Ermənistan Kadastr Komitəsi “Sputnik Armenia”nın sorğusuna cavab olaraq bildirib ki, Azərbaycan vətəndaşları Ermənistanda ən azı altı daşınmaz əmlaka sahibdirlər: “2010-2021-ci illərdə Ermənistanda daşınmaz əmlak hüququnun qeydiyyatı üzrə Türkiyə vətəndaşları tərəfindən ümumilikdə 71, Azərbaycan vətəndaşları tərəfindən 6 əqd bağlanıb”.
Komitənin məlumatına görə, 2012, 2018 və 2019-cu illərdə Azərbaycan vətəndaşları mənzillər alıblar. Daha bir mənzil hədiyyə edilib (2012-ci il). Bundan əlavə, bir ictimai əhəmiyyətli obyekt alınıb.
Söhbət Azərbaycan vətəndaşlığı olan şəxslərdən gedir, onların etnik mənsubiyyətindən yox, “Sputnik Armenia” dəqiqləşdirir. Qeyd edilir ki, görünür, onlar Azərbaycandan olan ermənilərdir. Bu, Türkiyə vətəndaşları olan etnik ermənilərə də aiddir. Göstərilən müddətdə onlar Ermənistanda 53 mənzil alıblar, 1 mənzil hədiyyə edilib, 1-i dəyişdirilib. Bundan əlavə, onlar 5 fərdi ev, 1 qaraj, 7 ictimai əhəmiyyətli obyekt, 3 torpaq sahəsi alıblar. Ən çox alış 2016 (8), 2017 (14), 2019 (18) və 2021-ci (8) illərdə olub. Türkiyədə və Azərbaycanda qeydiyyata alınmış hüquqi şəxslər həmin dövrdə Ermənistanın daşınmaz əmlak sahəsində sövdələşmələr etməyiblər.
Maraqlıdır, Azərbaycan vətəndaşlarının Ermənistanda mənzil alması ilə bağlı deyilənlər nə dərəcədə doğru ola bilər? Belə məlumatlar həqiqəti əks etdirir, yoxsa cəmiyyətdə sosial gərginliyi artırmaqdan ötrü məqsədyönlü şəkildə dövriyyəyə buraxılıb? O mənada ki, Azərbaycan vəsaiti hesabına Ermənistanda daşınmaz əmlak alınır. O üzdən, bu məlumatlar nə dərəcədə doğru ola bilər?
“Bizim vətəndaşlar bundan sonra Ermənistanda əmlak ala bilər”
Məsələyə münasibət bildirən Böyük Azərbaycan Partiyasının sədri Elşad Musayev sözügedən məlumata birmənalı prizmadan yanaşmadı: “Əvvəla, ermənilərdən nə desən gözləmək olar. Onların insanların beynini qarışdırmaqdan ötrü belə dezinformasiyalar yaymasını istisna etmirəm. Çünki bu məxluqlar təxribat törətmək sahəsində ustadılar. İstənilən vaxt, istədikləri kimi təxribat xarakterli informasiyalar yaya bilərlər. Ola bilsin ki, həqiqətən belə hallar var. Ancaq onların kimliyi maraq doğurur. Bəlkə də hansısa ikili vətəndaşlığı olan şəxs oradan əmlak alıb. Ancaq bildiyim qədər, bizim qanunvericilik ikili vətəndaşlığa icazə vermir. Başqa bir tərəfdən, bizim vətəndaşlar bundan sonra Ermənistanda əmlak ala bilər. İki ölkə arasında münasibətlər düzələndən, kommunikasiya xətləri açılandan sonra bu ola bilər. Ermənistan qanunvericiliyi icazə verirsə, o zaman Gürcüstan və yaxud da Azərbaycan vətəndaşı orada ev ala bilər. Əslinə baxanda, bundan sonra belə hallar çoxala bilər. Çünki Azərbaycan inkişaf edir. Ölkəmizdə çoxlu sayda imkanlı adamlar var. İki ölkə arasında açılım olandan sonra bunun baş verəcəyi ehtimalı böyükdür”.
O üzdən partiya sədri güman edir ki, bundan sonra belə hallar baş verə bilər.
Vidadi ORDAHALLI
