“Zəngəzur dəhlizi təkcə dəmir yolu, avtomobil yolu, hava nəqliyyatlı üçün deyil, eyni zamanda, enerji növlərinin bu dəhliz üzərindən ixrac edilməsi ilə bağlı öz rolunu oynayacaq”.
Bunu Prezident İlham Əliyev AzərTAc-a müsahibəsində deyib.
Ölkə başçısının sözlərinə görə, Zəngəzur dəhlizi vasitəsilə Türkiyədən sonra Avropaya çıxmaq üçün yeni bir xəttimiz olacaq: “Bizim bütün dörd qonşu ölkə ilə, dediyim kimi, enerji bağlantıları var, yeni bir layihə üzərində biz indi işləyirik. Zəngəzur dəhlizi üzərindən Azərbaycandan Naxçıvan Muxtar Respublikasına, oradan isə Türkiyəyə və İrana yeni xəttin çəkilişi indi artıq planlarımızdadır və mən demişdim ki, Zəngəzur dəhlizi təkcə dəmir yolu, avtomobil yolu, hava nəqliyyatlı üçün deyil, eyni zamanda, enerji növlərinin bu dəhliz üzərindən ixrac edilməsi ilə bağlı Zəngəzur dəhlizi öz rolunu oynayacaq və Azərbaycanın ayrılmaz hissəsi olan Naxçıvan Muxtar Respublikasını elektrik enerjisi ilə təmin etmək üçün və oradan xarici bazarlara çıxmaq üçün və Türkiyədən sonra Avropaya çıxmaq üçün yeni bir xəttimiz olacaq. Bir xətt Gürcüstan-Türkiyə üzərindən keçir və ikinci xətt oradan keçməlidir. Bunun üzərində biz işləyirik və artan ixracımız həm önəmimizi artıracaq, geosiyasi önəmimizi artıracaq, eyni zamanda, bizə əlavə valyuta gətirəcək. Biz təkcə neftdən, qazdan yox, eyni zamanda, elektrik enerjisindən də valyuta qazanacağıq və ölkəmiz daha da firavan yaşayacaq”.
Məlum olduğu kimi, Azərbaycanın Avropa İttifaqı ilə enerji sahəsində əməkdaşlığı genişlənir. Ölkəmiz indiki şəraitdə enerji ixracını artırır. Avropa ölkələrinə qaz ixracının həcmi artırılacaq. Bu arada məlum olur ki, Zəngəzur dəhlizi vasitəsilə elektrik enerjisi də ixrac olunacaq. O da məlumdur ki, Rusiya ilə Qərb arasında qarşıdurma kəskinləşir. Maraqlıdır, Rusiya-Avropa qarşıdurmasıının davam etdiyi vaxta enerji ixracı Rusiya-Azərbaycan münasibətlərinə necə təsir edə bilər? Rusiya bunu sakit qarşılayacaqmı?
“Kreml istənilən vaxt Zəngəzur dəhlizinə müdaxilə edə bilər”
Məsələyə münasibət bildirən AMİP sədri Arzuxan Əlizadənin fikrincə, bütün bunlar Rusiya-Qərb münasibətlərinin yekun nəticəsindən asılı olacaq: “Prinsipcə, Rusiya Azərbaycanın Avropaya qaz ixracını artırmasında maraqlı deyil. Çünki bu ölkə əsas qaz ixracatçısıdır. Ancaq müəyyən amillər Rusiyanı kəskin addımlar atmaqdan çəkindirir. Başlıcası, Rusiya Türkiyə ilə münasibətlərini pisləşdirmək istəmir. Nəzərə almaq lazımdır ki. Rusiya iləTürkiyə arasında bir sıra sahələrdə əlaqələr var. Enerji ixracı ilə əlaqədar Azərbaycana yönəlik münasibət mənfi müstəvidə dəyişsə, bu, Türkiyə tərəfindən cavabsız qalmayacaq. Qərblə münasibətlərin gərgin olması fonunda Türkiyə ilə qarşıdurma Rusiyanın mənafeyinə uyğun deyil. Digər tərəfdən, Azərbaycanın Avropaya ixrac etdiyi və edəcəyi enerji resursları həcm baxımından o qədər də böyük deyil. Söhbət Rusiyanın ixrac etdiyi enerji resursları ilə müqayisədən gedir. Bir neçə il sonra Türkmənistan da Azərbaycan vasitəsilə qaz ixrac edəcəksə, bax o zaman Rusiya bir sıra təxribatlara əl atacaq. Nəzərə almaq lazımdır ki, Rusiyanın Ermənistanda hərbi bazaları var. Bu isə o deməkdir ki, Kreml istənilən vaxt Zəngəzur dəhlizinə müdaxilə edə bilər”.
Partiya sədri onu da əlavə etdi ki, Rusiya ilə Qərb arasında qarşıdurma səngiyəcəksə, enerji ixracı məsələsində risqlər azalacaq.
Vidadi ORDAHALLI
