Müdafiə nazirinin sabiq müavini, Hərbi Hava Qüvvələri və Hava Hücumundan Müdafiə Qoşunlarının sabiq komandanı, general-mayor Altay Mehdiyev öz sosial şəbəkə hesabında sensasion bəyanat yayıb. Həmin bəyanatdan bir hissəni təqdim edirik:
“Xidmət etdiyim müddət ərzində mənə qarşı törədilən çoxsaylı qanunsuzluqlara baxmayaraq, rəhbərliyim altında çox sayda çox uğurlu əməliyyatların keçirilməsinə nail olmuşuq. Çox uğurlu əməliyyat o deməkdir ki, keçirilən döyüş əməliyyatları zamanı bir nəfər də olsun itki verilmir.
Ən uğurlu əməliyyatlarımızdan biri də 2003-cü ildə rəhbərliyim altında düşmənin nəzarətində olan Buzqov dağı–Havuç kəndi arasında 70 kv.km yaxın ərazidə yerləşən bütün strateji hündürlükləri azad etməyimiz olmuşdur.
Qəbul etdiyim əsaslandırılmış qərar, real vəziyyətə uyğun olaraq hazırladığımız döyüş planı, döyüş planına uyğun olaraq keçirdiyimiz təlimlər, əməliyyata cəlb olunan bölmələrin hazırlığı, döyüş ərazisində qabaqcadan gördüyümüz ağlabatmaz mühəndis işləri, şəxsi heyət tərəfindən məxfilik rejiminə tam şəkildə riayət olunması və nəhayət qarşımızda duran lovğa, özündən razı, heç bir hazırlığı olmayan, Qarabağ müharibəsinin ilk günlərində bizim səhvlərimiz hesabına təsadüfi “qələbə” qazanan düşmənin durumu bu əməliyyatı çox uğurla keçirməyimizə əsas verirdi.
Bəli, bu əməliyyat zamanı, planımıza uyğun olaraq, qısa bir zamanda, düşmənə göz açmağa belə imkan vermədən, çox eşelonlu mina sahələrini uğurla keçərək, bir nəfər olsun belə itki vermədən, ən yeni taktiki üsullarla torpaqlarımızı azad etdik!!!
Dəhşətlisi ondan ibarətdir ki, keçirdiyim döyüş əməliyyatının ən qızğın vaxtında, yeni azad etdiyimiz Buzqov dağında əməliyyatı idarə edərkən, o zaman Baş qərərgah rəisi vəzifəsində olan Nəcməddin Sadıqov mənimlə mobil telefonla əlaqə saxlayaraq, taktiki vəziyyətlə maraqlanmadan, araşdırmadan, çox acıqlı və qəzəbli bir tərzdə:
– Siz haradasınıız? Nə ilə məşğulsunuz?
– Ön xətdə! Müdafiə xəttini möhkəmləndirməklə!
– Hansı müdafiə xəttini möhkəmləndirməklə? Bu dəqiqə Ermənistanın Baş qərərgah rəisi Arutunyan mənimlə əlaqə saxlayıb bildirdi ki, siz hücuma keçib “torpaqlarını” zəbt etmisiniz. İrəvanda prezident aparatı qarşısında mitinq keçirilir. Mən sizə əmr edirəm! Təcili olaraq əvvəlki mövqelərimizə qayıdın!
– OLDU! – sözünü, 1974-cü ildən hərbi xidmətdə olduğum bütün müddət ərzində söylədiyim qədər ürəkdən, böyük bir sevinc hissi, yüksək templə söyləməmişdim. Lakin onun qanunsuz verilən “əmrinə” məhəl qoymadan çox uğurlu döyüş əməliyyatlarına rəhbərliyə davam etdim.
Ən maraqlısı odur ki, Sadıqov çox gözəl bilirdi ki, Naxçıvan MR keçirdiyimiz bütün tədbirlər Ali Məclisin sədri cənab Vasif Talıbovun şəxsən tapşırığı, razılığı və nəzarəti altında, qarşımıza qoyduğu “ƏGƏR TORPAQLAR BİZİMDİRSƏ, O TORPAQLARA BİZ NƏZARƏT ETMƏLİYİK“, – tələbi altında həyata keçirilirdi. Bütün bunlara baxmayaraq, yenə də digər istiqamətdə olduğu kimi, Naxçıvan MR-də də istədiyini həyata keçirməyə çalışırdı…”
Göründüyü kimi, Altay Mehdiyev çox sensasion sayıla biləcək bir açıqlama verir. Düzdür, onun bu açıqlaması ilə bağlı da çoxlu sayda suallar ortaya çıxır ki, bunlara məhz cənab generalın özü cavab verə bilər. Maraqlıdır, deyilən zamanda çox yüksək post tutan bu şəxs Nəcməddin Sadıqovun etdiyi bu əməllə bağlı daha yuxarı instansiyalara məlumat veribmi? Verməyibsə, niyə indiyə kimi bu məqamı gizli saxlayıb? Onun açıqladığı bu ciddi faktla bağlı prokurorluq araşdırma aparmalıdırmı?
Təəssüf ki, biz Altay Mhdiyevlə əlaqə yarada bilmədik. Belə bir kontakt olan kimi ondan bu sualların cavabını almağa çalışacağıq. Bəs bu suallarla bağlı hərbi ekspertlər nə düşünür?
Hərbi siyasi ekspert “Bakı-Xəbər”ə açıqlamasında bildirdi ki, uzun illərdir Nəcməddin Sadıqovun fəaliyyəti ilə bağlı müxtəlif fikirlər səsləndirilir: “Onun fəliyyətilə bağlı narazılıqlar çoxdur. Əksəriyyət iddia edir ki, Sadıqov Rusiyanın maraqlarına xidmət edib, atdığı bütün addımlar da həmin istiqamətdə olub. Altay Mehdiyev də çox önəmli vəzifələr tutub. Keçmiş adı Naxçıvan Korpusu olan hərbi birləşmədə qərargah rəisi vəzifəsində işləyib. Bundan sonra da ordumuzun çox əhəmiyyətli sahələrinə rəhbərlik edib. Onun uzun illərdən sonra belə bir açıqlama ilə çıxış etməsi sıradan olan məsələ deyil. Lakin generalın açıqlamasında bir çiylik görürəm. Sanki oxu atıb, yayı gizlədir kimi davranıb. Yalnız bir detalı deyib, ancaq onun şərhini verməyi cəmiyyətin ixtiyarına buraxıb. Yaxşı olardı ki, general bu məsələ ilə bağlı daha təfərrüatlı açıqlama versin. Belə bir hadisənin baş verməsini istisna etmirəm. Altay Mehdiyev MN-də xidmətdə olduğu zaman Nəcməddin Sadıqovla pis münasibətdə olmayıb. Sadəcə, bəziləri yaranmış vəziyyətə uyğun davranır. Belə bir fikrin indi səslənməsi bir qədər şübhələr yaradır. O da bəllidir ki, hərbi xidmətdə olan zaman belə bir açıqlamanın verilmısi doğru sayılmazdı. Amma tərxis olunduqdan sonra, bu illər ərzində danışmayıb indi danışması da çox maraqlıdır. Mən bu məsələdə Nəcməddin Sadıqova da hər hansı haqq qazandırmaq istəmirəm. İstənilən halda, bu məsələ ilə bağlı Hərbi Prokurorluq araşdırmaya başlamalı və bu cür ciddi məsələyə hüquqi qiymət verməlidir”.
Məhəmmədəli QƏRİBLİ
