Məlum olduğu kimi, Avropa İttifaqının vasitəçiliyi ilə aparılan danışıqlarda 8 erməni diversantın qaytarılması müqabilində Ermənistan tərəfi Birinci Qarabağ müharibəsi zamanı azərbaycanlılara aid kütləvi məzarlıqların yerini bildirəcəyi öhdəliyini götürüb. Qeyd edək ki, Birinci Qarabağ müharibəsində 3890 Azərbaycan vətəndaşı itkin düşüb.
Ancaq görünən odur ki, Ermənistan razılaşmanı pozmaq üçün müxtəlif təxribatlara əl atır. Razılaşmadan sonra Ermənistan XİN rəsmisi Vahan Unanyan bəyan etdi ki, ölkəsi bununla bağlı birtərəfli öhdəlik götürməyib. İndi də bir neçə il əvvəl Qırmızı Xaçın təşəbbüsü ilə keçirilən konfransda Ermənistanı təmsil edən, 1990-cı illərdən itkinlərin və əsirlərin problemi ilə məşğul olan Larisa Alaverdyan bəyan edib ki, itkin düşənlərlə bağlı Azərbaycan tərəfinin təqdim etdiyi rəqəmlər dəqiq deyil və şişirdilib. Üstəlik həyasızcasına qeyd edib ki, Birinci Qarabağ müharibəsində Azərbaycan tərəfi öz cəsədlərinə sahib çıxmırdı: “Onlar 6.5 min nəfər rəqəmindən tədricən 4 min rəqəminə endilər və dayandılar. Sonradan siyahılara nə qədər düzəliş verilsə də xeyli dəqiqsizliklər qalır. Azərbaycan tərəfindən bir çox komandirlər, hətta çağırışlardan sonra da cəsədləri götürməkdən boyun qaçırırdılar. O vaxt Daşaltıda gedən döyüşlərdə çox sayda azərbaycanlı həlak olmuşdu və onların cəsədlərini heç kim götürmürdü. Özünümüdafiə dəstələri gəlib bu cəsədlərin götürülməsi üçün nə qədər çağırış etsələr də onlar gəlmədilər”.
Maraqlıdır, bütün bu deyilənlər nə dərəcədə realdır?
“Ermənilər girov götürdükləri mülki vətəndaşlar, hərbi əsirlər barədə məlumatları gizlədirdilər”
Məsələyə münasibət bildirən Birinci Qarabağ müharibəsinin iştirakçısı, hərbi ekspert İbrahim Rüstəmlinin fkrincə, bütün bunlar Ermənistanın növbəti fitnəkarlığıdır: “O vaxt Azərbaycanın öz meyitlərinə sahib çıxmaması ilə bağlı deyilənlər tamamilə absurd fikirlərdir. Bu, ermənilərin bizə qarşı növbəti iftirasıdır. Mən az-çox o hadisələrin şahidiyəm. Ermənilər girov götürdükləri mülki vətəndaşlar, hərbi əsirlər barədə məlumatları gizlədirdilər. Onları işgəncə yolu ilə qətlə yetirib cəsədlərini gizlədirdilər. Azərbaycan dəfələrlə itkin düşənlər barədə Ermənistana müraciət edib, amma qarşı tərəf hər dəfə bundan yayınıb. Haçan onlar Daşaltıda həlak olanların meyitlərinin götürülməsi ilə bağlı bizə müraciət edib? Bu, ağ yalandır. O zaman min bir əziyyətlə hərbçilərin cəsədlərini geri alırdıq. Ermənilər o qədər vəhşidilər ki, cəsədləri belə tanınmaz hala salırdılar. Atəşkəsdən sonra da Ermənistan meyitlərin qaytarılmasına maraq göstərmədi. İtkin düşənlər barədə məlumatlar vermədi. Ona görə də deyilənlərin heç biri həqiqəti əks etdirmir”.
Hərbi ekspert onu da qeyd etdi ki, Ermənistan belə təxribatçı addımlarla əldə etdiyimiz qələbəyə kölgə salmaq istəyir.
Vidadi ORDAHALLI
