Məlum olfduğu kimi, başda Fransa olmaqla, Avropa İttifaqının vasitəçiliyi ilə aparılan danışıqlarda Ermənistan Birinci Qarabağ müharibəsində itkin düşmüş Azərbaycan vətəndaşlarının kütləvi məzarlıqlarının olduğu yerlər barədə Azərbaycana məlumat verəcəyi ilə bağlı öhdəlik götürüb. Bunun qarşılığında 8 nəfər erməni diversantı Ermənistana təhvil verilib.
Ancaq problem ondadır ki, hələ razılaşmanın mürəkkəbi qurumamış Ermənistan cığallıq etməyə başlayıb. Kütləvi məzarlıqlarla bağlı Ermənistan XİN müavini Vaan Hunanyan bəyan edib ki, Ermənistan tərəfi itkin düşənlərin taleyinə aydınlıq gətirmək üçün heç bir birtərəfli öhdəlik götürməyib: “Həm birinci, həm də ikinci “Artsax” müharibələrində erməni tərəfinin də itkin düşənləri var. Biz itkin düşənlərin taleyinin aydınlaşdırılmasına önəm veririk. Bu mənada erməni tərəfi heç bir təktərəfli öhdəlik götürməyib”.
Məgər Azərbaycanın nəzarətində olan ərazilərdə ermənilərə aid toplu məzarlıqlar var? Axı diversantlarıın qaytarılması müqabilində Ermənistan belə bir öhdəlik götürüb. O zaman Ermənistan rəsmisinin bu açıqlaması nə deməkdir?
“Rəsmi İrəvan mövcud davranışlarına davam edəcəksə, bunun ağır nəticələrini də görəcək”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, Ermənistan tərəfinin verdiyi sözdən qaçması prinsipcə təəccüblü deyil: “Çünki bu, onlar üçün xarakterik olan bir haldır. Ermənistan tərəfinin bu kimi davranışlarından təəccüb eləməyə dəyməz. Bu ölkədə kimlərin, hansı şəxslərin rəhbər olmalarından asılı olmayaraq onların “siyasətinin xəmiri” cığallıqlar və sərsəm fikirlər üzərində qurulub. Ümumiyyətlə, biz təəssüflə qeyd etməliyik ki, digər ölkələrdən fərqli olaraq, bizə belə bir məkrli qonşu qismət olub. Bu mənada, mən cənab Prezident İlham Əliyevin ölkə jurnalistlərinə verdiyi sonuncu müsahibəsindəki bir önəmli fikri xatırlatmaq istərdim. O vurğuladı ki, Ermənistana heç vaxt bel bağlamaq, etimad göstərmək olmaz. Məhz həmin fikir bir daha özünü haqqında bəhs etdiyimiz mövzu ətrafında kifayət qədər sübut etdi. Birinci Qarabağ müharibəsi zamanında erməni iğaşçılığının və təcavüzünün nəticəsi olaraq minlərlə mülki vətəndaşımız, həbrçilərimiz əsir və girov götürüldü. Onların taleyi haqqında bugünə qədər heç bir məlumat verilmir. Bu məsələ Avropa İttifaqının vasitəçiliyi və iştirakı ilə Azərbaycan, Fransa və Ermənistan dövlət başçılarının videoformat şəklində keçirdikləri görüşdə də vurğulandı. Bununla belə, Ermənistanın baş naziri vəd etdi ki, həmin məsələ ilə bağlı addımlar atılacaq. Habelə Azərbaycan tərəfi də öz növbəsində növbəti humanist addımını atmaqla erməni hərbçilərinin növbəti partiyasını vətənlərinə qaytardı. Bu bir razılaşma idi və razılaşmanın birtərəfli qaydada pozulması bir daha göstərdi ki, Ermənistan tərəfi heç bir beynəlxalq hüquqa, diplomtik prosedurlara əhəmiyyət vermir. O üzdən, əlbəttə ki, buna görə cavab verməli olacaq. Vasitəçilik təşəbbüsü ilə çıxış edən Fransa da buna görə məsuliyyət daşıyır”.
Politoloq hesab edir ki, Ermənistan buna görə necə və hansı üsulla cavab alacaqsa, bunu yaxın zaman kəsimində görəcəyik: “Lakin fakt budur ki, belə əməlləri ilə İrəvan özünü dalana daha çox sıxışdırır. Və yalnız bu məsələ deyil, eləcə də digər proseslərdə də biz bunu görürük. Misal üçün, üçtərəfli bəyanatın müddəalarını icra etməsi kimi tələblərə də riayət etməməsi ilə İrəvan cığallıqlar edir. Bakının isə səbri tükənir və belə davam edə bilməyəcəyini hamımız çox yaxşı bilirik. Ötən il Başlıbeldə tapılan toplu məzarlıq sübut edir ki, belə məzarlıqlar çoxdur və Ermənistan həmin yerləri Azərbaycana göstərməlidir. Bu gün Ermənistan rəhbərliyində kimin olmasından asılı olmayaraq nə demələrinin Azərbaycan üçün heç bir əhəmiyyəti yoxdur. Rəsmi İrəvan mövcud davranışlarına davam edəcəksə bunun ağır nəticələrini də görəcək – istər hüquqi tərəfdən, istərsə də digər tərəfdən. Buna əmin ola bilərik. Bakı öz humanist davranışlarını davam etdirib və bundan sonra da etdirəcək. Ancaq qarşılığında belə ucuz siyasətlər çıxarsa öz sərt və qətiyyəti sözünü deyəcək”.
Bir sözlə, politoloq hesab edir ki, Ermənistan tərəfi nala-mıxa döyəcləməkdən əl çəkməli və öhdəsinə düşən vəzifəsini yerinə yetirməlidir.
Vidadi ORDAHALLI
