Məlum olduğu kimi, Dövlət Təhlükəsizliyi Xidməti Müdafiə Nazirliyində əməliyyat keçirib. Nazirliyin Maliyyə İdarəsinin şöbə rəisi, polkovnik Xələfov saxlanılıb. Səbail rayon Məhkəməsində onun barəsində 4 ay müddətinə həbs-qətimkan tədbiri seçilib.
Polkovnik Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə təqsirləndirilir. O, yarım milyon manatdan çox dövlət vəsaitini mənimsəməkdə şübhəli bilinir.
Bakı Hərbi Məhkəməsinin qərarı ilə Azərbaycan Müdafiə Nazirliyinin Quru Qoşunlarının maliyyə şöbəsinin rəisi Bayramov Bayram Xəlil oğlu da həbs edilib. Bildirilir ki, zabit 2 milyon 635 min manat pul mənimsəməkdə ittiham olunur.
Keçirilən əməliyyat tədbirləri nəticəsində hərbi hissənin maliyyə şöbəsinin rəisi Sərkərov Fərahim Fazil oğlu da həbs edilib. Zabit 450 min manatı mənimsəməkdə ittiham olunur. Bundan başqa, Əlizadə Vüsal Ədalət oğlu məhkəmənin qərarı ilə həbs edilib. Zabit 1 milyon 800 min manat mənimsəməkdə ittiham olunur.
DTX-nin Müdafiə Nazirliyinin maliyyə idarəsində keçirdiyi əməliyyatlar nəyi sübut etdi? Bütün bunlar həm də büdcədən ən çox vəsait alan qurumun maliyyə işlərinə ictimai nəzarətin zəif olmasından qaynaqlana bilərmi? Çünki Müdafiə Nazirliyindən yazan kimi bunu Orduya aid məxfiliklə bağlayırlar. Təbiidir ki, bəzi hərbi sirlər qorunmalıdır, ancaq maliyyə ilə bağlı məsələ üzərində ictimai nəzarət güclü olmayanda belə mənimsəmələr üzə çıxır.
Media eksperti Azər Həsrət “Bakı-Xəbər”ə bildirdi ki, bu sahəyə ictimai nəzarətin ənənəvi qaydada tətbiq edilməsi mümkün deyil: “Bunun da bəlli səbəbləri var. Çünki spesifik sahədir, ora açıq nəzarət etmək qeyri-mümkündür. Bu baxımdan cəmiyyətimiz, o cümlədən media həmin sahənin üzərinə çox getməyib. Təəssüflər olsun ki, bu durumdan sui-istifadə edənlər oldu. Adamlar vicdansızcasına millətin, dövlətin etimad göstərdiyi sahəni çapıb-talamaqla məşğul oldular. Bir əsgərin payına düşən 3-5 manat pulu kəsmək, onu talamaq Vətənə edilən xəyanətdən başqa nəsə deyil. Təəssüflər olsun ki, çiyinlərində rütbə paqonu gəzdirən adamlar bunun fərqinə varmayıblar. Buna görə də, həmin sahəyə ictimai nəzarəti təmin etmək üçün yeni mexanizmlər üzərində işləmək vacibdir. Özü də bunu dövlətin özü işləməlidir. Çünki nəzarətsiz qalanda bu cür pis-pis əməllər ortaya çıxır. Müəyyən qruplar təşkil etmək olar ki, bəzi öhdəliklərlə bu nəzarəti həyata keçirsin. Yəni orada ortaya çıxan faktları ictimailəşdirməmək və başqa detallara riayət etməklə. Dövlət mütləq mənada bu müxanizmin işlənməsində maraqlı olmalıdır. Bunun təmin edilməsi həmin qurumdakı neqativlikləri aradan qaldıra bilər”.
Məhəmmədəli QƏRİBLİ
