Azərbaycan Milli Elmlər Akademiyasında (AMEA) baş verənlər, çoxluğun Ramiz Mehdiyevi akademiya prezidenti vəzifəsindən istefa verməyə çağırması böyük ajeotaja səbəb olub. R.Mehdiyevin fəaliyyətini tənqid edib onu istefaya çağıranların həlqəsi get-gedə genişlənir.
Bəziləri birmənalı şəkildə onun istefasını tələb etsə də, bəziləri hesab edir ki, Mehdiyev ya ona yönələn bütün arqumentlərə əks arqumentlərlə cavab verməli, cavab verə bilmədiyi təqdirdə isə istefa verməlidir. Bir sözlə, AMEA-da aləm bir-birinə qarışıb, vəziyyət günü-gündən tündləşir. Ara-bir Mehdiyevin müdafiəçiləri səslənib atılan “güllələrə” cavab versələr də, əsasən tənqidçi və istefa tələbçiləri meydandadır. Mehdiyevi heç AMEA-nın Rəyasət Heyətinin üzvləri olan alimlər müdafiə etmir. Bu da yeni şübhəli söz-söhbətlər ortaya çıxarıb. Bir çox mütəxəssislər deyirlər ki, AMEA-nın Rəyasət Heyətinin üzvləri olan əksər akademiklər indiyə qədər dövləti, dövlətçiliyi, Prezidenti müdafiə etməyən adamlardır, onlar həmişə yalnız öz kreslolarını qoruyurlar.
“Rəyasət Heyəti üzvlərinin böyük əksəriyyətinin bir dəfə də olsun dövləti, dövlətçiliyi, Prezidenti müdafiə etdiyini görmədim”
Gənc Alim, Doktorant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov bizimlə söhbətində bildirdi ki, AMEA-da baş verənlər və AMEA-nın Rəyasət Heyətininin proseslərə səssiz qalması təəssüf doğurur. “Son günlər ölkəmizin tanınmış alimlərinin Ramiz Mehdiyevlə bağlı yazdıqılarını oxumuşam. Fikirləşirəm ki, alimlər arasında həmrəyliyin formalaşması çox müsbət haldır. Azərbaycan elminin düşdüyü acınacaqlı vəziyyət, idarəetmədəki yarıtmazlıq, bütövlükdə akademiyanın elmi mərkəzdən intriqa mərkəzinə çevirilməsi təəssüf doğurur. Akademiyada baş verənlərlə bağlı alimlərin həmfikir olması yaxşı haldır. Musa Qasımlının yazısında oxudum, o qeyd edib ki, akademiyanın ümumi yığıncağında Ramiz Mehdiyevə etimadsızlıq məsələsini qoymaq lazımdır. Amma düşünürəm ki, bu etimadsızlıq məsələsi təkcə Ramiz Mehdiyevə qarşı deyil, eyni zamanda akademiyanın Rəyasət Heyətinə qarşı da bu etimadsızlığı qoymaq lazımdır. Çünki akademiyanın Rəyasət Heyəti Kolegial qərar qəbul edən qurumdur. Biz indiyə qədər biz akademiyanın Rəyasət Heyətinin bir üzvündən Ramiz Mehdiyevin özbaşnalığına qarşı bir ifadə belə eşitməmişik. Bunlar nəyi və kimi gözləyirlər? Akademiyanın Rəyasət Heyəti, onun hər bir üzvü AMEA-da baş verənlərə cavabdehdilər. Amma bu gün Ramiz Mehdiyev orada at oynadırsa, özbaşnalıq edirsə, yaxud ondan əvvəlki prezident özbaşnalıq edibsə burada Rəyasət Heyətinin günahı da var. Necə ola bilər ki, Rəyasət Heyətinin bir nəfər üzvü belə nə mətbuatda, nə Rəyasət Heyətinin iclasında bu kimi özbaşnalıqlara qarşı hər hansı bir münasibət, mövqe ortaya qoymayıblar. Bu onu göstərir ki, onlar Ramiz Mehdiyevlə həmfikirdirlər, yaxud bunlar hardansa, kimdənsə tapşırıq, göstəriş gözləyirlər. Akademiyanın Rəyasət Heyəti üzvlərinin ziyalı mövqeyi, müstəqil fikir söyləmək iradələri yoxdur.
Ulu öndər Heydər Əliyevin bir fikri vardı, deyirdi ki, hər bir insanın mövqeyi olmalıdır. Akademiyanın Rəyasət Heyəti mövqesizdir”.
