Ermənistanda hüquq müdafiəçiləri və müxalifətçilər Avropa İttifaqının Ermənistandakı nümayəndəliyi qarşısında etiraz aksiyası keçiriblər. Etirazçılar Avropa İttifaqının Ermənistandakı missiyasının rəhbəri, səfir Andrea Viktorindən Ermənistanı tərk etməyi və ölkəyə ziyan vurmamağı tələb ediblər. Aksiyada qeyd edilib ki, Aİ pensiyaçı diplomatları Ermənistana göndərib.
Aksiyada çıxış edən Respublika Partiyasının sədr müavini Armen Aşotyan bildirib ki, Aİ Ermənistanda çox pis siyasət yürüdür: “Heç kim ümumbəşəri və Avropa dəyərlərinə xanım səfir qədər zərər vurmayıb. Aİ Ermənistanda son vaxtlar çox pis siyasət aparır: adamları burada səfir təyin edirlər, sonra təqaüdə göndərirlər. Hörmətli AB-dən olan həmkarlar, Ermənistan vasitəsilə öz keyfiyyətsiz kadrlarınızı “çıxdaş” etməyi dayandırın”.
O bildirib ki, səfirlər Avropa dəyərlərini və demokratiyanı təbliğ etmək əvəzinə bütün bunları məhv edirlər və Viktorin “kapitulyant hakimiyyət”in maraqlarına xidmət edir: “Niyə Aİ-nın icrasının Ermənistanda biabırçı vəziyyətdə olduğunu xalqdan gizlədirsiniz? Niyə gizlədirsiniz ki, Nikol Paşinyan hakimiyyəti dövründə 2013-cü ildə geri qaytarmağa söz verdiyi bütün islahatları həyata keçirmir? Xanım səfir, siz dəyişməyəcəksiniz - sizin Ermənistanda işiniz yoxdur. Bu aksiya Avropa dəyərlərinə zidd deyil, Avropa dəyərlərini və demokratiyanı sizdən qorumaq üçün nəzərdə tutulub. Daha yaxşı başa düşə bilməniz üçün ingiliscə deyəcəyik – “Go home!”.
Görünən odur ki, Ermənistanda Aİ əleyhinə kampaniyaya start verildi və bunun davamlı ola biləcəyi ehtimalı var.
Maraqlıdır, bütün bunlar nədən qaynaqlanır?
“Qurumun Azərbaycana yönəlik müsbət reveransları erməniləri məyus edib”
Məsələyə münasibət bildirən Demokratik Dəyişim Partiyasının Təşkilat Komitəsinin sədri Əli Mustafayevin fikrincə, Avropa İttifaqı əleyhinə aksiyanın keçirilməsi təsadüfi deyil: “Bunun arxasında əsasən iki amil dayanır. Başlıca amil Rusiya faktorundan qaynaqlanir. Çünki Ermmənistanda iqtidar və müxalifət eynirəngli deyil. İqtidar Qərbə meyllidir, əsas müxalif qüvvələr isə Rusiyapərəst mövqedən çıxış edir. Təsadüfi deyil ki, Aİ-yə qarşı mitinqdə Rusiyapərəst qüvvələr xüsusi fəallıq göstərib. Məqsəd odur ki, Qərb təsisatlarını Ermənistanda zəiflətsinlər. Bu minvalla Ermənistanı yenidən Rusiyaya bağlamaq istəyirlər. Nəzərə almaq lazımdır ki, Ermənistan üzərində ABŞ-Rusiya mübarizəsi davam edir. Çünki Kreml Ermənistanın Avroittifaqla əlaqələrinin dərinləşməsini istəmir. O üzdən, nə mümkündürsə onu edirlər. İkinci ehtimal son vaxtlar Aİ-nin Azərbaycana yönəlik marağının artması ilə bağlıdır. Çünki son vaxtlar Aİ-nin timsalında Azərbaycana yönəlik müsbət reveranslar erməniləri məyus edib. Söhbət ondan gedir ki, Azərbaycana qurum tərəfindən ediləcək yardımın məbləği əhəmiyyətli dərəcədə artırıldı. Əgər əvvəl 140 milyon avrodan söhbət gedirdisə, maliyyə paketinin həcmi 2 milyard avroya qaldırıldı. Bununla belə, Avroittifaq Rusiyadan qaz asılılığını azaltmaqdan ötrü Azərbaycanla təmasları artırıb. Bu isə o deməkdir ki, Azərbaycanın Aİ ilə əməkdaşlığını dərinləşdirməsi ermənilərin ürəyincə deyil. Aİ rəsmiləri də anlayır ki, Cənubi Qafqazda yalnız Gürcüstan və Ermənistanla yaxından əməkdaşlıq etmək onların maraqlarına uyğun deyil. Qaz məsələsinə görə Aİ Azərbaycana daha çox ehtiyac hiss edir. Bütün bunlar Ermənistanın maraqlarına uyğun deyil. Çünki onlar hələ də bizə düşmən gözü ilə baxırlar. Etirazların bir səbəbi də bu amillə bağlıdır”.
Bütün bunlara rəğmən, Ə.Mustafayev hesab edir ki, Ermənistanda Aİ tərəfdarları çoxdur.
Vidadi ORDAHALLI
