Milli Televiziya və Radio Şurası (MTRŞ) ləğv edilir, Audiovizual Şura yaradılır. Bu, Prezident İlham Əliyevin imzaladığı “Media haqqında” qanunun tətbiqi və bundan irəli gələn bir sıra məsələlərin tənzimlənməsi barədə fərmanda öz əksini tapıb.
Fərmana əsasən, Audiovizual Şura Milli Televiziya və Radio Şurasının hüquqi varisidir, onun öhdəlikləri və əmlakı Şuraya keçir, MTRŞ-nin səlahiyyət müddəti bitməmiş üzvləri həmin müddət bitənədək fəaliyyətlərini davam etdirirlər, Şuranın strukturu və işçilərinin say həddi təsdiq edilənədək MTRŞ-nin Aparatı fəaliyyətini davam etdirir. Şuranın strukturunun layihəsini və işçilərinin say həddinə (Milli Televiziya və Radio Şurası Aparatının işçilərinin say həddindən az olmayaraq) dair təkliflərini Maliyyə Nazirliyi ilə razılaşdırmaqla bir ay müddətində dövlət başçısına təqdim etməlidir. Nazirlər Kabinetinə iki ay müddətində Azərbaycan Respublikası Audiovizual Şurasının yaradılması ilə əlaqədar normativ hüquqi aktların uyğunlaşdırılması ilə bağlı təkliflərini dövlət başçısına təqdim etmək, Şuranın inzibati bina ilə təmin edilməsi və maddi-texniki təminatı məsələlərini bir ay müddətində həll etmək tapşırılıb.
Maraqlıdır, Audiovizual Şuranın MTRŞ-dan nə fərqləri olacaq? Ekspertlər bunu necə dəyərləndirir?
“Güman edirəm ki, yeni yaradılacaq qurumun fəaliyyəti effektli olacaq”
Məsələyə münasibət bildirən Demokratik Jurnalistlər Liqasının sədri, media eksperti Yadigar Məmmədlinin fikrincə, prinsipcə fərqlər olacaq: “Məsələ ondadır ki, MTRŞ-in ləğv edilməsi gözlənilən idi. Çünki bu, yeni qəbul olunan “Media haqqında” qanunun tələblərindən irəli gəlirdi. Söhbət ondan gedir ki, yeni qanunda radio-televiziya artıq keçmişdə qalmış bir media vasitəsi hesab olunur. Çünki indi internet mediası var, internet üzərindən televiziyalar, radiolar yayımlanır. Ona görə də, MTRŞ-dan fərqli olaraq, Audiovizual Şura bütün media vasitələrini özündə ehtiva edə biləcək. Bu baxımdan qurumun həm adı, həm də fəaliyyət sferası dəyişməli idi. Fikrimcə, bir neçə aya yeni qurum formalaşacaq, ondan sonra yeni üzvlər seçiləcək. Bu baxımdan güman edirəm ki, yeni yaradılacaq qurumun fəaliyyəti effektli olacaq. Orada təmsil olunanlar yeni tələblərə uyğun fəaliyyəti qura biləcəklər”.
Sözügedən məsələ ilə əlaqədar digər media ekspertlərinin fikirlərini öyrənmək istəsək də, bu mümkün olmadı.
Vidadi ORDAHALLI
