Məlumdur ki, ötən ilin payızından Qərb ölkələri Rusiyanın Ukrayna ilə sərhədə canlı qüvvə və hərbi texnika cəmləşdirdiyini, bununla Rusiyanın bu ölkəni real işğal təhlükəsi olduğunu bəyan edirlər. İddialara görə, artıq 120 minə yaxın Rusiya əsgəri Ukrayna ilə sərhədlər yaxınlığında cəmləşib. O da qeyd olunur ki, Moskva çox yaxın vaxtlarda hücuma keçə bilər.
Son günlər ərzində bu xüsusda məlumatların sayı daha da artıb. CNN televiziyasına müsahibəsində ABŞ prezidentinin milli təhlükəsizlik üzrə köməkçisi Ceyk Sallivan qeyd edib ki, Vaşinqton hücumun istənilən gün başlana biləcəyini gözləyir: “Biz dəqiq tarixi qabaqcadan deyə bilmərik. Rusiya tərəfindən Ukraynaya hücum hər an başlaya bilər”. Bununla belə, siyasətçi qeyd edib ki, Ukrayna ətrafında eskalasiya yaxın həftələrdə, Olimpiya oyunları bitənədək başlaya bilər. ABŞ-ın NATO-dakı nümayəndəsi Culian Smit də bəyan edib ki, Vaşinqtonun məlumatına görə, Rusiyanın Ukraynaya qarşı hücumu ən yaxın vaxtda başlaya bilər: "ABŞ-da belə bir hiss var ki, vəziyyət indi çox narahatedicidir, çox təhlükəlidir və biz hesab edirik ki, yaxın günlərdə nəsə baş verə bilər. Rusiyanın sərhəddə 100 mindən çox əsgəri var, onlar Belarusa on minlərlə hərbçi yerləşdirib. Onlarda hücuma başlamaq üçün lazım olan hər şey var, hücum yaxın zamanlarda baş verə bilər. Putinin nə qərara gəldiyi barədə məlumatımız yoxdur, lakin müttəfiqlərimizi, ABŞ vətəndaşlarını və Ukraynanı xəbərdar etmək istəyirik ki, bir neçə günə hücum başlaya bilər". Bu arada xatırladaq ki, ABŞ prezidenti Co Bayden Rusiya dövlət başçısı Vladimir Putinlə telefonla danışıb. Söhbətdə Ukrayna ətrafında vəziyyət müzakirə olunub. Ağ Evin danışıqlardan sonra yaydığı məlumatda deyilir ki, prezident Bayden Putinə aydın şəkildə, Rusiya Ukraynaya qarşı yeni işğal qərarı verəcəyi halda, Vaşinqton və onun müttəfiqlərinin buna sərt cavab verəcəyini bildirib. Bayden qeyd edib: “Növbəti işğal geniş insan iztirablarına səbəb olacaq və Rusiyanın nüfuzunu zəiflədəcək”. Məlumatda daha sonra vurğulanır ki, Bayden Putinə açıq şəkildə bildirib ki, Birləşmiş Ştatlar müttəfiqləri və tərəfdaşları ilə tam koordinasiya şəraitində diplomatiyaya hazır olsa da, digər ssenarilərə də eyni dərəcədə hazırdır. Kremlin yaydığı məlumata görə isə, Putin Baydenə deyib ki, Qərb ölkələri Minsk razılaşmaları üzrə öhdəliklərini yerinə yetirmək üçün Ukraynaya lazımi təzyiq göstərmirlər. Moskva və Kiyev razılaşmaların təfsirində ciddi şəkildə fərqlənirlər, Rusiya isə ümumiyyətlə özünü münaqişə tərəflərindən biri kimi tanımaqdan imtina edir.
