Ukrayna ətrafında hadisələrin inkişaf axarı getdikcə daha maraqlı xarakter almağa başlayır. Rusiyanın Ukrayna ilə sərhəddə yeni qüvvələr cəmləşdirməsi fonunda Kremlin bu ölkəyə müdaxilə ehtimalı yüksəlib. Amma hələ də Rusiyanın dəqiq niyyəti bəlli deyil.
“The Financial Times” qəzetinin yazdığına əsasən, Kreml Ukraynaya gözlənilən müdaxilə ərəfəsində Qərbə xəbərdarlıq etmək üçün “nüvə dəyənəyini” də istifadə etmək niyyətindədir. Belə ki, Rusiya özünün strateji nüvə qüvvələrinin hər il keçirilən təlimlərinin vaxtını bu il dəyişdirib və həmin təlimləri fevral ayına təyin edib. Nüvə qüvvələrinin manevrləri NATO və ABŞ-a Moskva Ukraynaya hücum edəcəyi təqdirdə situasiyaya qarışmamaq barədə xəbərdarlıq qismində istifadə ediləcək. ABŞ Silahlı Qüvvələrinin Birləşmiş qərargah rəisləri komitəsinin sədri, general Mark Milli və ABŞ kəşfiyyatının rəhbəri Evril Heyns bildirir ki, Rusiyanın Ukraynaya hərbi müdaxiləsi fevralın ortalarında başlaya bilər. Bir qayda olaraq, Rusiya qitələrarası ballistik nüvə raketlərini tətbiq etməklə nüvə qüvvələrinin təlimlərini payızda keçirir. Amma bu il təlimlər fevral ayına keçirilib. ABŞ hesab edir ki, Rusiya prezidenti Vladimir Putin bu yolla “əzələ oynadır”, ABŞ-ı və Şimali Atlantika alyansını xəbərdar edir ki, Ukrayna ətrafındakı situasiyaya qarışmaq niyyətinə düşməsinlər. Qəzetin yazdığına görə, bu arada Rusiya Ukayna sərhədləri boyu qoşun cəmləşdirməyi də davam etdirir. ABŞ kəşfiyyatına istinad edən digər nəşrlər yazır ki, Ukrayna ilə sərhədə cəmləşdirilən batalyon taktiki qruplarının sayı 83-ə çatıb. Halbuki, bir həftə əvvəl bu say 60-a yaxın olub. Daha 14 qrupun isə yolda olduğu bildirilir. Ağ Evin milli təhlükəsizlik üzrə müşaviri Ceyk Sallivan "Fox News"a verdiyi müsahibəsində bildirib ki, Rusiya Ukraynanı günlər və ya həftələr ərzində işğal edə bilər: “Biz pəncərənin qarşısındayıq. İstənilən gün Rusiya Ukraynaya qarşı hərbi əməliyyatlara başlaya bilər, ya da bu bir neçə həftə ərzində baş verə bilər, ya da bunun əvəzinə Rusiya diplomatik yolu seçə bilər”. O daha sonra bildirib ki, Rusiyanın istənilən mümkün hərəkəti Ukraynanın Donbas bölgəsinin ilhaqı, kiberhücumlar və ya Ukraynaya genişmiqyaslı müdaxiləni əhatə edə bilər.
Bu arada ABŞ Rusiyanın mümkün müdaxiləsi fonunda Almaniya və Şərqi Avropaya 3000 əlavə əsgər göndərdiyini elan edib. Sallivan bununla ilgili qeyd edib ki, ABŞ Ukraynada müharibəyə başlamaq və ya Rusiya ilə müharibə aparmaq üçün qoşun göndərmir. Qeyd edib ki, qoşunların yerləşdirməsi ehtiyat tədbiri və müdafiə xarakteri daşıyır. Buna əsas səbəb Rusiyanın Ukraynaya genişmiqyaslı müdaxilə üçün lazım olan qüvvə və vasitələrin təxminən 70 faizini sərhədlərə doğru çəkməsidir. “Washington Post" qəzeti bu xüsusda yazır: “Amerika kəşfiyyat mənbələrinin məlumatına görə, Ukrayna ilə sərhədə cəmləşdirilən batalyon taktiki qruplarının sayı 83-ə çatıb. Cəmi bir həftə əvvəl bu say 60-a yaxın olub. Daha 14 qrupun isə yolda olduğu bildirilir. Batalyon taktiki qruplarının ümumi sayına “Müttəfiqlərin qətiyyəti” təlimində iştirak etmək üçün Belarusa yollanan Rusiya hərbçilərinin daxil olub-olmadığı aydın deyil. Bir batalyon taktiki qrupunda 750 hərbçi olur. İlhaq edilmiş Krımdakı hərbçilərlə bir yerdə Ukrayna sərhədində yerləşdirilən Rusiya hərbçilərinin sayının 100-130 min nəfər olduğu bildirilir. Fevralın 15-ə doğru ağır hərbi texnikanın yoldan kənarda hərəkət edə bilməsi üçün yer kifayət qədər donmuş olacaq, bu, işğalı asanlaşdıran şərtlərdən biri adlanır. Hava şəraiti baxımından təhlükə martın sonuna kimi davam edəcək. “Reuters” agentliyi isə, ABŞ rəsmilərinə istinad edərək, genişmiqyaslı işğal halında mümkün itkilər barədə maraqlı məlumat paylaşıb. Bu hesablamalara görə, Ukrayna hərbçiləri arasında itkilər 5-25 min arası, Rusiya hərbçiləri arasında 3-10 min, mülki şəxslər arasında 25-50 min ola bilər. Bundan əlavə, işğalın Avropa İttifaqı ölkələrində 5 milyona qədər qaçqının didərgin düşməsinə səbəb ola biləcəyi iddia edilir. Bundan başqa, mümkün hərbi kampaniyanın gedişatının qiymətləndirilməsindən də bəhs edilir. İddia olunur ki, rus hərbçilərinin Kiyevə daxil olması üçün cəmi 2 gün lazım ola bilər, lakin bu şəhərin ələ keçirilməsi çoxsaylı itkilərlə müşayiət olunacaq. “Fox News" ABŞ Silahlı Qüvvələrinin Birləşmiş qərargah rəisləri komitəsinin sədri, general Mark Millinin konqresmenlər qarşısında bu yaxınlarda etdiyi şəxsi çıxışı ilə tanış olan konqresdəki mənbələrə istinadən iddia edir ki, Kiyev 72 saat ərzində tutula bilər. Rusiya isə Ukraynanı işğal etmək planının olmadığını bildirir və belə bir təhlükə barədə yazıb-yaradan Qərb siyasətçilərini və medianı tənqid edir. Rusiyanın BMT-dəki daimi nümayəndəsinin müavini Dmitri Polyanski isə son yazılanları dəlilik və təşviş adlandırıb. Rusiyanın ABŞ-dakı səfiri Anatoli Antonov bildirib ki, Moskvanın belə niyyəti yoxdur: “Rusiya heç kimə hücum etməyə hazırlaşmır, bu bizim maraqlarımıza cavab vermir və sərfəli deyil”. O, Ukraynaya qarşı gözlənilən Rusiya təcavüzü barədə deyilənləri boş söhbət və illüziya adlandırıb.
Nahid SALAYEV