AMEA-nın Rəyasət Heyətində təmsil olunan və dövlətin bütün imtiyazlarından istifadə edən akademiklərlərin dövlətin özünü belə müdafiə etmədiyini deyən İ.Orucovun sözlərinə görə, bu adamların indi susurlar: “Dövlət bu adamlar üçün bütün imkanlar yaradıb. Bu adamların içində heç akademik titulu daşımağa layiq olmayanlar var. Bunu demək lazımdır. İllər əvvəl gənc idim, amma o yaşımda da deyirdim ki, dövlətçiliyimi düşünməliyəm, dövlətimin, Prezidentimin yanında olmalıyam, dövlətimin maraqlarını müdafiə etməliyəm. Amma Rəyasət Heyəti üzvlərinin böyük əksəriyyətinin bir dəfə də olsun dövləti, dövlətçiliyi, Prezidenti müdafiə etdiyini görmədim.
Nəinki bu gün müdafiə etmirlər, onlar heç keçmişdə də müdafiə etməyiblər. Çox yaxşı yadımdadır ki, 2003-cü ildə dövlət çevirişinə cəhd olanda, Azadlıq meydanında, Bakının ayrı-ayrı küçələrində müxalifətin radikal qanadı dağıntılar törədəndə, bir dəfə də olsun o akademiklərin birinin də səsi çıxmadı. Bir dəfə də olsun görmədim ki, dövləti müdafiə etsinlər, dövlətin yanında olsunlar. Amma dövlət onlar üçün hər şey edib, bu akademiklər dövlət üçün nə edirlər? Onlar çox yüksək əməkhaqqı alırlar, imtiyazları var, dövlətdən nə qədər evlər alıblar. Dövlətin elə bir imtiyazı yoxdur ki, Rəyasət Heyəti üzvlərində, bu akademiklərdə olmasın. Azərbaycan elminin rəhbərliyində təmsil olunan bu adamlar görün nə qədər mövqesizdirlər. Onlar ziyalıya yaraşmayan əqidəyə qulluq edirlər. Bu gün Ramiz Mehdiyevə əl çalırlar, dünən də Akif Əlizadəyə çalırdılar. Akif Əlizadə akademiyanın rəhbəri vəzifəsindən uzaqlaşdırılandan sonra və Mehdiyev Əlizadəni tənqid edəndə akademiklər “düz deyir” dedilər. Sabah bu mövqesiz, adını “ziyalı” qoyduğumuz, dövlətin hər cür şərait yaratdığı bu insanlar (təbii ki, bəzilərini çıxmaq şərti ilə - İ.O) sabah Azərbaycanın siyasi rəhbərliyində olan istənilən adama qarşı belə münasibət orataya qoyacaq. Çünki əqidələri yoxdur. Düşünürəm ki, AMEA-nın Rəyasət Heyəti tamamilə ləğv olunmalıdır...”
İ.Orucov qeyd etdi ki, Rəyasət Heyətində təmsil olunan adamların əksəriyyəti heç zaman Prezidentin etimadına layiq olmayıblar və elmimizin qara günə düşməsi üçün onlar əlindən gələni ediblər. “Rəyasət Heyətində təmsil olunan adamlar zamanında ən azı Azərbaycan dövlətçiliyi üçün bir təhlükə yarananda bəlli bir yaşda olublar. Onların böyük əksəriyyəti ulu öndərin dəstəyindən, onun yaratdığı imkanlardan bəhrələnərək təhsil alıblar. Hətta o zaman belə onların böyük əksəriyyəti bir dəfə də olsun dövlətlə, dövlətçiliklə bağlı məqamlarda dövləti müdafiə etməyiblər. Hər zaman tapşırıq gözləyiblər, eyni zamanda da “əsən küləyin” istiqamətini müəyyənləşdirməyə çalışıblar. Hətta ulu öndərin zamanında onun tərəfdarı, müdafiəsçisi olan “91-lərin” siyahısında onların adı yoxdur. Halbuki, onlar mövqe ifadə etmək yaşında, başında olublar. Onlar hər zaman məqam gözləyiblər. Elə hazırkə dövrdə də onlar məqam gözləyirlər ki, görəsən Mehdiyevlə bağlı səslənən fikirlərə dövlətin, bu məsələyə ölkənin siyasi rəhbərliyinin mövqeyi necə olacaq? Çünki bu adamlar üçün Azərbaycan elminin düşdüyü vəziyyət maraqlı deyil. Onlar düşünürlər ki, görəsən Ramiz Mehdiyevin qanunsuz əməllərinə dövlət necə münasibət göstərəcək? Həmişə o fikirdəyəm ki, dövlətçilik məsələsində əqidəsi, mövqeyi olmayan adamlar hər zaman təhlükəli adamlardır və onlar üçün dövlətin nə etməsindən asılı olmayaraq məqam gələndə öz maraqlarına uyğun hərəkət edirlər” - deyə İ.Orucov qeyd etdi.
İradə SARIYEVA
