Xarici işlər naziri Ceyhun Bayramov və Avropa İttifaqının (Aİ) qonşuluq və genişlənmə üzrə Komissarı Oliver Varhelyi arasında görüş baş tutub.
Görüşdə nazir Ceyhun Bayramov Azərbaycan və Aİ arasında münasibətlərin bərabərhüquqlu tərəfdaşlıq əsasında inkişaf etdiyini bildirib. Aİ komissarlarının iştirak etdiyi “Cənub Qaz Dəhlizi” Məşvərət Şurası VIII toplantısının uğurla keçirildiyinə istinad edən Ceyhun Bayramov enerji sahəsində Aİ ilə strateji tərəfdaşlığın inkişafını məmnunluqla vurğulayıb.
Nazir bölgədə mövcud olan cari vəziyyət, Ermənistanla münasibətlərin normallaşması və delimitasiya prosesi, eləcə də mina təhlükəsi kimi məsələlər barədə qarşı tərəfə məlumat verib. O, həmçinin, bölgədə həyata keçirilən bərpa və yenidənqurma işləri və bu xüsusda Aİ-nin mümkün rolundan danışıb.
Komissar Oliver Varhelyi Aİ üçün Azərbaycanla tərəfdaşlıq münasibətlərinin böyük əhəmiyyət kəsb etdiyini və bu münasibətlərin daha da gücləndirilməsinin vacib olduğunu qeyd edib. O, Azərbaycanın Aİ-nin etibarlı tərəfdaşı olduğunu vurğulayıb. Komissar iqtisadi sərmayə planı çərçivəsində Azərbaycana 2 milyard avroluq maliyyə paketinin ayrıldığını bildirib və bu çərçivədə konkret layihələrin reallaşmasının nəzərdən keçirildiyini qeyd edib. O.Varhelyi, habelə Aİ-nin Azərbaycanda həyata keçirilən bərpa və yenidənqurma prosesində iştirak etməyə hazır olduğunu ifadə edib.
Tərəflər regional təhlükəsizlik, enerji tərəfdaşlığı, iqtisadi əlaqələr, həmçinin nəqliyyat və bağlantılar, sektoral əməkdaşlıq, habelə qarşılıqlı maraq doğuran digər sahələrdə əməkdaşlığın həyata keçirilməsi üzrə fikir mübadiləsi aparıblar.
Görüşdə Azərbaycan və Aİ arasında münasibətlərin hüquqi əsasını təşkil edəcək yeni saziş üzrə danışıqların tamamlanmasının əhəmiyyəti qarşılıqlı şəkildə ifadə edilib.
Qeyd edək ki, Prezident İlham Əliyev dəfələrlə Aİ-ni Ermənistanla müqayisədə bizə həddən artıq az məbləğdə yardım ayırdıqlarına görə sərt tənqid edib. Bundan əvvəlki maliyyə tranşındakı fərq dəfələrlə ölçülürdü. Prezident prinsipiallıq göstərdikdən sonra bu məsələdə Avropa İttifaqından əsaslı dönüş nəzərə çarpır. Düzdür, yenə də Ermənistanla müqayisədə bizə 600 milyon az vəsait ayrılıb.
Avropa qurumları ilə əməkdaşlıq təcrübəsi olan politoloq Yeganə Hacıyeva “Bakı-Xəbər”ə açıqlamasında bildirdi ki, Azərbaycan-ın Aİ-nin strateji tərəfdaşı olmasına baxmayaraq, biz 30 il ərzində onlardan Qarabağ probleminin həllində hərəkətverici nəsə hiss etmədik: “Aİ bütün yekun bəyanatlarında Azərbaycanın ərazi bütövlüyünü tanıdığını deyir. Buna baxmayaraq, onların ciddi təsir rıçaqlarından istifadə etmələrinin şahidi olmadıq. Azərbaycan dəfələrlə Aİ-nin bizimlə heç də dürüst davranmadığını bəyan edib. Bunu isbatlamağa əlimizdə kifayət qədər əsaslarımız var. Ermənistana bir neçə layihə üzrə qrantlar ayrılıb. Hətta məbləğin ümumi həcmi Ermənistanın büdcəsini belə üstələyir. Bu o ölkədir ki, öz qonşusunun ərazisini işğal edib. Avropaya gedən layihələrin təhlükəsizliyinə təhdid yaradıb. Müharibədən daha çox ziyan görən ölkə bizik. Çünki müharibə, dağıntıların hamısı bizim ərazimizdə olub. Prezidentin “Avropa Birliyi dürüst davranmalıdır” fikrindən ciddi nəticə çıxarıb. Əks təqdirdə elə ayırdıqları 160 milyonla kifayətlənməli olacaqdılar. Ermənistana pul daha faydalı şərtlərlə verilib. Əhəmiyyətli hissəsi kredit kimi deyil, qrant şəklində verilib. Yəni qaytarmamaq şərtilə. Bizə isə kredit kimi verilib. Həmin pulu qaytarmaq imkanında olmayan Ermənistan, bəllidir ki, həmin pulu mənimsəmiş olacaq. Ermənistanın tarixində çoxlu sayda belə fakt var ki, AB-nin maliyyəsi ilə ərsəyə gətirdiyi infrastrukturları sonra borc əvəzinə Rusiyaya verib. Bütün bunlara baxmayaraq, bizə ayrılan 2 milyardın Qarabağdakı bərpa işlərinə köməkliyi olacağı qənaətindəyəm”.
Məhəmmədəli QƏRİBLİ
