Azərbaycan Baş Prokurorluğunun Qarabağ separatçılarının rəhbəri Araik Arutunyanla bağlı son açıqlamaları erməni tərəfində böyük xof yaradıb. Belə görünür ki, Arutunyanın istintaqa cəlb ediləcəyi ilə bağlı səslənən fikirlər Qarabağda separatçıların narahatlığını daha da artıracaq.
Xatırladaq ki, Baş Prokurorluğun İstintaq İdarəsinin rəisi Nemət Əvəzovun sözlərinə əsasən, Araik Arutunyanın və digərlərinin tutularaq istintaqa cəlb edilməsi təmin olunacaq: “Ümid edirik ki, qısa müddətdə cinayət törətmiş hər bir şəxsin, o cümlədən Araik Arutunyanın və digərlərinin tutularaq istintaqa cəlb edilməsi təmin olunacaq”. Nemət Əvəzov bildirib ki, Vətən müharibəsi zamanı Gəncə şəhərinə 4 dəfə terror hücumu olub, özünü qondarma rejimin "prezident"i kimi təqdim edən Araik Arutunyan sosial şəbəkə hesabında bunu öz üzərinə götürüb. O qeyd edib ki, buna görə də onunla bağlı Cinayət Məcəlləsinin dövlətə xəyanət və digər maddələri ilə cinayət işi başlanılaraq axtarışa verilib: “İstintaq hərəkətləri davam edir. Qısa müddət ərzində əməliyyat və kəşfiyyat qurumları tərəfindən onun məhkəmə baxışına çıxarılması təmin ediləcək”.
Azərbaycan Baş Prokurorluğunun fevralın 15-də yaydığı bəyanatda isə deyilir: “Gəncəyə olan hücum nəticəsində 26 şəxs qətlə yetirilmişdir. Araik Arutunyan öz “tvitter” hesabında bu hücumu təşkil etdiyini bəyan etmişdir. Bu sübutlar əsasında Arutyunyanın təqsirləndirilən şəxs kimi Cinayət Məcəlləsinin 214 (terrorçuluq), 120 (qəsdən adamöldürmə) və digər maddələri ilə məsuliyyətə cəlb edilməsi barədə qərar verilmişdir”. Bəyanatda daha sonra bildirilir ki, Azərbaycan və Ermənistan terrorçuluğa qarşı mübarizə ilə bağlı beynəlxalq konvensiyanı ratifikasiya edib və istənilən hüquq dövləti terrorçuluğa görə axtarışa verilmiş şəxsin tutulmasına və konvensiyanın tələblərinə riayət etməyə borcludur. Bu bəyanat və açıqlamalar fonunda Qarabağda separatçıların liderlərindən David Babayan deyib ki, onlar Azərbaycan hüquq-mühafizə orqanlarından separatçıların başçısı Araik Arutyunyanın ən qısa müddətdə saxlanacağına dair heç bir müraciət və ya sorğu almayıblar: “Azərbaycan xof yaratmaq istəyir və istisna olunmur ki, onlar hansısa bir şəkildə Qarabağ “məmurlarına” xətər yetirsinlər, onlara hücum etsinlər”. “Azatutyun” radiosunun “bu barədə Rusiya tərəfindən hər hansı sorğu olubmu və Azərbaycanın Araik Arutyunyan niyə indi yadına düşüb” sualına Babayan belə cavab verib: “Düşünürəm ki, burda Rusiya tərəfini yada salmaq düzgün deyil, bu, Azərbaycanın siyasətinin bir hissəsidir. Bilirsiniz, axtarışda olan adamlar var. Mən də axtarışdayam. Mən Arutunyandan sonra ikinciyəm”. David Babayan daha sonra narahatlığını bildirib ki, Rusiya sülhməramlılarının missiyası uzadılmasa, çətinliklər yarana bilər: “İki-üç il ərzində bizim ümid etdiymiz kimi Rusiyanın sülhməramlı missiyası uzadılmasa, onlar müxtəlif cür təxribatlara əl atacaqlar. Təxribatlardan biri də, hər şeydən göründüyü kimi, bu üsullarla kiməsə ziyan vurmaq, hətta həyatına təhlükə yaratmaq, kimisə tutmaq, oğurlamaq, göz qarşısında alçaltmaq olacaq. Başqa sözlərlə, bu təbiidir və gözləniləndir, bunda təzə nəsə yoxdur”. “Azatutyun”un Azərbaycanın bu məsələdə vasitəçilik üçün Rusiya tərəfinə müraciət edib-etməməsi barədə sualına Babayan belə cavab verib: “Yox belə bir şey ümumiyyətlə ola bilməz, bu onların təşəbbüsüdür. Amma əlbəttə, elə ölkələr var ki, məsələn, Türkiyə onları dəstəkləyir. Türkiyədə, onların müttəfiqi olan bir sıra başqa ölkələrdə də bizi eyni təhlükələr gözləyir”.
Bu arada onu da qeyd edək ki, hazırda Qarabağda separatçıların fəaliyyəti postmünaqişə dövründə gedən müsbət proseslərdə əngəllərin yaranmasına, üçtərəfli sazişin məlum müddəalarının pozulmasına yönəlib. Elə bu fonda Rusiya sülhməramlılarının iştirakı ilə Azərbaycan ordusunun burada antiterror əməliyyatı aparmasının mümkünlüyü barədə fikirlər səslənir. Çünki Qarabağdakı silahlı erməni qüvvələri mahiyyət etibarı ilə terrorçudurlar və buna görə də onlara qarşı antiterror əməliyyatının aparılması zəruridir. Bu durumda o da maraqlıdır ki, Qarabağ erməniləri arasında da Araik Arutunyana münasibət birmənalı deyil. Ermənistanın “Qraparak” nəşri bu xüsusda yazır: “Qarabağda tədbirlərin təşkili ilə məşğul olan komissiya fevralın 20-də Xankəndinin “İntibah meydanı”nda böyük mitinq təşkil etməyi planlaşdırıb. Lakin məlum olub ki, qondarma qurumun “rəhbər”i Araik Arutunyan yuxarıda qeyd olunan toplantını qadağan edib. Əldə etdiyimiz məlumata görə, qadağaya səbəb Araik Arutunyanın mitinqin onun istefasını tələb edən hərəkata çevriləcəyindən qorxması olub. Hətta belə razılıq əldə olunub ki, mitinq “ictimai təşkilatlar” səviyyəsində təşkil olunsun, heç bir siyasi qüvvə mitinqin təşkilinə və keçirilməsinə qarışmasın, siyasi çıxışlar olmasın. Lakin görünür, Araik Arutunyan sakitləşməyib və təşkil olunmuş mitinqi şəxsən qadağan edib. Daha sonra komissiyanın iclası keçirilib. Məsələ qızğın müzakirəyə çevrilsə də, dayandırılıb, hələlik yekun qərar verilməyib. Yığıncağın qadağan edilməsinin “rəsmi” səbəbi koronavirusa yoluxma hallarının artmasıdır, lakin fevralın 10-dan bu yana saylar azalıb”.
Nahid SALAYEV
