Azərbaycan Baş Prokurorluğu İstintaq İdarəsinin rəisi Nemət Əvəzov deyib ki, cinayət törətmiş hər bir şəxsin, o cümlədən Araik Arutunyanın və digərlərinin qısa müddətdə tutularaq istintaqa cəlb edilməsi təmin olunacaq.
Vətən müharibəsi zamanı Gəncə şəhərinə 26 nəfərin ölümü ilə nəticələnən 4 terror hücumu olub, özünü qondarma rejimin “prezident”i sayan quldurbaşı Araik Arutunyan isə sosial şəbəkə hesabında bunu öz üzərinə götürüb. Odur ki, onunla bağlı Cinayət Məcəlləsinin bir neçə maddəsi üzrə (“Terrorçuluq”, “Qətl” və s.) cinayət işi başlanılaraq axtarışa verilib.
İdarə rəisi həmçinin bildirib ki, Azərbaycan və Ermənistan terrorizmlə mübarizə haqqında beynəlxalq konvensiyanı ratifikasiya edib: “İstənilən hüquqi dövlət terrorizmə görə axtarışda olan şəxsi saxlamağa və konvensiyanın tələblərinə əməl etməyə borcludur. Araik Arutunyan qısa müddətdə istintaqa təhvil veriləcək və o, məhkəmə qarşısına çıxarılacaq”.
Yəni Araik İrəvana gedərsə, hətta Ermənistan da onu tutub bizə təhvil verməyə borcludur. Çünki beynəlxalq öhdəliyi var. Amma biz, əlbəttə, sadəlövh deyilik. Erməni qatı cani olsa belə, onu bizə təhvil verməz. O halda Araikin istintaqa canlı olaraq cəlb edilməsi necə baş tuta bilər?
Erməni mediası da iddia edir ki, qondarma rejimin rəhbəri Araik Arutunyan tezliklə həbs ediləcək: “Azərbaycan hüquq-mühafizə orqanları Araik Arutunyanı tez bir zamanda həbs etmək niyyətindədir. Bakı Arutunyanı Gəncəyə raket hücumunda ittiham edir. Qeyd edək ki, Araik Arutunyan Ermənistan və “Artsax”dan Azərbaycan tərəfindən beynəlxalq axtarışa verilən yeganə şəxs deyil. Belə insanların sayı 300-ü ötür. İndiyədək İlham Əliyevin sərəncamı ilə Ermənistanın 300-ə yaxın vətəndaşı, o cümlədən yüksək vəzifəli şəxslər barəsində beynəlxalq axtarış elan edilib. Ermənistan Prokurorluğu nə edib? Əvvəla, o 300 nəfərin kim olduğunu bilmirik və insanlar sadəcə olaraq hüquq-mühafizə orqanlarının tələsinə düşə bilərlər. Özəl mənbələrdən aldığımız məlumata görə, Rusiya Araik Arutunyanı Azərbaycan hüquq-mühafizə orqanlarına təhvil verməyə razılaşıb. Məhz buna görə fevralın 13-də İrəvana getmək istəyən Araik Arutunyan Laçin koridorundan geri qaytarılıb”.
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, Araik Arutunyanın məsuliyyətə cəlb edilməsilə bağlı vacib hüquqi prosedurlar həyata keçirilib: “Onunla bağlı cinayət işi qaldırılıb. Həmin adam canlı yayımda ağır cinayət törətdiyini etiraf edib. Gəncəyə raket hücumu nəticəsində mülki şəxslər ölüb. Etiraf cinayətin törədilməsinə dair ən mötəbər sübut sayıla bilər. Araik də bunu etiraf edirsə, deməli, qalır onu burbaşa məsuliyyətə cəlb etmək. Təbiidir ki, onun özü könüllü gəlib istintaqa təhvil verilməyəcək. Onu məcburi gətirmək lazımdır. Bunun da yolları var. Azərbaycan tərəfi onunla bağlı beynəlxalq axtarış elan edib. Araik istənilən ölkəyə gedəcıyi halda, onun həbs edilərək Azərbaycana verilməsini təmin etmək lazımdır. Onun tez-tez Rusiyaya səfər etməsilə bağlı məlumatlar yayılır. Rusiya ilə bizim aramızda qarşılıqlı ekstradisiya ilə bağlı öhdəlik var. Mütləq mənada belə bir cinayətkarın bizə təhvil verilməsi təmin olunmalıdır. Ən asan yolu isə sülhməramlıların bunu təmin etməsindən keçir. Bu addımı atmaq birbaşa onların missiyasına aiddir.
Başqa bir yolu isə, Azərbaycanın xüsusi əməliyyatla Araiki ələ keçirməsindən keçir. İstənilən halda, ortada Araiki məsuliyyətə cəlb etməklə bağlı möhkəm iradə var. Hiss edilir ki, Baş Prokurorluğun yeni rəhbərliyi bu işlərin üstündə daha intensiv çalışır”.
Məhəmmədəli QƏRİBLİ
