Rusiyanın Müdafiə Nazirliyi Qarabağda sülhməramlıların bu ilin yanvar ayı üçün fəaliyyətləri barədə hesabat yayıb. Müdafiə Nazirliyinin rəsmi saytında yayılmış hesabatda sülhməramlıların ermənilərə hansı xidmətləri göstərdikləri öz əksini tapıb. Hansı sayda ermənin gəlib Qarabağdakı məbədləri ziyarət etməsi də həmin hesabatda göstərlir. Ancaq rəsmi qurumun saytında yayılan məlumatda diqqətçəkən daha bir vacib məqam var. Hesabatda dəfələrlə
“Dağlıq Qarabağ" termini işlədilir. Rusiya Müdafiə Nazirliyi Azərbaycan dövlətinin rəsmi mövqeyi ilə uzlaşmayan bu yanlışlığa niyə yol verir?
Aydın Quliyev: “Sülhməramlılar olduqları ərazidə yalnız erməni maraqlarının müdafiə zərurəti çərçivəsində fəaliyyət göstərir”
“Bakı-Xəbər” qəzetinin baş redaktoru Aydın Quliyevin sözlərinə görə, bu müharibədən sonra Azərbaycanın yaratdığı reallıqları inkar etmək deməkdi: “Belə ki, keçmiş "DQMV" ləğv edilmiş və Azərbaycan Prezidentinin sərəncamı ilə "Qarabağ" və "Şərqi Zəngəzur" iqtisadi zonaları yaradılıb. Azərbaycan Prezidenti dövlətimizin adından keçmiş Dağlıq Qarabağın inzibati sərhədlərinin ləğv edildiyini rəsmən bəyan edib.
İkinci, hesabatın əhatə etdiyi fəaliyyət istiqamətləri göstərir ki, sülhmıramlılar olduqları ərazidə yalnız erməni maraqlarının müdafiə zərurəti çərçivəsində fəaliyyət göstərir. Belə ki, humanitar yüklərin daşınması, təmas xətləri boyunca patrul xidmətinin göstərilməsi, minalardan təmizlənmə, humanitar aktların həyata keçirilməsi kimi əsas istiqamətlər üzrə fəaliyyətlərdən söhbət açılır.
Bu sayaq fəaliyyətlərin Azərbaycan əhalisinə, bizim nəzarətimizdəki ərazilərə birbaşa faydası isə yoxdur”.
Ramil Məmmədli: “Burada texnikidən daha çox, siyasi motiv görürəm”
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, bu Rusiya Müdafiə Nazirliyinin rəsmi saytında sülhməramlıların fəaliyyətilə bağlı yol verdiyi ilk yanlışlıq deyil: “Rusiya Müdafiə Nazirliyinin rəsmi saytında “Dağlıq Qarabağda Rusiya sülhməramlı kontingenti” adlı xüsusi bölmə yaradılıb. Yeni bölmədə müvafiq xəbərlər və multimediya materialları, infoqrafik məlumatlar, habelə Rusiya Müdafiə Nazirliyi rəhbərliyinin sülhməramlı əməliyyatın aparılması ilə bağlı brifinqləri dərc edilir.
Sayt ziyarətçiləri Laçın dəhlizi ərazisindəki Rusiya müşahidə postlarının yerləşdiyi xəritələrə baxa, Dağlıq Qarabağ ərazisindəki mövcud vəziyyətlə tanış ola bilərlər.
Rusiya sülhməramlılarının işi ilə bağlı aktual xəbərlər xarici dillərə tərcümə olunur. Deməli, bu qədər iş görülürsə, istəsələr yer adlarını da düzgün təqdim edə bilərlər. Bundan əvvəl də bəzi şəhər və kənd adlarını ermənilər adlandırdığı kimi qeyd edirdilər. Hər dəfə Azərbaycan tərəfi buna etiraz edəndə deyillər ki, texniki səhv olub. Mən isə burada texnikidən daha çox, siyasi motiv görürəm. Belə qənaətə gəlinir ki, sanki sülhməramlılar orada ermənilərə yiyəlik edir. Yalnız onlara göstərilən qayğıdan söz açılıb. Bu da həmin kontingentin üzərinə götürdüyü missiya ilə uzlaşmlr. Rusiyanın rəsmi dairələri bu məqsədli tıxribata son qoymalıdırlar”.
Məhəmmədəli QƏRİBLİ
