“Ermənistan tərəfi Azərbaycana meyit qalıqlarını qarışıq verib”. Bunu mətbuata Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi qrupu rəhbərinin müavini Eldar Səmədov deyib. O bildirib ki, bu, meyitlərin kütləvi məzarlıqlarda basdırıldığını sübut edir: “Beynəlxalq Qızıl Xaç Komitəsinin vasitəçiliyi ilə Azərbaycan tərəfinə bəzi meyit qalıqları qaytarılsa da, hazırda onların kimliklərinin müəyyənləşdirilməsi prosesi gedir. Meyit qalıqları, əsasən qrunt suları, yeraltı suların keçdiyi ərazilərdən götürülüb. Ona görə də bu meyit qalıqlarından DNT nümunələri əldə etmək çox çətindir. Oradakı meyit qalıqlarının sayının nə qədər olacağı ilə bağlı son mərhələdə dəqiq məlumat olacaq”.
Məlumat üçün bildirək ki, Ermənistanın Baş naziri Nikol Paşinyan parlamentdəki çıxışında son bir ildə Ermənistanın Azərbaycan tərəfinə Birinci Qarabağ müharibəsi zamanı itkin düşmüş 108 nəfərin meyitinin qalıqlarını təhvil verdiyini deyib. O, yaxın günlərdə daha 2 meyitin qalığını təhvil verməyə hazırlaşdıqlarını da vurğulayıb.
Ermənistan tərəfi bununla bir daha sübut etdi ki, üzərinə götürdüyü öhdəliyi birmənalı olaraq pozur. Bunun olduqca mənfi hal olduğunu deyən ekspertlərin sözlərinə görə, ortaya çıxarılan faktlar Ermənistanda azərbaycanlıların meyitinə qarşı hansı vəhşiliklər edildiyini göstərir. Ermənisan kütləvi məzarlıqların açılması ilə bağlı üzərinə götürdüyü öhdəliyi pozduğunu deyən ekspertlər hesab edir ki, Ermənistan bu cür davranış nümayiş etdirməklə Birinci Qarabağ müharibəsində taleyi nəməlum olan soydaşlarımızla bağlı informasiyaları ört-basdır edib öz cinayətlərini gizlətmək məqsədi güdür.
“Bu da Ermənistanın riyakar, Allahsız siyasətinin, beynəlxalq qanunlara məhəl qoymamasının, insanılığa xəyanətinin göstəricisdir”
Tanınmış hərbi eskepert Tərlan Eyvazov baki-xeber.com-a bildirdi ki, Ermənistan ilk dəfə deyil öz üzərinə götürdüyü öhdəlikləri pozur və onları yerinə yetirərkən ciddi yanlışlara yol verir. “Bizim Birinci Qarabağ müharibəsində 4 min nəfərə yaxın itkin düşən vətəndaşımız var. Düzdür, onların sayı barədə müxtəlif rəqəmlər səsləndirilir. İtkin düşənlərin tam əksəriyyəti həyatda yoxdur, müəyyən sənədlər əsasında aparılan müəyyənləşdirməyə görə onların az hissəsi yaşayır. O vətəndaşlarımızın orada olduğunu Ermənistan tərəfi boynuna almadı və geri qaytarmaqdan imtina etdi. Biz deyə bilmərik ki, o 4 min nəfərin hamısının meyitləri tam Ermənistanın nəzərəti altında ola bilər. Təbii ki, orada uçquna düşən də, bizim tərəfimizdə həyatını dəyişib gizlincə dəfn olunan da ola bilərdi və sair. Amma vətəndaşlarımızın tam əksəriyyəti Ermənistan hakimiyyətinin o vaxtkı rəhbərlərinin, məmurlarının, komandirlərinin əli ilə şəhid edilib və necə gəldi kütləvi məzarlıqda dəfn ediliblər. Təsəvvür edin, onları elə vəhşiliklə öldürüblər və hansı şəkildə kütləvi məzarlıqda basdırıblar ki, bu gün onların qalıqlarının DNT analizinin aparılmasında çətinlik yaranıb. Bunu qəsdən ediblər ki, biz bu məsələdə problemlə üzləşək”.
T.Eyvazovun sözlərinə görə, soydaşlarımız qətlə yetirildikdən sonra kütləvi məzarlıqlarda dəfn ediliblər. Onun dediyinə görə, məsələn, Xocalıda daha çox adam qətlə yetirilib və ermənilər də meyitlərə qarşı çox vəhşicəsinə davranıblar: “Əsir götürülən vətəndaşlarımızın da, ermənilərin özlərinin də etiraflarına görə, orada o qədər insan öldürülüb ki, meyitlərdən körpü düzəldib üstündən maşın sürürlərmiş. Bütün bu faktların hamısı ona dəlalət edir ki, Ermənistan tərəfi onların harada dəfn olunduğunu bilir və deyildiyi kimi, onlar tək-tək yox, bir yerdə kütləvi məzarlıqda basdırılıb. Torpaq ekskovatorla qazılmışdı və vətəndaşlarımız orada dəfn olunmuşdu. Ermənistanın bizim əsirlərin meyitlərinin qalıqlarını qarışıq verməsi ermənilərin bir toplum olaraq vəhşi xislətini, mahiyyətini göstərir. Bu həm də onu göstərir ki, Ermənistan, ermənilər bu əməllərinin onların beynəlxalq imicinə ziyan vuracağını düşündükləri üçün bu cinayəti boyunlarına alımırlar, guya bundan xəbərsizdilər. Amma bizim insanların Ermənistan tərəfində qalması istər Azərbaycanın müvafiq komissiyaları, istər beynəlxalq komissiyalar, institutlar tərəfindən qeydə alınıb. Bizim meyitlərin qalıqlarının verilməsindən uzun illər imtina edilməsi Ermənistan dövlətinin siyasi riyakarlığıdır. Bu gün isə azərbaycanlılara aid meyitlərin qalıqlarının bizə qarışıq verilməsi onu göstərir ki, Ermənistan siyasi riyakarlıq etməklə yanaşı, həm də öz öz üzərinə götürdüyü öhdəlikləri pozur”.
Azərbaycan dövlətinin öz öhdəliklərinə hər zaman sadiq olduğunu deyən T.Eyvazov bildirdi ki, Vətən savaşından sonra biz Ermənistanın 1709 nəfər meyitinin qalıqlarını təhvil vermişik. Bunu xarici işlər naziri Ceyhun Bayramovun da öz çıxışında bildirdiyini deyən T.Eyvazov bildirdi ki, Birinci Qarabağ müharibəsində Ermənistanın hucumları nəticəsində bizim meyitlərimiz o ərazilərdə qalmışdı, Vətən müharibəsində də ermənilər geri çəkildikcə onların meyitləri qalırdı. “Necə ola bilir ki, eyni proses getdiyi halda biz onların meyitlərini tapıb təhvil verə bilirik, amma Ermənistan tərəf istər o vaxt, istərsə də indi bizim israrlı tələblərə, beynəlxalq institutların vasitəsilə etdiyimiz müraciətlərə baxmayaraq bizim meyitləri vermədilər. İndi də verdikləri meyitlərin qalıqları elə bir vəziyyətdədir ki, onlardan DNT nümunələri götürmək çətin bir prosesə çevirilib. Bu da Ermənistanın riyakar, Allahsız siyasətinin, beynəlxalq qanunlara məhəl qoymamasının, insanılığa xəyanətinin göstəricisdir”- deyə T.Eyvazov vurğuladı.
İradə SARIYEVA
