Özünü “Qarabağ ermənilərinin dini lideri, arxiyepiskop Pargev” kimi qələmə verən və bu ad altında saysız cinayətlər törədən terrorçu keşiş Qurgen Martirosyanın naqis əməlləri bitib-tükənmək bilmir. Demək olar ki, vaxtaşırı sosial şəbəkələrdə onun təxribatları barədə videolar, məlumatlar yerləşdirilir.
Son günlər sosial şəbəkələrdə, erməni Teleqram kanallarında “arxiyepiskop Pargev”in, yəni keşiş Pargev Martirosyanın 1992-ci il mayın 8-də Şuşanın işğalından sonra Mamay bulağında vandalizm aktları törətdiyini əks etdirən video yayılıb. Videoda o deyir ki, bir neçə gündən sonra bulağın üzərindəki islam yazısı erməni sözləri ilə əvəz olunacaq. İşğaldan sonra ərəb əlifbası ilə olan yazı bulağın üstündən götürülərək ora xaç işarəsi həkk olunmuşdur.
Yayılan görüntülərdən açıq görsənir ki, keşiş Matirosyan Şuşadan onun yerli sakinləri olan azərbaycanlıların izlərini silmək üçün hər cür cinayətə əl atıb, mədəni irsimizi dağıdıb. Bulaqların, başqa abidələrin üzlərini qaşıyıb ki, Azərbaycan, islam mədəniyyətinin izlərini silsin, bir sözlə, hər cür vandalizmə baş vurub, bunu da videoya çəkib saxlayıbdır, bu gün isə hansısa qüvvələr Pargevin əməllərini ifşa edir.
Qeyd edilənə görə, Mamay bulağı Şuşa şəhəri ərazisində, Mamayı məhəlləsində yerləşən məşhur bulaqlardan və tarixi yerlərdən biridir. 1910-cu ildə tanınmış sahibkar, şuşalı Səməd ağa Cavanşir 10 min manat pul xərcləyib Şuşada müsəlmanlar yaşayan bir məhəlləyə içməli su kəməri çəkdirərək, şəhərin su təchizatı problemini demək olar ki, aradan qaldırdı (ondan əvvəl Şuşaya 1873-cü ildə Xan qızı Natəvan su çəkdirmişdir). Cavanşirov Şuşaya çəkdirdiyi bu su kəməri yerli camaat tərəfindən Mamay bulağı adı ilə adlandırılır. Məhəllə Mamay bəyin adı ilə bağlıdır, ancaq bulağın üzərində kitabələrdə bulağı Səməd bəy Cavanşirovun vəsaiti hesabına inşa edildiyi göstərilmişdi.
Ekspertlər deyirlər ki, Martirosyan müharibə başa çatan kimi azərbaycanlıların evlərindən qarət etdiklərini yığaraq qaçıb. Ermənilərin özlərin də kəskin ifşa etdiyi Martirosyanın Qarabağda Azərbaycan abidələrinə qarşı hər cür vandalizm aktı törətdiyini deyən ekspetlər hesab edirlər ki, Azərbaycan bu üzdən iraq keşişin özünü beynəlxalq məhkəməyə verməlidir.
“O qədər cinayətləri var ki, saymaqla qurtarmaz”
BDU-nun Erməni araşdırmaları və Təlim Mərkəzinin direktoru İsmayıl Tanrıverdi bizimlə söhbətində bildirdi ki, Qarabağda abidələrimizə qarşı vandalizm aktları törədənlərin hamısını beynəlxalq məhkəməyə verməliyik. İ.Tanrıverdi hesab edir ki, hətta biz bu məsələdə gecikirik. “Qarabağda Azərbaycan abidələrinə qarşı ermənilərin dəhşətli vandalizm aktları törətdiyi bütün dünyaya məlumdur. Şuşada da həmçinin tarixi irsimizə qarşı çox böyük təxribatlar törədiblər. 1992-ci ildən sonra Şuşadakı Azərbaycan abidələrinə qarşı “arxiyepiskop Pargev”in törətdiyi cinayətlərin ifşa edildiyini deyən İ.Tanrıverdi deyir ki, terrorçu keçiş cəzasız qalmamalıdır. “Qondarma keçiş Martirosyan beynəlxalq məhkəməyə verilməlidir. Onun cinayətləri yalnız Mamay bulağının üstündəki yazını silib ora erməni xaçı quraşdırılması ilə bitmir, o Qarabağda saysız cinayətlər törədib. Bu barədə ermənilər özləri yazırlar ki, o “arxiyepiskop” adı altında qarətlər törədib, cinayətkar qruplaşmalara başçılıq edib. Müharibə qurtaran kimi də Qarabağdan qaçıb, dediyim kimi o qədər cinayətləri var ki, saymaqla qurtarmaz. Bu üzdən iraq keşiş o zaman azərbaycanlıların evlərini ermənilərə paylayırdı. Bu gün isə Qarabağdan qaçıb gedib, harada olduğu məlum deyil. Amma ortada onun Şuşadakı Azərbaycan abidələrinin başına gətirdiyi bəlaları əks etdirən faktlar var. O, hər bir abidənin üzərindən bizim izlərimizi silməyə çalışıb, amma müvəffəq olmayıb, Şuşaya qovuşmuşuq” - deyə bildirən İ.Tanrıverdinin sözlərinə görə, Azərbaycana qarşı cinayət törədən hər bir şəxs cəzasını almalıdır.
İradə SARIYEVA
