Prezidentin mətbuat xidməti NATO Baş katibi ilə Azərbaycan Prezidenti arasında telefon danışığına dair məlumat yayıb. Məlumatda deyilir: “Fevralın 15-də NATO-nun Baş katibi Yens Stoltenberq Azərbaycan Respublikasının Prezidenti İlham Əliyevə zəng edib.
Söhbət zamanı NATO-nun Baş katibi ötən ilin dekabrında NATO-ya səfəri və NATO-nun ali orqanı olan Şimali Atlantika Şurasında çıxışına görə Prezident İlham Əliyevə təşəkkürünü ifadə edib. Dövlətimizin başçısı dəvətə və göstərilən qonaqpərvərliyə görə təşəkkürünü bildirib.
Telefon danışığı əsnasında Azərbaycan-NATO əlaqələrinin inkişafından məmnunluq ifadə olunub, Cənubi Qafqaz regionunda postmünaqişə vəziyyəti, Ukrayna ətrafında cərəyan edən proseslərə və dünya enerji bazarındakı mövcud duruma dair fikir mübadiləsi aparılıb.
NATO-nun Baş katibi Avropanın etibarlı qaz təchizatçısı olmasına və qaz ixracını artırmasına görə Azərbaycana təşəkkürünü ifadə edib. Prezident İlham Əliyev Azərbaycanın enerji məhsulu növlərinin önəmli ixracatçısı kimi etibarlı tərəfdaş olaraq qalmaqda davam edəcəyini diqqətə çatdırıb”.
Telefon danışığı barədə Yens Stoltenberq də özünün Twitter səhifəsində bildirib. Baş katib Azərbaycan Prezidenti ilə “yaxşı telefon danışığı” apardığını yazıb:
“Prezident Əliyevlə yaxşı telefon danışığı apardım. Biz regional təhlükəsizliyi və Ukrayna ətrafındakı vəziyyəti, bunun energetika bazarlarına təsirlərini müzakirə etdik. Mən Azərbaycan prezidentinə Avropaya qaz təchizatının artırılmasına görə təşəkkür etdim”.
Əslində bu telefon zəngi çox maraqlı dönəmə təsadüf edir. Bizə yaxın olan çoğrafiyada gərgin proseslər cərəyan edir. Xüsusilə də Ukrayna ilə bağlı Rusiyanın qarşıdurmasını qeyd etmək olar.
Belə bir məqamda NATO-nun Azərbaycana göstərdiyi maraq bizi son proseslərdə öz yanında görmək istəyinə bağlı ola bilərmi? Təbiidir ki, bu mövzuda Rusiya da bizdən məhz onun yanında olmağımızı istəyəcək. Azərbaycanın mövqeyi necə olmalıdır?
Politoloq Qabil Hüseynli “Bakı-Xəbər”ə bildirdi ki, belə bir məqamda tərəflərin hər biri Azərbaycanı öz yanında görmək istəyər: “Ancaq nəzərə alaq ki, Azərbaycanın özü üçün də Ukrayna məsələsi olduqca həssasdır. Çünki həm Rusiya, həm də Ukrayna ilə bizim yaxın münasibətlərimiz var. Azərbaycan bu məsələdə kiminsə yanında konkret yer tutmamalıdır. Əksinə, biz daha çox barışdırıcı missiya ilə çıxış edirik. Eyni mövqeni Türkiyə də sərgiləyir. NATO bu məsələdə anti-Rusiya mövqeyi tutur. Deməli, onunla birlikdə olmaq Rusiyaya aşkar şəkildə meydan oxumaq anlamına gəlir. Azərbaycan Avropaya qaz nəqlini artırıbsa, belə bir məqamda bu onlar üçün ciddi dəstək deməkdir. Bizim konkret əsaslarla müəyyənləşən siyasi kursumuz var. Biz uzun illərdi ki, Qoşulmama Hərəkatının üzvüyük və həmin qurumun prinsiplərinə sadiqliyimizi göstəririk. Ən doğru mövqe də budur. Azərbaycan Krım Platforması adlı tədbirdə iştirak etmədi. Bu o demək deyil ki, Ukrayna ilə düşmən olduq. Onlar da anladı ki, biz balansı qoruyuruq. Azərbaycanın NATO ilə də münasibətləri normal məcrada davam edir. Hesab edirəm ki, belə həssas məqamda nə NATO, nə də Rusiya bizdən öz məqsədi üçün istifadə edə biləcək”.
Məhəmmədəli QƏRİBLİ
