Xankəndidəki separatçı-terrorçu rejimin “parlamenti” “işğal olunmuş ərazilər haqqında” qondarma “qanun layihəsi”ni birinci oxunuşda qəbul edib. Qondarma “qanun”a Şuşa, Xocavənd, Ağdərə, Hadrut, Əsgəran, Laçın, eləcə də Goranboy və keçmiş Xanlar rayonu daxildir.
Terrorçu rejimin bu “qanunu” praktiki olaraq əhəmiyyətsizdir. Özləri də praktikada necə tətbiq edəcəklərini bilmədiklərini deyir. Lakin qondarma “qanun”dan Qarabağın “statusu” məsələsində istifadə etmək istədikləri bəllidir.
Bunun fonunda separatçılar hərbi müstəvidə də fəaliyyətini genişləndirir. Azərbaycan Müdafiə Nazirliyinin son açıqlaması təsdiq edir ki, erməni terrorçular kənd təsərrüfatı işləri adı ilə səngər qazmağa çalışıblar. Bu cəhdin qarşısı alınıb, lakin rus sülhməramlılarının dayandığı mövqelərdən başqa erməni terrorçuların postlarının olduğu da məlum məsələdir və bu postlarda mühəndis-istehkam işləri həyata keçirilir.
Separatçı rejim Qarabağda mülki ermənilərin də silahlandırılması istiqamətində işləyir. Qondarma “təhlükəsizlik şurası”nın katibi Vitali Balasanyanın təşəbbüsü ilə mülki ermənilər hərbi təlimlərə cəlb olunacaq. Fevral-may ayları olmaqla 3 ay davam edəcək təlimlərdə atəş hazırlığı üzrə dəsrlər keçiriləcək.
Bütün bunlardan ermənilərin Qarabağda nəyə hazırlaşdığı ilə bağlı hansı nəticəni çıxara bilərik?
Hərbi-siyasi ekspert, ehtiyatda olan polkovnik Daşdəmir Əliyev “Bakı-Xəbər” ə açıqlamasında bildirdi ki, ermənilər elə təsəvvür yaratmaq istəyir, güya hələ də Xankəndidə hansısa “hakimiyyət” var və separatçılara Ermənistanın təsir imkanları yoxdur: “Bunlar hamısı yalandır. Ermənilər özlərinin müəyyən istəklərinə nail olmaq üçün bu cür vasitələrdən istifadə edirlər. Separatçılar, guya müstəqil şəkildə “seçkilər”, “islahatlar” keçirmək barədə “qərar” qəbul edirlər. Bunların qarşısı birmənalı olaraq Azərbaycan hakimiyyəti tərəfindən alınmalıdır. Azərbaycan hakimiyyəti məsələyə kompleks yanaşmağı tələb etməlidir.
Bu cür təxribatların maya qədər davam edəcəyini gözləyirəm. Burada başqa bir məsələ də var. Bu da fevralın 24-də Vyanada Ermənistan və Türkiyə arasında normallaşma prosesində xüsusi nümayəndələrin görüşü ilə bağlıdır. Birinci görüşdə Rusiya danışığa imkan vermədi. Ancaq qarşıdakı görüşdən gözləntilər böyükdür. Burada sülh sazişindən, sərhədlərin delimitasiya və demarkasiyası, Zəngəzur dəhlizinin açılması, Ermənistanın Türkiyəyə və Azərbaycana qarşı ərazi iddiaları və saxta soyqırımı kimi məsələlərin müzakirəsi olacaq. Bunların da hamısı elə bil ki, Rusiyanın ən ağrılı ayağını tapdamaqdır. Bu cür təxribatlar fevral ayında davam edəcək. Ölkəmiz bu ayda Xocalı soyqırımının 30 illiyini qeyd edəcək. Mən belə düşünürəm ki, bu cür təxribatlar Novruz bayramından sonra qurtarmalıdır. Bu cür davam edərsə, Azərbaycan antiterror əməliyyatlarına başlamalıdır. Belə olsa, onlar bu təxribatlara davam edə bilməyəcək. Rus sülhməramlıları da burada ya öz vəzifələrini görməlidirlər.
Ermənilərin son addımlarına isə bu qiyməti verə bilərik:
Xankəndidəki separatçı-terrorçu rejimin Azərbaycan sərhədləri daxilində “dövlət” olmaq istəyi stimullaşır.
Ermənistan “Qarabağ münaqişəsi bitməyib” iddiası üçün “arqument” qazanır.
“Qarabağın statusu” məsələsini gündəmə gətirmək istəyən dövlətlərə istinad mənbəyi verir”.
Məhəmmədəli QƏRİBLİ
