Rusiya Dövlət Duması Ukraynanın Donbass bölgəsinin separatçı “respublikaları”nın (“Donetsk və Luqansk Xalq Respublikaları”) müstəqilliyinin tanınması ilə bağlı Prezident Vladimir Putinə müraciət qəbul edib. Bu barədə TASS məlumat yayıb.
Məlumatlara görə, bir müddət əvvəl Kommunist Partiyasından olan deputatlar Dumanın Rusiya Prezidentinə müraciət layihəsində Vladimir Putindən öz müstəqilliyini elan etmiş “Donetsk və Luqansk Xalq Respublikaları”nın müstəqil dövlət kimi tanınması məsələsini nəzərdən keçirməyi, habelə bu qurumlarla danışıqlar aparmağı xahiş edib.
“Çox güman ki, Putin də bu müraciəti təsdiqləyəcək”
Aydınlar Partiyasının sədr müavini Qorxmaz İbrahimli “Bakı-Xəbər”ə bildirdi ki, bu, Rusiya prezidentinin öz təşəbbüsüdür, sadəcə bunu Dumanın əli ilə edir. “Bu, Rusiya Dövlət Dumasının müraciəti deyil, onlar Putinin tapşırığı ilə bu müraciətdə bulunublar. Çox güman ki, Putin də bu müraciəti təsdiqləyəcək, burada başqa bir şey yoxdur. Yəni Rusiya Ukraynanın, Azərbaycanın, Ermənistanın, Moldovanın, Qazaxıstanın, hətta Türkmənistanın belə daxili işlərinə qarışmaqda davam eir. O cümlədən də Ukraynanın bir neçə yerdən ərazisini işğal edib, onu qanuniləşdirmək istəyir. Bilirsiz ki, dünən Almaniyanın prezidenti Ukraynaya gəldi, bu gün də, səhv etmirəmsə, Rusiyaya gedib. Rusiyanın qarşısında qoyulan məsələ çox ciddidir. Rusiya özünü ərköyün uşaq kimi aparır. Niyə? Çünki Qərb dövlətləri ikiüzlü siyasət yürüdürlər. O cümlədən də Almaniya, Fransa. Fransa prezidenti də Moskvaya gəldi. Qərbin ikiüzlü siyasətinin nəticəsində Ukraynanı bir az təhlükə gözləyir. Amma nə yaxşı ki, İngiltərə ortaya qəti mövqe qoyub. Baltikyanı ölkələri, Polşanı alqışlayıram, çünki hər zamankı kimi onlar Rusiyanı Avropadan daha yaxşı tanıyırlar. Vəziyyət olduqca kritikdir, Putin də özünü ərköyün uşaq kimi aparmaq istəyirdi. Dünən ABŞ-ın sərt bəyanatını müdafiə naziri və xarici işlər naziri ilə birgə müzakirə edən Putin vəziyyətin ağır olduğunu anladı, belə bir gediş edir. Bu da indi siyasətdə atılan addımlardır. Necə ki, bir yanda özünə şamanlara dua etdirir, qurban kəsdirir, qartal kəsdirir, bu siyasəti yürüdür. Başqa tərəfdən, gerçək siyasətin içində Putin istəyir ki, Rusya Dövlət Dumasının əli ilə Ukraynanın ərazisində yaranmış “respublikaların” müstəqilliyini tanısın”.
Q.İbrahimlinin sözlərinə görə, biz bunu Gürcüstan məsələsində də görmüşük. Rusiyanın Ukrayna ərazisində yaradılmış qondarma respublikaları özünə birləşdirmək niyyətinin olub-olmadığına gəlincə, Q.İbrahimli dedi ki, bu hələ yoxdur. Onun qeyd etdiyinə görə, Rusiya Qarabağda bir qrup separatçını ona görə saxlayıb ki, istədiyi vaxt oradan Azərbaycana təzyiq etsin: “Biz 2020-ci ilin noyabrında ona görə etiraz etmişdik ki, Rusiyanı Azərbaycan ərazisinə buraxmaq olmazdı. Bu dövlət təhlükəlidir, bu imperiya şər imperiyasıdır, heç bir demokratiyanı, heç bir ədaləti, xalq azadlığını qəbul etmir, etməyəcək də” - deyə Q.İbrahimli qeyd etdi.
İradə SARIYEVA
