Azərbaycan Prezidenti İlham Əliyev və Türkiyə Cumhuriyyətinin Prezidenti Rəcəb Tayyib Ərdoğan Şuşa Bəyanatını təsdiqlədikdən sonra Qarabağda yaşayan separatçıların kürkünə birə düşüb, quyruğu yanmış siçan kimi sağa-sola vurnuxurlar.
Yayılan məlumatlara görə, hazırda separatçılar qondarma “konstitusiya islahatları”na başlayıb və qondarma “parlament və prezident seçkilərinə” hazırlaşır. Qondarma “seçkilər” müharibədən sonra 2022-ci ilə qədər “ təxirə salınmışdı”.
Separatçılar “seçkiyə” hazırlaşdıqlarını açıqlayır, Rusiya sülhməramlı kontingenti isə buna seyrçi qalır.
“Orada hər hansı bir hərəkətin, “seçki” oyunlarının, “qanun islahatlarının” həyata keçirilməsi birbaşa Azərbaycana qarşıdır”
Məsələyə şərh verən Qarabağ Azadlıq Təşkilatının (QAT) sədri Akif Nağı “Bakı-Xəbər”ə bldirdi ki, hələ də Rusiya sülhməramlılarının gözləri qarşısında ermənilər oyunlarını davam etdirirlər. O qeyd etdi ki, istər Xankəndidə olan separatçılar, istərsə də Ermənistan rəhbərliyi oyunbazlıqla məşğul olur: “Separatçılar, eləcə də Ermənistan höküməti oyunbazlıqla məşğul olur. Paşinyan belə təsəvvür yaratmaq istəyir ki, hələ də Xankəndidə hansısa “hakimiyyət” var və guya separatçılara Ermənistanın təsir imkanları yoxdur. Bunlar hamısı yalandır. Ermənilər özlərinin müəyyən istəklərinə nail olmaq üçün bu cür vasitələrdən istifadə edirlər. Separatçılar guya müstəqil şəkildə “seçkilər”, “islahatlar” keçirmək barədə “qərar” qəbul edirlər. Bunların qarşısı birmənalı olaraq Azərbaycan hakimiyyəti tərəfindən alınmalıdır. Azərbaycan hakimiyyəti məsələyə kompleks yanaşmağı tələb etməlidir. Guya ki, danışıqlar gedir, hansısa məsələləri müzakirə edirlər, Paşinyan özünü kompromisə və məsələlərin nizamlanmasına tərəfdar kimi göstərir. İstər Zəngəzur dəhlizi, istər delimitasiya, istərsə də digər məsələlərlə bağlı konstruktiv olduğunu göstərir. Son çıxışlarından birində Azərbaycanın tələblərinə uyğun mövqe açıqladı. Bir tərəfdən, Azərbaycanla sülh bağlamaq istədiyini deyir, o biri tərəfdən isə Xankəndidə oyunlar davam edir. Artıq aydın şəkildə görünür ki, bu tərəfdə Azərbaycanla danışıqlar görüntüsü yaradırlar, o biri tərəfdən isə Xankəndidəki separatçı, quldur dəstəsinə dəstək verir. Separatçıların bu cür əl-qol açmaq istəməsində birbaşa Ermənistanın məsuliyyəti var. Azərbaycan məsələni konkret şəkildə qoymalıdır. Orada hər hansı bir hərəkətin, “seçki” oyunlarının, “qanun islahatlarının” həyata keçirilməsi birbaşa Azərbaycana qarşıdır. Azərbaycanın istəklərinə qarşıdır və reallığın ziddinədir”.
A.Nağının sözlərinə görə, orada Azərbaycan hakimiyyəti bərqərar olmursa, onda danışıqların heç bir mənası yoxdur. Azərbaycan mövqeyini aydın şəkildə ortaya qoymalıdır. “Separatçıların oyunbazlıq etməyə qalxmasında həm Rusiyanın, həm də Ermənistanın məsuliyyəti var. Hər ikisi məsuliyyət daşıyır. Azərbaycanın ərazisində müvəqqəti olaraq Rusiya sülhməramlıları yerləşib və onlar birbaşa orada gedən proseslərə cavabdehdilər, məsuliyyət daşıyırlar. Ona görə də, Azərbaycan Rusiyadan tələb etməlidir ki, Xankəndidə bu kimi qanunsuzluqların qarşısı birmənalı olaraq alınsın. Separatçıların oradakı davranışlarına baxanda açıq görsənir ki, Rusiya və Ermənistan özlərinin Azərbaycana qarşı məkrli planlarını həyata keçirmək üçün addım atmağa, vəziyyətdən sui-istifadə etməyə çalışırlar. Azərbaycan məsələni kəskin qoymalıdır ki, əgər oradakı proseslər Azərbaycan hakimiyyətinin o ərazidə bərqərar olunmasına xidmət etmirsə, orada Rusiya sülhməramlılarının qalmasına heç bir ehtiyac yoxdur. Ermənistanla da hər hansı bir danışığın mənası yoxdur. Bilirsiz ki, Azərbaycan, Ermənistan və Rusiya dövlətlərinin baş nazirlərinin müavinlərinin təmsilçiliyi ilə kommunikasiyaların açılması yönündə bir işçi qrupu fəaiyyət göstərir. Azərbaycan tərəfindən bu danışıqlar dayandırılmalıdır. Eyni zamanda bilirsiz ki, Ermənistan və Türkiyə arasında danışıqlar gedir…”
A.Nağı hesab edir ki, Ermənistan Azərbaycan və Türkiyə ilə münasibətləri gerçəkdən də yaxşılaşdırmaq istəyirsə, Xankəndidə özünü anormal aparan separatçı qüvvələrin qanunazidd davranışlarına yol verilməməlidir. “Birmənalı şəkildə Xankəndi və digər ərazilərdə Azərbaycan hakimiyyətinin bərpa olunması istiqamətində iş getməlidir. Rusiyanın qarşısına da konkret şəkildə məsələ qoyulmalıdır ki, bunun qarşısını alsınlar. Eyni zamanda Ermənistanla danışıqlarda da bu əsas şərt olaraq ortada olmalıdır ki, əgər doğrudan da proses münasibətlərin normallaşdırılmasına, sülh prosesinə, sərhədlərin delimitasiyanına doğru gedirsə, onda Rusiya da, Ermənsitan da Xankəndidə gedən proseslərə nəzarət etməlidir. Rusiya imkan verməməlidir ki, orada separatçılar qondarma, saxta proseslər həyata keçirsin. Heç bir halda bu prosesləri görməzliyə vurmaq olmaz. Çünki bu çox təhlükəli bir məsələdir”- deyə A.Nağı bildirdi.
İradə SARIYEVA
