Rusiyanın Ermənistandakı səfiri Sergey Kopırkin erməni mətbuatına masahibə verib. Müsahibədə bir sıra məqamlara toxunan S.Kopırkin qeyd edib ki, Rusiya tərəfinin səyləri Rusiya, Ermənistan və Azərbaycan liderlərinin bəyanatlarının bəndlərinin həyata keçirilməsini təmin etmək üçün lazımi şəraitin yaradılmasına yönəlib.
Bununla beılə, Rusiya səfiri ATƏT-in Minsk Qrupu ilə bağlı ziddiyətli fikirlər səsləndirib. Qeyd edib ki, Minsk Qrupu formatının potensialı humanitar xarakterli məsələlərlə bağlı tükənməyib: “Hərbi əsirlərin və həbsdə olan mülki şəxslərin geri qaytarılması məsələsinin həlli istiqamətində ardıcıl xətt aparılır. Rusiya tərəfinin vasitəçiliyi ilə ümumilikdə 127 Ermənistan vətəndaşı artıq evlərinə qayıdıb. Rusiya öz milli imkanları daxilində vasitəçilik səyləri ilə yanaşı, ATƏT-in Minsk Qrupunun həmsədri kimi bu səylərini davam etdirir. Görünür, bu formatın potensialı, o cümlədən, regionun qarşısında duran sosial-iqtisadi və humanitar vəzifələrin həlli kontekstində tükənməkdən uzaqdır. Vasitəçi kimi Rusiya müəyyən çətinliklərlə üzləşir ki, bu da mövcud tarixi imperativlərdən qaynaqlanır və əksər hallarda Ermənistanla Azərbaycan arasında münasibətləri müəyyən edir”.
Maraqlıdır, Rusiya səfirinin belə bir mübahisəli açıqlama ilə çıxış etməkdə məqsədi nədir? Humanitar məsələlər adı ilə Minsk Qrupunu diriltmək istəyirlər, yoxsa arxasında başqa nüanslar var?
“Bu o deməkdir ki, hər iki tərəfi təziq altında saxlamaqdan ötrü Minsk Qrupu Rusiya üçün bir vasitədir”
Sözügedən məsələ ilə bağlı fikirlərini “Bakı-Xəbər”lə bölüşən AMİP sədrinin müavini Afsəddin Nəbiyevin fikrincə, S.Kopırkin ikibaşlı danışmaqla demək istəyir ki, Rusiya Minsk Qrupunun fəaliyyətinin birdəfəlik dayanmasında maraqlı deyil: “Rusiyanın siyasətində Minsk Qrupu ilə bağlı belə bir təbliğat xeyli vaxtdır aparılır. Təbliğat ona hesablanıb ki, guya bölgədə Rusiya olmadan təhlükəsizliyi təmin etmək mümkün deyil. ATƏT-in Minsk Qrupunun adını bu prosesdə hallandırmaqla "dividend" qazanmağa çalışırlar. Vasitəçilik missiyası tərəflərdən birini müdafiə etməklə məşğul olursa, hansı sülh missiyasından danışa bilərik? Əlbəttə, bu mümkün deyil. Açıq şəkildə Rusiya tərəf nümayiş etdirərək, hər zaman erməniləri müdafə etməklə məşğuldur. Bunun adı tərəfsizlik deyil, əsl adı ermənipərəstlikdir. Rusiya bir tərəfdən Qarabağ məsələsində ABŞ və Fransanı oyundankənar saxlamağa çalışır, o biri tərəfdən Minsk Qrupundan da imtina etmir. Bu o deməkdir ki, hər iki tərəfi təzyiq altında saxlamaqdan ötrü Minsk Qrupu Rusiya üçün bir vasitədir. Humanitar missiyadan danışırlarsa, onda buyursunlar, onu öz əməllərində sübut etsinlər. Rusiya sülhməramlıları 30 il bundan öncə baş vermiş, dünyanı dəhşətə gətirən Xocalı soyqırımına aid memorial kompleksin Azərbaycanın iştirakı ilə yaradılmasını təşkil etsinlər. Deməli, bunu etmirlərsə rusların missiyası sülhməramlı deyil. Necə olur ki, Qarabağda bir ovuc erməniyə hər yerdə xatirə kompleksləri ucaldlrlar? Partiyamızın bu məsələ ilə bağlı rəsmi mövqeyi ondan ibarətdir ki, ATƏT-in Minsk Qrupundan birdəfəlik imtina olunsun. ATƏT-in Minsk Qrupu leksikonu hər bir Azərbaycan vətəndaşında qıcıq yaradır. Hesab edirəm ki, Rusiya belə münasibət sərgiləməklə Cənubi Qafqazda öz mövcudluğunu uzun müddətə saxlamağa çalışır”.
Bu baxımdan sədr müavini hesab edir ki, çalışmalıyıq, Rusiyanın bu planına imkan verməyək.
Vidadi ORDAHALLI
