Azərbaycan, Ermənistandan fərqli olaraq, hər zaman humanizm prinsiplərinə böyük əhəmiyyət verib. Bütün məsələlərdə Azərbaycan üçün insani dəyərlər çox üstündür. Məlum olduğu kimi, Azərbaycanın humanizm prinsipini rəhbər tutaraq fevralın 7-də Ermənistana qaytardığı 8 hərbçi barədə İrəvanda istintaq araşdırması başlayıb.
Onlar təyyarədən düşən kimi birbaşa istintaqa cəlb olunublar. Hərbçilərin dindirilməsi 7-8 saat çəkib. Onların valideynləri buna etiraz edib və İstintaq Komitəsinin pəncərələrini sındırmağa çalışaraq binaya ziyan vurublar.
Azərbaycanın qaytardığı hərbçilərin Ermənistanda dərhal istintaqa cəlb edilməsinin pərdə arxasında xüsusi məqsədlər olmamış deyil. Ermənistanın hüquq-mühafizə orqanları bütün gücünü sərf edir ki, bu insanlardan Azərbaycanın əleyhinə ifadə alsınlar və o ifadəni də beynəlxalq səviyyədə ictimailəşdirsinlər.
"Bu adamlar Azərbaycanda humanizm prinsiplərinə uyğun davranış görsələr də, öz ölkələrinə gedən kimi qeyri-insani davranışla üzləşiblər"
"Müasir İnkişaf" İctimai Birliyinin sədri, siyasi şərhçi Mübariz Göyüşlü bizimlə söhbətində bildirdi ki, Ermənistanda böyük xaos hökm sürür və bunu açıq şəkildə Paşinyanın, eləcə də onun rəhbərlik etdiyi hökumətin bəyanatlarında, davranışlarında görürük. M.Göyüşlü qeyd etdi ki, Azərbaycanın qaytardığı hərbçilərin istintaqa çəkilməsinin səbəbi onları Azərbaycan əleyhinə danışdırmaq istəyidir.
"Ermənistanda müharibədən sonra vəziyyət daha da qarışıb. Onlar davranışlarında, çıxışlarında xaotik hərəkətlərə yol verirlər. Dildə bir söz deyir, əməllərində fərqli şeylər göstərirlər, bəyanatları isə bunların əksinə olur. Azərbaycan isə ardıcıl və məqsədyönlü şəkildə fəaliyyət göstərir. Ermənistan hər zaman terrorçu olub, terrorçuları dəstəkləyib. Müharibə bitdikdən sonra diversantların, terrorçuların hərbçi qiyafəsində Azərbaycan ərazisinə göndərilməsi və sair dediklərimizə sübutdur. Terrorçu ermənilər isə Azərbaycan hərbçiləri tərəfindən dərhal zərərsizləşdirildilər. Dünyanın müxtəlif ölkələrinin rəhbərlərinin vasitəçiliyi ilə Azərbaycan humanizm göstərərək onları azad etdi. Bu adamlar Azərbaycanda humanizm prinsiplərinə uyğun davranış görsələr də, öz ölkələrinə gedən kimi qeyri-insani davranışla üzləşiblər. Onları Ermənistanda saatlarla istintaqda danışdırırlar ki, Azərbaycan əleyhinə söz alsınlar və öz növbəti bədnam niyyətlərini gerçəkləşdirsinlər".
Burada başqa bir məqamın da olduğunu deyən siyasi şərhçinin sözlərinə görə, əvvəllər də Azərbaycan tərəfi erməni hərbçiləri təhvil verib və həmin hərbçilərin həbs edildiyi, işgəncə altında ifadə verməyə məcbur edildiyi məlumdur. "Ola bilsin ki, onlardan kimsə işgəncə altında bu hərbçilərin adlarını da çəkib və sair. Digər tərəfdən də görsənir ki, Ermənistan hökuməti hərbçilərə dərs vermək istəyir ki, əsir düşməsinlər. Başqa bir səbəb isə, bəlkə də, Azərbaycan tərəfindən təhvil verilən hərbçilərin cəsusluğa cəlb edilib-edilmədiyini araşdırmaqdır. Əslində, bu yanlış yanaşmadı. Azərbaycanın buna ehtiyacı yoxdur. Öz dövlətini, xalqını satan erməni hərbçisi kimə lazımdır ki? Amma erməni tərəf onlardan şübhələnir. Yadınıza gəlirsə, müharibədən sonra şayiə yayılmışdı ki, ermənilərin verdiyi koordinatlarla türklər gəlib gecələr İrəvanın küçələrində gəzirlər. Bütün bunlar onu göstərir ki, erməni cəmiyyəti çox narahatdır, bu narahatlığı da onlara Ermənistan hökuməti yaradıb. Dövlətimizin qaytardığı hərbçilərdən beynəlxalq aləmdə Azərbaycanın əleyhinə istifadə etmək istəyirlər. Ermənistan Azərbaycanın humanizminə qeyri-humanistcəsinə yanaşır. Necə ki, qondarma "hərbi əsirlər" məsələsi ilə aylarla beynəlxalq ictimai rəyi məşğul etdilər. İndi də bu məsələ ilə nəyəsə nail olmaq istəyirlər"- deyə M. Göyüşlü bildirdi.
İradə SARIYEVA
