Yayılan məlumatlara görə, 35 ölkə öz vətəndaşlarına Ukraynanı tərk etməyi tövsiyə edib. Belə ki, Avstraliya, Belçika, Böyük Britaniya Almaniya, Yunanıstan, Danimarka, AB, İsrail, İordaniya, İraq, İspaniya, İtaliya, Kanada, Küveyt, Latviya, Litva, Hollandiya, Yeni Zelandiya, Norveç, BƏƏ, Polşa, Rumıniya, Səudiyyə Ərəbistanı, Şimali Makedoniya, ABŞ, Türkiyə, Finlandiya, Fransa, Monteneqro, İsveç, Estoniya, Cənubi Koreya, Yaponiya Ukraynadan öz vətəndaşlarını çıxarır.
Maraqlıdır ki, Azərbaycan, bu ölkələrdən fərqli olaraq, vətəndaşlarına belə bir çağırış etməyib.
Ekspertlər hesab edir ki, Azərbaycanın mövqeyi doğrudur və dövlətimiz bununla Ukraynanın yanında olduğunu, onun ərazi bütövlüyünü dəstəklədiyini ifadə edir.
“Bu, Azərbaycanın Ukraynaya bəslədiyi əsl dostluq münasibətinin göstəricisidir”
Siyasi ekspert Rövşən Rəsulov "Bakı-Xəbər"ə şərhində bildirdi ki, bir çox ölkələr çox tez vaxtda Ukraynada müharibə başlayacağını zənn edir. R.Rəsulovun sözlərinə görə, vətəndaşlarını Ukraynadan çıxaran ölkələr Ukraynaya öz münasibətlərini göstərirlər. "Bir çox ölkələr Ukraynanın müharibə ərəfəsində olduğunu düşünərək vətəndaşlarının "təhlükəsizliyini təmin etmək" adı ilə onları Ukrayna ərazisindən çıxarırlar. Hazırda bu ölkələrin öz vətəndaşlarını Ukraynadan çıxarması prosesi davam edir. Bu bir tərəfdən belə görsənir ki, həmin ölkələr öz vətəndaşlarının qayğısına qalır, lakin bu, o ölkələrin Ukraynaya etimadsızlığının, etibarsızlığının nümunəsi kimi də qiymətləndirilə bilər. Yəni həmin ölkələr bu addımı onunla əsaslandırmaq istəyirlər ki, hər an müharibə ola bilər və ona görə də öz vətəndaşlarının təhlükəsizliyini düşünərək bu addımı atırlar. Ümumiyyətlə, Ukrayna hər zaman Qərb, Avropa ölkələrinə, bütövlükdə dünya dövlətlərinə normal münasibət bəsləyib. Amma bu gün həmin ölkələrin Ukraynadan öz səfirliklərinin əməkdaşlarını, vətəndaşlarını çıxarması artıq onların dolayısı yolla Ukraynaya etibarsızlıqlarını nümayiş etdirməsidir. Digər tərəfdən, Qərb, Avropa ölkələri Ukraynaya silah tədarükü görürlər, həm də müdafiə xarakterli yardımlar göstərirlər. Bu da əslində Ukraynanı müharibəyə tərəf itələmək kimi başa düşülə bilər. Ümid edirik ki, proses daha ağır nəticələrə gətirib çıxarmayacaq. Yəni ki, müharibə olmayacaq. Qaldı ki, Azərbaycan vətəndaşlarının, ölkəmizin diplomatik nümayəndəliyinin, səfirliyinin əməkdaşlarının Ukraynadan çıxarılmamasına, orada qalmasına, bu, Azərbaycanın Ukraynaya bəslədiyi əsl dostluq münasibətinin göstəricisidir".
R.Rəsulov qeyd etdi ki, artıq Ermənistan və ermənilər öz əsl simalarını büruzə verməyə başlayıb. Ukraynada Azərbaycan diasporu ilə müqayisədə erməni diasporunun fəaliyyətinin daha geniş olduğunu deyən ekspert bildirdi ki, bir sıra erməni mənşəli ukraynalı oliqarxlar öz bizneslərini, bank hesablarını, pullarını birdəfəlik olaraq Qərb ölkələri banklarına köçürüblər. "Həmçinin erməni oliqarxlar özləri də Ukrayna ərazisini tərk ediblər. Halbuki, onlar çörəklərini Ukrayna torpağında qazanıblar. Təbii ki, bütün olanlar, hansı dövlətin necə rəftar etməsi Ukrayna dövlətinin, Ukrayna hökumətinin diqqətindədir. Ukrayna indi yaxşı görür ki, hansı ölkə ona həqiqi dostdur, hansı ölkə dost deyil, onu dar gündə qoyub qaçır. Azərbaycan öz sədaqətini hər zamankı kimi yenə də ifadə edir.
Azərbaycan, təbii ki, həmişəki kimi Ukraynanın ərazi bütövlüyünü tanıyır, dəstəkləyir, işğalçılıq niyyətində olan istənilən ölkənin hərəkətini pisləyir və öz sözünü deyir".
R.Rəsulovun sözlərinə görə, Azərbaycan da uzun illər işğaldan əziyyət çəkib və ərazilərimiz 30 il təcavüzkar Ermənistanın işğalında olub. R.Rəsulov deyir ki, baş verənlərdən sonra Ukrayna, Ermənistan da daxil olmaqla, bir sıra ölkələrlə əlaqələrini yenidən nəzərdən keçirməli olacaq. “Ümid edək, müharibə baş verməyəcək. Kiçik toqquşmalar ola bilər, amma bunun böyük müharibəyə çevrilməsini istisna edirəm"- deyə siyasi ekspert vurğuladı.
İradə SARIYEVA
