Fevralın 26-da Xocalı qətliamının 30-cu ildönümü qeyd olunacaq. Prezident İlham Əliyev tədbirlər planı haqda sərəncam imzalayıb. Hər il soyqırımın təbliği və tanıdılması bu ərəfədə gündəmə gəlir.
Xocalı faciəsi erməni millətçilərinin yüzilliklər boyu türk və Azərbaycan xalqlarına qarşı apardığı soyqırımı və etnik təmizləmə siyasətinin qanlı səhifəsi idi. Faciəyə beynəlxalq hüquqi-siyasi qiymət verilməsinə nail olmaq insanlıq və vətəndaşlıq borcumuzdur. Xocalı faciəsi iki yüz ilə yaxın bir müddət ərzində erməni millətçilərinin və onların havadarlarının xalqımıza qarşı apardığı etnik təmizləmə və soyqırımı siyasətinin davamı və qanlı səhifəsi idi. Bu mənfur siyasət xalqımıza saysız-hesabsız müsibətlər və əzab-əziyyətlər gətirib.
Maraqlıdır, Xocalı soyqırımı ilə bağlı Azərbaycan vətəndaşlarının dövlət qarşısında dayanan əsas vəzifələri nələrdən ibarətdir? Xocalı faciəsinin dünyada tanıdılması ilə bağlı nə kimi işlər görülməlidir?
Siyasi şərhçi Azər Həsrət “Bakı-Xəbər”ə bildirdi ki, Xocalı soyqırımı müasir Azərbaycan tarixinin elə bir səhifəsidir ki, minillər keçsə də onu unutmağa heç kimin ixtiyarı yoxdur: “Bu səbəbdən də istər dövlət, istərsə də sadə vətəndaş öz üzərinə düşən vəzifəni yerinə yetirməlidir”.
A.Həsrətin sözlərinə görə, bu soyqırımın mahiyyəti təkrar-təkrar dünyanın diqqətinə çatdırılmalıdır: “Dövlətin bu məsələ ilə bağlı gördüyü işlər öz yerindədir. Bununla yanaşı, müstəqil, sərbəst mövqeyi olan vətəndaşlar soyqırımla bağlı xırda detalı belə dünyaya çatdırmalıdır. Rusiyanın 366-cı alayının ermənilərlə birlikdə dinc əhaliyə qarşı gecə yarısı hücuma keçməsi, onları ağır silahlarla atəşə tutması, hətta körpələri belə edam etməsi, onlara işgəncə verməsi və digər faktlar dünyaya çatdırılmalıdır. Xocalı soyqırımını nə unuda, nə də unutdura bilərik. Bununla bağlı gənclər, ictimai, siyasi xadimlər, millət vəkilləri, fəal şəxslər Xocalı soyqırımının dünyaya tanıdılması ilə bağlı fəal işlər görməlidir”.
Günel CƏLİLOVA
