Ermənistanda ciddi miqrasiya böhranı ilə bağlı yeni məlumatlar yayılıb. Bildirilir ki, əvvəlki illərdə də miqrasiya böhranı müşahidə olunub, amma İkinci Qarabağ müharibəsindən sonra ölkəni birdəfəlik tərk edən sadə ermənilərin sayı xeyli artıb.
“Joxovurd” nəşri yazır ki, təkcə rəsmi məlumatlara görə, ötən il 73 571 vətəndaş ölkəni tərk edərək geri qayıtmayıb. Ümumilikdə, ölkədən 762 min 792 nəfər gedib, onlardan 689 min 221-i geri qayıdıb. Qeyd edək ki, söhbət Ermənistan Respublikasının vətəndaşlarından gedir. Eyni zamanda, təkcə ötən ilin birinci yarısında 22 minə yaxın erməni Rusiya vətəndaşlığını qəbul edib. Bu, son 4 ilin mütləq rekordudur. Bundan başqa, ötən il 161 minə yaxın Ermənistan vətəndaşı "Green card" üçün müraciət edib: “İndi isə gəlin inqilabdan əvvəl və sonrakı dövrü müqayisə edək. Rəsmi məlumata görə, 2017-ci ildə 36,2 min insan Ermənistanı tərk edərək geri qayıtmayıb. Ötən il bu rəqəm 73,5 mindən çox olub. Elə "Green Card"la bağlı da oxşar vəziyyət yaranıb”.
Məlum olur ki, İkinci Qarabağ müharibəsindən sonra Ermənistandan miqrasiya səngimir. Əksinə, pandemiya ilə bağlı məhdudiyyətlər yumşaldıqdan sonra ölkədən gedənlərin sayı daha da artır.
“İndi onlar dərk edir ki, Azərbaycan öz ərazilərini azad etdiyi üçün əvvəlki kimi yaşaya bilməyəcəklər”
Məsələyə münasibət bildirən Aydınlar Partiyasının sədri Qulamhüseyn Əlibəylinin sözlərinə görə, Ermənistandan miqrasiyanın güclənməsi bu və ya digər dərəcədə müharibənin nəticələri ilə bağlıdır: “Hesab edirəm ki, Ermənistandan köçün güclənməsi Qarabağ müharibəsindəki məğlubiyyətlə bağlıdır. Müharibədə məğlubiyyətə uğramasaydılar, bu dərəcədə miqrasiya müşahidə olunmazdı. 2020-ci ildən sonra yaranan real geosiyasi vəziyyət buna öz təsirini göstərir. Məsələ ondadır ki, müharibəyə qədər ermənilər aşırı dərəcədə arxayın idilər. Hesab edirdilər ki, dünya onları müdafiə edəcək və müharibənin genişlənməsinə imkan verməyəcək. Nəticədə istədikləri kimi yaşayacaqlar. Bu arxayınçılığın nəticəsi idi ki, Ermənistandan, daha sonra Livandan və Suriyadan qanunsuz olaraq erməniləri işğal olunmuş ərazilərə köçürürdülər. Onların içində çoxsaylı terrorçular da var idi. Ancaq müharibənin nəticələri onların bununla bağlı gözləntilərinin tam əksinə oldu. İndi onlar dərk edir ki, Azərbaycan öz ərazilərini azad etdiyi üçün əvvəlki kimi yaşaya bilməyəcəklər. Çünki Ermənistanda inkişaf perspektivini görmürlər. Bu səbəbdən gələcək perspektivi ölkəni tərk etməkdə görürlər. Son vaxtlar Ermənistanın kommunikasiya xətlərinin açılması ilə bağlı verdiyi müsbət mesajlar da miqrasiyanı əngəlləyə bilmir. Çünki Ermənistan hakimiyyətinin Qərbin qarşısında götürdüyü öhdəlikləri yerinə yetirməməsi, Rusiya ilə zidddiyətli münasibətlər ölkədə qeyri-müəyyənliyə təkan verir. Bu da, öz növbəsində, miqrasiyaya təsir edir”.
Partiya sədri onu da əlavə etdi ki, belə vəziyyət Ermənistanda hələ bir müddət davam edəcək.
Vidadi ORDAHALLI
