UNESCO ilə Azərbaycanla yanaşı Ermənistana da xüsusi missiya göndərilməsi məsələsində razılığa gəlinməsi Ermənistanın kürkünə birə salıb. Erməni tarixçiləri növbəti yalanlar uydurmaq üçün artıq əl-ayağa düşüblər.
UNESCO nümayəndələrinin gəlməkdə olduğu bir vaxtda Emənistanda yeni qondarma xəritə yaradılaraq ortaya çıxarılıb və erməni tarixçilərinin iştirakı ilə həmin xəritələr geniş şəkildə müzakirə olunur. Ermənilər o saxta xəritədə bütün alban abidələrini “erməni abidəsi”, Albaniyanı isə “erməni dövləti” kimi təqdim edirlər.
“UNESCO nümayəndələrini saxta xəritələrlə, təxribatçı məlumatlarla qarşılamağa hazırlaşırlar”
Növbəti erməni təxribatına şərh verən BDU-nun Erməni araşdırmaları və Təlim Mərkəzinin direktoru İsmayıl Tanrıverdi “Bakı-Xəbər”ə bildirdi ki, bu qondarma xəritənin sosial şəbəkələrdə geniş təbliğ olunması mənfi haldır. İ.Tanrıverdinin dediyinə görə, qondarma xəritədə göstərilir ki, guya bu ərazilərdə alban abidəsi olmayıb, bütün bunlar “erməni abidəsidir”. Erməni alimlərinin növbəti saxtalaşdırma kampaniyasına başladığını deyən İ.Tanrıverdi hesab edir ki, onların cavabını faktlarla verməliyik. “Eşidiblər ki, UNESCO-nun missiyası Ermənistana da gələcək və ortaya saxta xəritə çıxarıb onu reklam edirlər. Erməni mətbuatında, sosial şəbəkə seqmentlərində elə iddialar irəli sürürlər ki, adamın ayağının altından yer qaçır. UNESCO-nun nümayəndələrinə təqdim etmək üçün o qədər yalanlar hazırlayıblar ki... Yalandan deyirlər ki, azərbaycanlılar erməni abidələrinə qarşı “vandalizm” aktları törədiblər, “erməni kilsələrinin xaçını dəyişib onları alban kilsələri” adlandırırlar. O gün də bir saxta xəritə göstərirdilər. Xəritədə Azərbaycan ərazisi təhrif olunub, yarısı göstərilib, yarısı yox. İddia edirlər ki, əsl alban abidələri “Azərbaycan ərazisində olmayıb”, Azərbaycan ərazisində olan xristian abidələri “əsl erməni abidələridir”. Guya ki, Azərbaycan ərazisində alban abidələri yoxdur. Mən də sosial şəbəkədə müzakirə zamanı şərh yazdım ki, alban abidələri sizindirsə bəs niyə yenə də tikə bilmirsiniz, sizin idisə onda niyə alban kilsələrini dağıtmısınız? Hətta ermənilər arasında da mənim fikrimə “düz deyir” yazmışdılar, qalanlar isə məni tənqid etmişdi. Ermənilər eşidib ki, UNESCO nümayəndələri gəlir və ortaya bu cür saxta xəritə çıxarıblar, bu qondarma xəritədə alban irsini və Albaniya dövlətini Azərbaycandan qoparmağa cəhdlər edilib. Bu isə bizim ərazi bütövlüyümüzə qəsddir, tariximizin təhrif edilməsidir. Erməni alimləri iddia edirlər ki, guya Azərbaycan Ermənistana “böhtan” atır və onlar Azərbaycandan UNESCO-ya şikayət edəcəklər. Deyəsən, UNESCO-nun nümayəndələri bu gün (9 fevral) gəlməlidir. Bu saxta xəritədə göstərilib ki, Azərbaycan ərazisindəki bütün xristian abidələri “erməni abidələridir”. Mən onların özlərinə yazmışam ki, sizi bu torpaqlara Çar Rusiyası köçürüb. Çar Rusiyasının himayəsi ilə 1836-cı ildə alban kilsəsi erməniləşdirilib, ermənilər də ondan istifadə edərək onu saxtalaşdırıblar. Ermənilər alban kilsələrindəki yazıların hamısını silib üstündən erməni əlifbası ilə yazıblar. Bunu da təsdiq edən onlarla sənəd var. Erməni alimlərinin “üzə çıxardığı” qırış-qırış xəritədən açıq görsənir ki, bunu yeni düzüb-qoşublar, sadəcə köhnə kimi qələmə verirlər. “Qədim xəritədə” Azərbaycanı Kürün sağ sahilində göstərirlər və iddia edirlər ki, Kürün o biri sahili Albaniyadır və Qarabağ da daxil olmaqla buradakı abidələrin hamısı “erməni abidələridir”, “Albaniya da ermənilərindir”. Bu cür cəfəngiyatlar, uydurmalar üzərində təbliğat quran erməni alimləri UNESCO-nu aldatmaq istəyirlər. Ona görə də, ermənilər UNESCO nümayəndələrini saxta xəritələrlə, təxribatçı məlumatlarla qarşılamağa hazırlaşırlar. Bildiyim qədər, UNESCO nümayəndələri Bakıya gəlib ondan sonra İrəvana gedəcəklər”.
Ermənilərin saxtakarlıq təbliğatının dayanmadığını deyən İ.Tanrıverdinin fikrincə, UNESCO-nun missiyası Azərbaycan tərəfindən lazımı şəkildə məlumatlandırılmalıdır ki, onlar ermənilərin qondarma xəritəsinə əhəmiyyət verməsinlər.
İradə SARIYEVA
