Məlum olduğu kimi, Vətən müharibəsi zamanı Azərbaycan ərazilərini işğaldan azad edəndən sonra ermənilər yeni taktika seçiblər. Bütün dünyaya car çəkirlər ki, guya Azərbaycan ələ keçirdiyi ərazilərdə erməni irsinə aid mədəni-dini abidələri məhv edir. Halbuki, həmin abidələrin ermənilərə heç bir aidiyyəti yoxdur.
Söhbət qədim Alban abidələrindən gedir ki, ermənilər onları öz adlarına çıxır. Azərbaycan ötən müddət ərzində hansısa abidəni məhv etməyib. Tam əksinə, bütün tarixi abidələri qoruyur.
Təəssüf doğuran məqam odur ki, bəzi Avropa dövlətləri, qurumları erməni yalanlarının təsiri altına düşür. Həyasızlığın dərəcəsinə baxın ki, indi də Avropa İttifaqının əsas qurumlarından olan Avropa Parlamentinin üzvləri guya “Artsaxın” erməni tarixi-mədəni irsinin Azərbaycan tərəfindən məhv edilməsi təhlükəsi ilə bağlı “həyəcan təbili” çalırlar: “Azərbaycan kilsələrdən erməni izlərini silməyi planlaşdırdığını bəyan edib. Beynəlxalq ictimaiyyət indi hərəkətə keçməlidir. Biz “Artsax”dakı erməni tarixi-mədəni irsini saxtalaşdırmaq, təhrif etmək və ya məhv etmək cəhdlərini qınamalı və dayandırmalıyıq”.
Bununla bağlı fakt varmı ki, Avropa Parlamenti üzvləri bu barədə danışır? Azərbaycan Avropaya qaz nəqlini artırdığı bir zamanda bunlar erməni lobbisinin yedəyində gedir.
“Bu aşkar həyasızlıq nümunəsidir və açıq şəkildə separatçılığın, vandallığın dəstəklənməsi anlamını daşıyır”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, zaman-zaman Avropa Parlamentinin anti-Azərbaycan xarakterli, yaxud ermənipərəst fəaliyyətlərini müşahidə etmişik: “Lakin bütün bunlara rəğmən, həmin fəaliyyətlərə qətiyyətli cavablar da verilib. Təəssüf doğuran hal isə budur ki, Avropa Parlamentinin aşkar qərəzlərinə Avropa İttifaqı rəsmi etirazla münasibət bildirmir. Çünki bildiyimiz kimi, Avropa Parlamenti Avropa İttifaqının tərkib hissəsidir. Nəzərə alsaq ki, Azərbaycan dövlətinin Avropa İttifaqı ilə çoxşaxəli əməkdaşlığı kifayət qədər normal, inkişaflı çərçivələrə söykənir, o zaman qurum buna diqqət etməlidir. Azərbaycanın Aİ üçün önəmli dövlət olduğunu da buraya əlavə etsək, bu qurum tərəfindən Avropa Parlamentinin siyasi oyunbazlıqlarına qətiyyətli cavabın, ya da etirazın verilməsini gözləməliyik. Baxın, Azərbaycan Avropaya qaz nəqlini artırdığı bir zamanda, onun yedəyindəki parlament üzvləri erməni lobbisinin sifarişlərini canla-başla icra edirlər. Əslində belə bir davranışa qarşı qətiyyətli etirazın və sərt münasibətin göstərilməsi labüddür. Deyərdim ki, hətta vacibdir”.
Politoloqun fikrincə, bu aşkar həyasızlıq nümunəsidir və eyni zamanda, açıq şəkildə separatçılığın, vandallığın və 30 illik işğal faktının Avropa Parlamenti tərəfindən dəstəklənməsi anlamını daşıyır: “Bu gün həmin qərəzkarların guya Azərbaycandakı kilsələrin üzərindəki “erməni izlərini silməsi” ətrafındakı hay-harayları siyasi şantajın bir vasitəsidir. Onlar birbaşa Avropanın müxtəlif siyasi-ictimai dairələrinə bağlı olan erməni lobbiçilərinin sifarişlərini həyata keçirirlər və bu mövzu da onlardan biridir. Görün bunlar nə qədər hədlərini aşırlar ki, hətta Qarabağdakı qədim Qafqaz Albaniyasına məxsus kilsələrin üzərində saxtakarlıqla həkk edilmiş erməni izlərini “tarixi abidə” kimi təqdim edirlər. Halbuki, artıq bir çox nüfuzlu mütəxəssislər, tarixçilər və etnoqraflar sözügedən izlərin işğal dövrlərində həkk olunduğunu sübut və dəlillərlə vurğulayır. Avropa Parlamentinin şantajçı nümayəndələri isə, nədənsə, 30 illik işğal dövründə Azərbaycanın Qarabağdakı qədim mədəni irsinin, dini abidələrinin məhv olunması, dağıdılması, təhqirlərə məruz qoyulması, yer üzündən silinməsi barəsində bir kəlmə də olsun danışmırlar. Çünki bu onlara sərf etmir, erməni lobbistləri onların korrupsiyaya bulaşmış, ovuclarına axan pullarını kəsə bilər. Belə olan halda biz də belə bir iddia ilə çıxış edə bilərik ki, Aİ-nin yüksək qurumları Avropa Parlamentinin saxtakar deputatlarının fəaliyyətlərini araşdırsınlar və onların siyasi korrupsiyalar qarşılığındakı əməllərini ifşa etsinlər. Bu bizim tələb haqqımızdır. Sözügedən məsələni Azərbaycan parlamentinin və digər əlaqədar qurumların da qaldırması vacibdır. Biz belə bir məsələyə səthi yanaşmamalıyıq və düşünürəm ki, parlamentdəki deputatlarımız Avropa Parlamentinin ermənipərəst ünsürlərinin cavabını verməlidir”.
Politoloq onu da əlavə etdi ki, bəzi dövlət qurumları da həmin şantajın qarşısının alınması üçün Avropa İttifaqının müvafiq ali strukturlarına etirazlarını bildirməlidir.
Vidadi ORDAHALLI
