Məlum olduğu kimi, Ermənistanın Xarici İşlər Nazirliyi bəyanat yayaraq, Azərbaycan mədəniyyət naziri Anar Kərimovun məlum bir qərarının adını və mahiyyətini tam saxtalaşdıraraq azərbaycanlı naziri şərləyib. Ermənistan XİN-in bəyanatında deyilir ki, Anar Kərimov, guya “ermənilərin dini və tarixi-mədəni irsinin dəyişdirilməsi və məhv edilməsi üçün işçi qrup” yaradılması barədə qərar verib. Dünyanın qarşısında hay-küy qopardan erməni XİN bunu Azərbaycan tərəfdən “vandallıq” kimi qələmə verərək inanılmaz “mətləblər” səsləndirib.
Təbii ki, azərbaycanlı nazir erməni XİN- in iddia etdiyi formulda hər hansı qərar verməyib. Bununla bağlı Azərbaycanın rəsmi mövqeyi də var. Ancaq təəssüflər olsun ki, ABŞ-dakı müəyyən dairələr buna məhəl qoymayaraq erməni yalanlarının təsiri altına düşür və ona uyğun mövqe sərgiləyirlər. Məsələ ondadır ki, ABŞ Beynəlxalq Dini Azadlıqlar Komissiyasının (USCIRF) sədri Nadine Maenza Azərbaycan hökumətinə ibadət yerlərini, digər dini və mədəni obyektləri qoruyub saxlamağa dair çağırış edib. N.Maenza iddia edir ki, guya Azərbaycan 2020-ci ildə müharibə zamanı Bakının nəzarətinə keçən ərazilərdə yerləşən dini abidələrdə erməni yazılarını məhv edir. Guya bununla bağlı komissiya yaradılıb və A.Kərimov da ona rəhbərlik edir. USCIRF də bundan narahatdır: “Biz Azərbaycanın kilsələrdən erməni apostol yazılarını silmək planlarından dərin narahatıq. Biz hökuməti ibadət yerlərini, digər dini və mədəni obyektləri qorumağa çağırırıq”.
Maraqlıdır, Azərbaycan ermənilərin özlərindən uydurduqları belə bir işçi qrup yaratmadığı və bunu rəsmən bəyan etdiyi halda USCİRF niyə bu yalana ortaq olur?
“USCİRF məqsədyönlü şəkildə ermənilərin yalanlarına ortaq olur”
Məsələyə münasibət bildirən şərqşünas Seyid Camal Əzimbəylinin fikrincə, ABŞ Beynəlxalq Dini Azadlıqlar Komissiyasının sərgilədiyi mövqe sırf siyasi motivlifir: “Reallıq ondan ibarətdir ki, bunun dinlə heç bir əlaqəsi yoxdur. Problem ondadır ki, USCİRF məqsədyönlü şəkildə ermənilərin yalanlarına ortaq olur. Niyə? Ona görə ki, birinci dəfə deyil ABŞ Beynəlxalq Dini Azadlıqlar Komissiyası Azərbaycanla belə qərəzli yanaşma ortaya qoyur. Bundan əvvəl də bənzər çağırışlar səslənib. Guya xristian abidələri dağıdılır, onların üzərindəki yazılar saxtalaşdırılır və s. Halbuki, bununla bağlı heç bir sübut yoxdur. Azərbaycan daim dini mənsubiyyətindən asılı olmayaraq bütün dini-tarixi abidələri qoruyub və qoruyur. Dini abidələrin orjinallığını qorumaq üçün nə mümkündürsə onu edir. Azərbaycan əhalisinin əksəriyyətinin müsəlman olmasına baxmayaraq, burada tarixən formalaşmış kilsələr nəinki qorunur, o cümlədən təmir edilir. Zatən bununla bağlı çoxsaylı nümunələr var. Xristianlığın bütün cərəyanlarına aid olan abidələr qorunur. Ancaq işğaldan azad olunmuş ərazilərdə vaxtilə 67 məscid olub. İndi onlardan sadəcə 2-si qalıb. Digər məscidlərin hamısı məhv edilib. Belə olan halda niyə USCİRF bir dəfə də olsun Ermənistana öz etirazını bildirməyib? Qurum erməni lobbisinin sifarişlərinə uyğun olaraq Azərbaycanı ləkələməklə məşğuldur”.
Şərqşünas onu da əlavə edi ki, baş verənlər USCİRF-in obyektivlikdən uzaq təşkilat olduğunu bir daha sübut etdi.
Vidadi ORDAHALLI
