilməyib və mətnin orjinal variantının üzə çıxması erməni yalanlarının üstündən xətt çəkib. UNESCO sözçüsünün fikirlərinin orijinalı isə belədir: “Biz 1954-cü il Konvensiyasına əsasən UNESCO-nun Müstəqil Texniki Missiyasının istiqaməti üzərində işi davam etdiririk. Ümid edirik ki, bu, yaxın gələcəkdə mümkün olacaq, lakin hələlik bunun üçün lazımi şərait yoxdur. Deməli, müzakirələr hələ də davam edir” - deyə UNESCO-nun mətbuat attaşesi Tomas Mallard bildirib.
Fikirlərin sonunda Qafqaz Bürosunun diqqət çəkən şərhini də təqdim edirik: “Daha bir erməni saxtakarlığı. Bu, hörmətli beynəlxalq təşkilatın adından ancaq arzulamağı bacaran erməni beyninin daha bir məhsuludur”.
İradə SARIYEVA
