Prezident İlham Əliyev Media haqqında Azərbaycan Respublikası Qanununu təsdiqləyib. Bu Qanun Azərbaycan Respublikası Konstitusiyasının 94-cü maddəsinin I hissəsinin 1-ci, 10-cu və 13-cü bəndlərinə uyğun olaraq, media sahəsində fəaliyyətin təşkilati, hüquqi və iqtisadi əsaslarını, həmçinin kütləvi informasiyanın əldə edilməsi, hazırlanması, ötürülməsi, istehsalı və yayımının ümumi qaydalarını müəyyən edir.
Prezident İlham Əliyev “Media haqqında” Azərbaycan Respublikasının 2021-ci il 30 dekabr tarixli 471-VIQ nömrəli Qanununun tətbiqi və bundan irəli gələn bir sıra məsələlərin tənzimlənməsi barədə Fərman imzalayıb.
Fərmanla “Media haqqında” Azərbaycan Respublikasının 2021-ci il 30 dekabr tarixli 471-VIQ nömrəli Qanununun qüvvəyə minməsi ilə əlaqədar həmin Qanunun tətbiqini təmin etmək məqsədilə qərara alınır:
1. Azərbaycan Respublikasının Nazirlər Kabineti:
1.1. iki ay müddətində:
1.1.1. Azərbaycan Respublikasının Medianın İnkişafı Agentliyinin və Azərbaycan Respublikası Audiovizual Şurasının (bundan sonra – Şura) yaradılması ilə əlaqədar normativ hüquqi aktların uyğunlaşdırılması ilə bağlı təkliflərini Azərbaycan Respublikasının Prezidentinə təqdim etsin;
1.1.2. “Media haqqında” Azərbaycan Respublikası Qanununun pozulmasına görə inzibati məsuliyyəti müəyyən edən qanun layihəsini hazırlayıb Azərbaycan Respublikasının Prezidentinə təqdim etsin;
1.2. üç ay müddətində:
1.2.1. həmin Qanunun 30.1-ci və 59.2-ci maddələrində nəzərdə tutulmuş siyahıya dair təkliflərini Azərbaycan Respublikasının Prezidentinə təqdim etsin;
1.2.2. həmin Qanunun 73.6-cı maddəsinə uyğun olaraq, Media Reyestrinin aparılması qaydalarının layihəsini hazırlayıb Azərbaycan Respublikasının Prezidentinə təqdim etsin;
1.2.3. həmin Qanunun 29.4-cü və 33.5-ci maddələrində nəzərdə tutulmuş xidmət haqlarının məbləğini Azərbaycan Respublikasının Prezidenti ilə razılaşdırmaqla təsdiq etsin;
1.2.4. həmin Qanunun 70.1-ci maddəsinin ikinci cümləsinə uyğun olaraq, jurnalist vəsiqəsinin formasını, onun verilməsinə və ya dəyişdirilməsinə görə ödənişin məbləğini və həmin vəsaitdən istifadə qaydasını Azərbaycan Respublikasının Prezidenti ilə razılaşdırmaqla təsdiq etsin;
1.2.5. həmin Qanunun 73.8-ci maddəsinə uyğun olaraq, Media Reyestri şəhadətnaməsinin formasını təsdiq etsin və bu barədə Azərbaycan Respublikasının Prezidentinə məlumat versin;
1.3. Şuranın inzibati bina ilə təmin edilməsi və maddi-texniki təminatı məsələlərini bir ay müddətində həll etsin…
Prezidentin qanunu təsdiqləməsi və Nazirlər Kabinetinə bundan irəli gələn məsələləri həll etməklə bağlı verdiyi tapşırıqlarla bağlı məsələyə media ekspertlərinin münasibəti necədir?
Müşfiq Ələsgərli: “Azərbaycan mediasını çox irəliyə aparacaq bir qanun layihəsidir”
Media eksperti Müşfiq Ələsgərli “Bakı -Xəbər”ə açıqlamasında bildirdi ki, bu qanunun üzərində uzun müddət iş aparılmış və nəhayət təkmil bir sənəd kimi hazırlanıb: “Qanunun qəbul edilməsində Azərbaycanın media cameəsi iştirak edib. Bununla bağlı ictimai müzakirələr çox geniş spektrdə keçirilib. Ölkənin həm yazılı, həm də elektron KİV-lərinin təmsilçilərinin iştirakı ilə qanun layihəsi ətrafında fikir mübadilələri aparılıb. Əvvəl Milli Məclis, sonra isə Prezident qanunu təsdiq edib. Mən bu münasibətlə Azərbaycan media ictimaiyyətini ürəkdən təbrik edirəm. Bundan sonra çox mühüm dəyişikliklər həyata keçiriləcək. İlk dəfədir ki, onlayn medianın fəaliyyəti qanunla tənzimlənəcək. Media Reysterinin tətbiqindən sonra bilinəcək ki, Azərbaycanda nə qədər jurnalist var. Jurnalistlərin hüquqları və statusları müəyyən ediləcək. Azərbaycan mediasını çox irəliyə aparacaq bir qanun layihəsidir”.
Azər Həsrət: “Yeni səhifə açılıb və biz yeni keyfiyyət mərhələsinə doğru gərəkli addımı atmışıq”
Digər media eksperti Azər Həsrət “Bakı-Xəbər”ə açıqlamasında bildirdi ki, yeni qanunun qüvvəyə minməsi Azərbaycan mediasında yeni mərhələnin başlanğıcı olacaq: “Bizdə bu günə kimi qüvvədə olan qanun kifayət qədər uzun müddət əvvəl qəbul edilib. Baxmayaraq ki, əlavələr və dəyişiliklərlə məruz qalmışdı. Dövrün tələblərinə tam cavab vermirdi. Media sahəsində bir pərakəndəlik vardı. Yeni qanun bunu da aradan qaldıracaq. Üçüncü tərəfdən bu qanun jurnalistikadan sui-istifadə hallarının aradan qaldırılmasına çox ciddi töhfə verəcək. Söhbət Media Reysterinin tətbiqindən və media ilə bağlı məsələlərin vahid bir qurumda cəmləşdiyindən gedir. Media fəaliyyətilə məşğul olmaq istəyən və ya məşğul olan hər bir şəxs biləcək ki, konkret bir ünvandan bütün suallarına cavab ala bilər. Biz qanunun ilkin ictimai müzakirələri zamanı da demişdik ki, istənilən halda qanunla bağlı narazılar olacaq. Tətbiq edilmədən heç bir qanun mükəməlləşə bilmir. Bu baxımdan fikirləşirəm ki, bir müddət sonra qanun çatışmayan tərəfləri də özünü göstərə biləcək. Onları da düzəltmək üçün iradə mövcuddur. Yeni səhifə açılıb və biz yeni keyfiyyət mərhələsinə doğru gərəkli addımı atmışıq”.
Məhəmmədəli QƏRİBLİ
