Rusiyanın Qarabağın dağlıq hissəsindəki sülhməramlı kontingentinin hərbi qulluqçuları qədim Xudavəng monastır kompleksində olublar. Bu barədə Rusiya Müdafiə Nazirliyinin yaydığı məlumatda bildirilib.
Məlumatda deyilir ki, ekskursiya zamanı Xudavəng iqumeni Ohanes Ovannisyan rus sülhməramlılarına monastırın XII-XIII əsrlərdəki tarixi haqqında məlumat verib.
“Bu gün, bu müqəddəs bazar günü Rusiya sülhməramlı kontingentinin hərbi qulluqçuları tarixi məkanı, Dadivank monastırını ziyarət ediblər. Biz əcdadlarımızın tarixinə toxunduq, insanların bu hadisəni necə qiymətləndirdiyini, bu gün də onu necə qiymətləndirdiyini gördük və evə çatan kimi mütləq uşaqlarımıza, nəvələrimizə və qohumlarımıza bu yer haqqında danışacağıq”, - Rusiya sülhməramlı qüvvələrinin sözçüsü Yuri Romanişin bildirib.
Rusiya Müdafiə Nazirliyinin mesajında deyilir ki, Xudavəng orta əsrlər Ermənistanın ən böyük monastır komplekslərindən biridir.
“Kompleks dəniz səviyyəsindən 1100 metr yüksəklikdə yerləşir. Monastır Ermənistanın qərb hissəsində xristianlığın təbliğçisi, apostol Faddeyanın şagirdi olmuş Müqəddəs Dadenin şərəfinə “Dadivank” adlandırılıb”, - deyə məlumatda bildirilir.
Rusiya sülhməramlıları Rusiya və Azərbaycan prezidentlərinin və Ermənistanın baş nazirinin 9 noyabr 2020-ci il tarixli üçtərəfli bəyanatına əsasən Kəlbəcər rayonunda yerləşən Xudavəng ərazisinə nəzarəti təmin edirlər. Həmin kompleksin Ermənistan və ermənilərə heç bir aidiyyəti yoxdur. Qədim alban kilsəsini özəlləşdirməyə cəhd edən ermənilər uzun illərdi ki, bu istəklərinə nail ola bilmirlər. Maraqlıdır, həmin monastırın rus sülhməramlılarının əcdadlarına hansı aidiyyəti var ki, onlar həmin məkanı öz əcdadları ilə bağlamağa çalışırlar?
İlahiyyatçı Tural İrfan “Bakı-Xəbər”ə açıqlamasında bildirdi ki, əvvəlcə qeyd etmək lazımdır ki, ermənilərin həmin məbədi ziyarət etmələri doğru deyil: “Bu barədə biz əvvəlki müsahibələrimizdə də bildirmişik ki, bu baş verirsə, onda bizim də vətəndaşlarımız İrəvandakı mıscidlərimizi gedib ziyarət etməlidirlər. Onda buna qarşılıq olaraq, onların həmin məbədi ziyarət etməsi məsələsinə baxıla bilərdi. Təəssüf ki, bu birtərəfli oldu. Müharibə bitən kimi onların ziyarətinə şərait yaradıldı. Sülhməramlılar isə buna daha çox şərait yaradır. Bir addım irəli gedərək, onların özləri də həmin məbədi ziyarət edir və məlum siyasi bəyanatı səsləndirirlər. Bu, xristian təəssübkeşliyindən irəli gələn bir məsələdir. Şübhəsiz ki, nə rusların, nə də ermənilərin orada ziyarətgahı var. Hamı bilir ki, ora qədim Alban məbədidir. O məbədin nə provaslavlığa, nə də qriqoryanlığa aidiyyəti var. Sülhməramlıların səsləndirdiyi bəyanat Rusiyanın öz mövqeyini gücləndirmək niyyətini güdür. Öncə erməniləri qabağa vermişdilər, indi də özlərini sığortalamağa çalışırlar. Xocalıda park açılışını da bura aid edə bilərik. Aidiyyəti dövlət qurumlarımız bununla bağlı öz etirazını bildirməlidir. Bu dini mövzu olduğu üçün QMİ və Dini Komitə də məsələyə münasibətini ortaya qoymalıdır. Sülhməramlıların səsləndirdiyi fikir onların missiyasına uyğun deyil. Regionda sülhün yaradılmasına mane olan fəaliyyətdir”.
Məhəmmədəli QƏRİBLİ
