Belarusun Ermənistandakı səfiri Aleksandr Konyuk Ermənistan Xarici İşlər Nazirliyinə çağırılıb. Bu barədə məlumatı Ermənistan Xarici İşlər Nazirliyinin mətbuat katibi Vaan Unanyan təsdiqləyib. Lakin XİN sözçüsü səfirin nazirlikdə olmasının səbəbini açıqlamayıb.
Ancaq məlum məsələdir ki, bu, prezident Aleksandr Lukaşenkonun son bəyanatları ilə bağlıdır. Çünki Lukaşenkonun məlum açıqlamaları ilə bağlı Ermənistan Xarici İşlər Nazirliyinin mətbuat katibi V.Unanyan öz Facebook səhifəsində yazıb ki, Belarus prezidentinin orijinal geosiyasi təhlilləri ilk növbədə onların öz daxili siyasi gündəliyinə xidmət etmək məqsədi daşıyır. Onun sözlərinə görə, bu təhlillərin Ermənistana və onun xarici siyasətinə heç bir aidiyyəti yoxdur.
Məlumat üçün qeyd edək ki, Belarus prezidenti A.Lukaşenko rusiyalı jurnalist Vladimir Solovyova müsahibəsində yeni ölkələrin Rusiya və Belarusun İttifaq dövlətinə qoşulmasının mümkün perspektivlərini şərh edərkən Ermənistanın getməyə yerinin olmadığını deyib. Lukaşenkonun fikrincə, Ermənistan heç kimə lazım olmayan bir ölkəyə çevrilib: “Belarus artıq ümumi “təhlükəsizlik məkanında”dır və Qazaxıstana da “yaxşı dərs” oldu. Heç bir səhvə yol verilməsə, Ukrayna 15 il ərzində orada ola bilər. Ermənistanın getməyə yeri yoxdur. Sizcə onlar kiməsə lazımdır? Onlar bunu artıq görüblər. Azərbaycan bu qrupdan ona görə seçilir ki, biz də çoxlu səhvlərə yol vermişik. Təbii ki, Türkiyə Azərbaycanı çox ciddi dəstəkləyir. Türkmənistan, Özbəkistan və Tacikistan da, zənnimcə, iqtisadi zərurətə görə qoşulacaqlar”.
Lukaşenkonun Ermənistanı heç kimə lazım olmayan ölkə kimi dəyərləndirməsi ermənilərin qəzəbinə səbəb olub. Hətta hakim partiya təmsilçiləri Belarusun, Lukaşenkonun ünvanına təhqiramiz fikirlər səsləndiriblər. Minsk hava limanını donuz tövləsinə bənzədiblər.
Məgər belə götürəndə Lukaşenko düz demir? Ermənistan kiməsə lazımdırmı?
Əli Orucov: “Ermənistan həqiqətən də lazımsız dövlətə çevrilib”
Məsələyə münasibət bildirən AMİP funksioneri Əli Orucovun fikrincə, Lukaşenkonun Ermənistanla bağlı səsləndirdiyi fikirlər reallığı əks etdirir: “Ermənistan həqiqətən də lazımsız dövlətə çevrilib. Əgər əvvvəllər Rusiya bu dövlətdən təzyiq rıçaqı kimi istifadə edirdisə, son illər Ermənistan buna da yaramır. Lukaşenko yaxşı bilir ki, Ermmənistan Avrasiya Birliyində, Kollektiv Təhlükəsizlik Müqaviləsi Təşkilatında təmsil olunsa da səmimi müttəfiq deyil. Çünki Paşinyan hakimiyyəti ikili oyun oynayır. Sadəcə, məcburiyyətdən həmin təşkilatlardan çıxa bilmir. Ən başlıcası, belə baxanda Ermənistan onlar üçün əlavə yükdür. Lukaşenko açıq eyham vurdu ki, Ermənistanın günahı üzündən Azərbaycanla daha sıx tərəfdaşlıq münasibətləri qurmaq fürsətini əldən veriblər”.
Qorxmaz İbrahimli: “Ermənilər Lukaşenkodan çox Putinə etiraz edirlər”
Aydınlar Partiyasının sədr müavini Qorxmaz İbrahimli isə məsələyə bir qədər fərqli prizmadan yanaşdı: “Hesab edirəm ki, A.Lukaşenkonun toxunduğu məqamlar əslində Vladimir Putinin fikirləri idi. Bu mənada hesab edirəm ki, ermənilər Lukaşenkodan çox Putinə etiraz edirlər. Düşünürəm ki, ermənilər çox da hay-küy salmasınlar. Ondansa işğalçılıq ambisiyalarından əl çəksinlər. Rusiya-Belarus ittifaqındansa, 3 Cənubi Qafqaz ölkəsinin bir ittifaqda olması daha yaxşı olardı. Region ölkələri ilə sağlam əməkdaşlıq qurmaq daha faydalıdır, nəinki hansısa ittifaqa qoşulmaq. Əsas odur ki, Ermənistan qonşu olduğu ölkələrə qarşı ərazi iddiaları ilə çıxış etməsin”.
Vidadi ORDAHALLI
