Fevralın 14-də AMEA Rəyasət Heyətinin iclası keçirilib. Qurumdan verilən məlumata görə, iclasda AMEA-nın prezidenti, akademik Ramiz Mehdiyev və Rəyasət Heyətinin digər üzvləri iştirak edib. İclası giriş sözü ilə açan akademik Ramiz Mehdiyev yaşı ilə əlaqədar AMEA-dakı postunu tərk etməyə qərar verdiyini bildirib: “Akademiya böyük yol keçib və daim dövlətin yanında olmalıdır. Alimlərimizin fəaliyyəti də bu yöndə olmalı, bütün işlər dövlət siyasətinə uyğun qurulmalıdır”.
Akademiya prezidenti istefa ərizəsi ilə dövlət başçısına müraciət edəcəyini bildirib. Akademik Ramiz Mehdiyev iki il dörd ay ərzində birlikdə çalışdığı Rəyasət Heyəti üzvlərinə təşəkkür edib.
Qeyd edək ki, 84 yaşlı R.Mehdiyev 23 oktyabr 2019-cu ildən AMEA-nın prezidenti vəzifəsində idi. Ramiz Mehdiyevin fəaliyyəti yalnız AMEA ilə bağlı olmayıb. O, uzun müddət geniş səlahiyyətlərə malik olan Prezident Administrasiyasına rəhbərlik edib. Onun fəaliyyətilə bağlı birmənalı münasibət yoxdur. Onun fəaliyyət dönəmi ciddi tənqid edilir. Maraqlıdır, Mehdiyevin demokratik, sivil Azərbaycan dövlətçiliyinə hansı zərbələri vurması ilə bağlı ekspertlər nə düşünür?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, hazırda Ramiz Mehdiyev barədə hər kəs tənqidi fikir səsləndirir: “Bəzən bunu edənlərin addımları süni görünür. Biz Ramiz Mehdiyevin idarəetmə dönəmində yaşamışıq və onun əməllərindən birbaşa əziyyətlər çəkmişik. Demokratik cameənin, ölkənin siyasi təşkilatlarının, azad mediasının qarşısında bir baryer olub. Demokratik, azad seçkilərin keçirilməsini istəməyib. Biz onunla həmin vaxt mübarizə aparmışıq. Bunu sübut edən yazılarımız, müsahibələrimiz var. Heç nədən çəkinmədən ən sərt formada etirazlarımızı bildirmişik. İndiki halda da biz onu tənqid etməkdə haqlıyıq. Ancaq elə adamlar var ki, zamanında Mehdiyevə olmazın tənqidlərini yağdırıblar, indi onu tənqid edirlər. Araşdırın, görün parlamentdə olan partiya sədrləri Ramiz Mehdiyevə hansı tərifli epitetləri yağdırıblar. Eləsi var ki, ona Şərq müdrikü, Qərb soyuqqanı, dahi filosov deyib, indi də onun atəşli tənqidçisinə çevrilib. Ramiz Mehdiyevin fəaliyyəti yalnız AMEA kontekstindən qiymətləndirilməməlidir. AMEA-ya cəmi iki ildir gəlib. Siyasi sistemi fəlakətə uğradan bu adamdan elmdə hansı yeniliyi gözləmək olar? O, beton təfəkkürün təmsilçisidir. Azərbaycanın inkişafı üçün elm iqtisadiyyata tətbiq edilməlidir. Bunun üçün yenilikçi adam olmalıdır. Belə bir adamın elm ocağına rəhbərlik etməsi doğru deyil. Deyib ki, istefa verir, ancaq bu gün işə çıxdığı bildirilir. Prezident tərəfindən onun istefasının qəbul edilməsilə bağlı heç bir xəbər yoxdur. Zaman onun getməsini tələb edir”.
Məhəmmədəli QƏRİBLİ
