Zərərli fəaliyyətinə gğrə dünyanın bir çox ölkəsində qadağan edilən Soros fondunun hələ də təsir qüvvəsinin yüksək olduğu ölkələr mövcuddur. Belə ölkələr sırasında ilk diqqət çəkənlərdən biri də Ermənistandır.
Ermənistanda cəmiyyətin müəyyən hissəsinin narazılığına baxmayaraq, Soros fondu bu ölkədə genişmiqyaslı fəaliyyətini davam etdirir. Real mənzərə göstərir ki, sözügedən fond burada jurnalist birliklərini, hüquqşünasları, medianı, insan haqları dərnəklərini maliyyələşdirir və ya bu qurumlar üçün mükafatlar təsis edir. Soros qrantının aludəçilərinə çevrilən bu mükafatçılar isə "beşinci kolon”un əsas bazasını təşkil edirlər. Xatırladaq ki, bu məsələyə Azərbaycan Gəncləri Gününün 25 illiyinə həsr olunmuş Gənclər Forumunda çıxışı zamanı Prezident İlham Əliyev də toxunaraq olduqca maraqlı açıqlamalar vermişdi: “İndi internetdə məşhur şəkil var - Soros və Nikol Paşinyan. Bilmirəm görmüsünüz, yoxsa yox, amma axtarsanız taparsınız. Baxın, necə də səmimi, bir-birinə sarılıb durublar, yapışıblar bir-birilərinə, sanki ikibaşlı əjdahadır. Ancaq əjdaha cılız çıxdı, bir şey alınmadı. Amma budur həqiqət, bütün dırnaqarası inqilabların arxasında eyni qüvvələr dayanır və bu inqilablar, o cümlədən Ermənistanda nəyə gətirib çıxardı, indi hər kəs görür”. Qeyd edək ki, Soros fondunun Ermənistanda belə rahat fəaliyyətindən bu ölkənin əsas müttəfiqi olan Rusiya da kəskin narazılıq ifadə edir. Amma “İravnyuk” nəşrində dərc olunan analitik məqalədən belə bəlli olur ki, Soros fondu Ermənistanda yenə əsas söz sahibidir. Qəzet bu xüsusda yazır: “Hazırda postmünaqişə dövrü olmasına baxmayaraq, Soros fondu Ermənistandakı layihələrin həyata keçirilməsi üçün vəsait xərcləməkdə davam edir. Məsələn, 2021-ci il ərzində bu fondun ayırdığı 1,2 milyon dollar vəsait Ermənistanda müxtəlif şəxslərə qrant şəklində paylanıb. Fond bu dəfə fiziki şəxslərə qrant ayırmayıb. Redaksiyanın apardığı araşdırmalardan aydın olur ki, bu dəfə qrant ayrılanlardan biri “İnkişaf və hüquq müdafiəsi” fondunun həmtəsisçilərindən biri, parlamentdəki “Vətəndaş müqaviləsi” hakim fraksiyasına daxil olan Harusyak Culxakyandır. O da bəlli olur ki, sifətinə Mona Lizanın mübhəm təbəssümü hopmuş bu xanım deputat Soros fondundan 24,5 min, ona yaxın olan Jenya Mailyanın “Real adamlar və real dünya”sı 24 min 668, ona heç də kənar adam sayılmayan Vayolet Çopunyanın “Hüquq İnkişafı Mərkəzi” 37 min 750, hüquq müdafiəçilərini koordinasiya edən Zarui Hovhanesyan 28 min, Daniel İonasyanın “Məlumatlı Vətəndaşlar İttifaqı” 50 min, Lusine Vasilyanın “Mandat”ı 70 min, “Diskriminasiyaya qarşı və birlik naminə”si 43 min 100, Edik Bağdasaryanın “Araşdırmaçı jurnalistlər”i 90 min dollar və “soros dəyərləri”nin digər keşikçiləri ümumilikdə 1,2 milyon dollar qrant alıblar”.
Yazıda diqqətçəkən məqam odur ki, qrant alanların arasında dövlət məmurları, iqtidar deputatları, hətta səfirlər də var. Bu şəxslərin hamısı 2021-ci il parlament seçkilərində bu və yaxud digər dərəcədə kifayət qədər fəallıqları ilə seçiliblər. Məqalə bu sualla tamamlanır: “Bütün bunların demokratiya ilə nə əlaqəsi var və nəyə görə bu hallar öz adı ilə - korrupsiya adlandırılmır”. Bütün bunlar bir daha Ermənistanda bir sıra dairələrin hələ də Sorosun təsiri altında olduğunu isbatlayır. Bir daha qeyd edək ki, 2018-ci ildə Ermənistanda baş vermiş ermənisayağı “məxməri inqilab”dan sonra sözügedən ölkədə Soros fondunun mövqeləri sürətlə möhkəmlənməyə başlayıb. Hələ 1997-ci ildə Ermənistanda fəaliyyətə başlayan "Açıq Cəmiyyət Fondu - Ermənistan" və ya qısaca desək Soros fondu, demək olar ki, 2018-ci ildə qarşısına qoyduğu əsas məqsədə çataraq, bu kasıb postsovet ölkəsində hakimiyyətə nəzarət imkanları qazanıb. Artıq Ermənistan hakimiyyətinin Soros Fondunun təsir dairəsində olduğu tək bu ölkənin daxilində deyil, xaricində də heç kəsdə şübhə doğurmur. Əslində, baş nazir Nikol Paşinyanın indinin özündə belə verdiyi qərarlar və kadr təyinatları da bunun əyani sübutudur. Hazırda Ermənistanda Soros fondu insan hüquqlarının müdafiəsi, qadınların hüquqlarının müdafiəsi, antikorrupsiya kompaniyaları, seçki monitorinqi və digər sahələrdə çoxsaylı QHT-lərə yenə ciddi dəstək verir. Məhz Paşinyan hakimiyyətə gələndən sonra “məxməri inqilab”ın sponsorları qarşısında götürdüyü öhdəliklərini yerini yetirir və bu fondun əsas nümayəndələrinin hamısını Ermənistanda yüksək vəzifələrə təyin edir. Təsadüfi deyil ki, artıq “sorosçular” Ermənistanda hakimiyyətin bütün qollarında möhkəmləniblər. Bu ölkədə nazirliklər, səfirliklər, universitetlər adıçəkilən fondun nəzarəti altındadır. Bütün bunlar bir daha onu göstərir ki, Paşinyan hakimiyyəti bütün mənalarda Soros fonduna bağlıdır. Təsadüfi deyil ki, onun hakimiyyətə gəlişindən sonra Corc Soros bu ölkəyə daha çox vəsait ayırmağa başlayıb. Burada ən mühüm məqamlardan biri də ondan ibarətdir ki, Nikol Paşinyan siyasi hakimiyyətini möhkəmləndirdikcə buna paralel olaraq həm də Ermənistan iqtisadiyyatında Corc Sorosa və ona yaxın biznes dairələrinin mövqeyini gücləndirmək yolunda mühüm addımlar atılır. Xüsusən də, Rusiyaya bağlı biznesin bu ölkədə sıxışdırılması istiqamətində incə və gizli formada plan həyata keçirilməkdədir. Bu plana görə, qarşıdakı illərdə Ermənistan iqtisadiyyatında da əsas söz sahibi Qərb dairələri olacaq. Elə bu səbəbdən Rusiyada Paşinyan hakimiyyətinə qarşı qəzəb getdikcə artır.
Nahid SALAYEV