Bununla belə, son məlumatlara əsasən, Rusiya hərbi texnikanı Ukrayna ilə sərhədə yaxınlaşdırmağa davam edir. Əsasən 1-ci Qvardiya Tank Ordusunun bölmələrinin Voronej yaxınlığındakı poliqondan sərhədə qədər irəlilədiyi iddia olunur. Bundan başqa, Rusiya Milli Qvardiyasının (“Rosqvardiya”) Çeçenistanın Qroznı şəhərində dislokasiya olunmuş və Əhməd Kadırovun adını daşıyan 141-ci əlahiddə mexanikləşdirilmiş polku Ukrayna sərhədlərinə yeridilib. “Kadırov polku” formal olaraq “Rosqvardiya”nın tərkibində olsa da, əslində Çeçenistan rəhbəri Ramzan Kadırova tabedir. Almaniyanın "Spiegel" nəşri və bir sıra Britaniya mediası kəşfiyyat məlumatlarına istinad edərək, işğalın fevralın 16-da başlaya biləcəyini iddia ediblər. Moskva isə işğal planları ilə bağlı iddiaları rədd edir, qoşunlarının öz ərazisində hərəkət etmək hüququna malik olduğunu bildirir. Rusiya Xarici İşlər Nazirliyinin sözçüsü Mariya Zaxarova bunlar fonunda qeyd edir: “Hazırda ABŞ və Britaniyanın hərəkətləri ən təmiz formada müharibə təbliğatıdır. Bu təbliğat BMT Baş Assambleyasının 16 dekabr 1966-cı ildə 2200 A (XXI) saylı qətnaməsi ilə qəbul edilmiş Mülki və Siyasi Hüquqlar üzrə Beynəlxalq Paktla qadağandır. 20-ci sənədin birinci bəndinin maddəsində deyilir: “Bütün müharibə təbliğatı qanunla qadağan edilməlidir. Soyuq müharibə dövründə qəbul edilmiş Paktın vəzifəsi yalnız insan hüquqlarını qorumaq deyil, həm də bəşəriyyəti NATO ölkələrinin hərbi ritorikasının itələdiyi uçurumdan uzaqlaşdırmaq idi. Birləşmiş Ştatlar və Böyük Britaniya yarım əsrdir ki, saxladıqları vasitəni zibilxanalarından çıxarıblar. CNN, "Blumberq", Britaniya tabloidləri, media holdinqləri vasitəsilə idarə olunan isteriyaya dəstək verirlər. Öz ölkələrində ictimai rəyə təsir göstərirlər". Rusiyanın xarici işlər naziri Sergey Lavrov ABŞ dövlət katibi Entoni Blinkenlə telefon danışığı zamanı Rusiyanın Ukraynaya hücum etmək niyyətinin olmadığını bir daha bəyan edib. Lakin bununla belə, ABŞ rəhbərliyi vətəndaşlarına Ukraynanı tərk etməyi tövsiyə edib. Oxşar tövsiyələr Yaponiya, Böyük Britaniya və bir sıra Avropa ölkələri tərəfindən verilib. Qərb bəyan edir ki, Ukraynada hərbi cəhətdən Rusiya ilə üz-üzə gəlmək istəmir. Pentaqonun mətbuat katibi Con Kirbi bu xüsusda qeyd edib: “Rusiya Ukraynaya hücum edərsə, Amerika hərbi qulluqçuları bu ölkədə vuruşmayacaqlar. Co Bayden də aydın şəkildə bildirib ki, Amerika hərbi qulluqçuları Ukraynada vuruşmayacaqlar”. Onun sözlərinə görə, ABŞ qoşunlarından, hətta Amerika vətəndaşlarının Ukraynadan təxliyəsində də istifadə olunmayacaq: “Çünki bu, vəziyyəti “yeni səviyyəyə” gətirib çıxara bilər. Amerikalılar ölkəni hərbçilərin köməyi olmadan sərbəst tərk edə bilərlər. Bunun üçün infrastruktur, nəqliyyat və Ukraynadan gedən yollar var. Ukrayna ətrafında münaqişəni aradan qaldırmaq imkanları hələ tükənməyib, lakin vaxt getdikcə azalır”. Bu fonda Kanada hökuməti Ukraynada olan hərbçilərini digər Avropa ölkələrinə dislokasiya etməyə qərar verib. Bildirilir ki, dislokasiyanın səbəbi operativ şəraitinin gərgin olmasıdır. Yerdəyişmə edən hərbçilərin say tərkibi və gedəcəkləri ölkə barədə məlumat verilmir. Qeyd olunur ki, bunlar “Unifier” missiyası çərçivəsində Ukraynada xidmət aparan təlimatçılardır. “Unifier” missiyası çərçivəsində kanadalı təlimatçılar Ukrayna hərbçilərinə 2015-ci ildən hazırlıq keçirlər.
Nahid SALAYEV
