Ermənistan-Türkiyə nizamlanması prosesi çərçivəsində iki ölkənin xüsusi nümayəndələri Ruben Rubinyan və Serdar Kılıçın növbəti görüşü fevralın 24-də Vyanada baş tutacaq.
Bu barədə Ermənistan Xarici İşlər Nazirliyinin sözçüsü Vaan Hunanyan bildirib.
Məlumat üçün qeyd edək ki, ki, Türkiyə ilə Ermənistan arasında diplomatik münasibətlər hələ bərpa olunmayıb. 2021-ci il dekabrın 13-də Türkiyə xarici işlər naziri Mövlud Çavuşoğlu bəyan edib ki, münasibətlərin normallaşması üçün qarşılıqlı şəkildə nümayəndələr təyin olunacaq. Ermənistan XİN-i bu bəyanatı dəstəkləyib. Daha sonra Ankara Türkiyənin ABŞ-dakı keçmiş səfiri Serdar Kılıçı İrəvanla münasibətlərin normallaşması üzrə xüsusi nümayəndə təyin edib. Ermənistan tərəfdən parlamentin sədr müavini Ruben Rubinyan təyin edilib. Xüsusi nümayəndələrin ilk görüşü yanvarın 14-də Moskvada baş tutub. Sözügedən görüş Rusiya Federasiyası xarici işlər nazirinin müavini Andrey Rudenkonun vasitəçiliyi ilə keçirilib.
Maraqlıdır, Moskva görüşündən sonra tərəflər görüşlərin yerini niyə tez-tez dəyişir? Bunun nə mənası var? Ötən dəfə Moskvada, bu dəfə Vyanada. Tərəflər arasında təmas qurulubsa, o zaman niyə görüşlər həmin ölkələrin özündə keçirilmir? Olmazdımı görüşlər Ankara və İrəvanda davam etdirilsin?
“Görünür Ermənistan hələ buna hazır olmadığı üçün hansısa neytral ölkədə görüş keçirilir”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, çox gumau ki, Ermənistanın istəyi üzündən hər dəfə ayrı-arı ölkələrdə görüş keçirilir: “Hesab edirəm ki, növbəti görüşlərin Ankara və İrəvanda davam etdirilməsi mümkün idi. Çünki hər iki ölkə münasibətləri normallaşdırmaq istəyirsə, bunun üçün hər dəfə ayrı-ayrı yerlərin seçilməsinə ehtiyac yoxdu. Türkiyə Ermənistanın Azərbaycan ərazilərini işğal etməsi səbəbindən İrəvanla münasibət qurmurdu. Artıq həmin problem öz həllini tapıb. Bu baxımdan təmasların qurulması normaldır. Azərbaycan tərəfinin də buna razılığı var. O baxımdan tərəflər bir araya gəlib söhbət edə bilərlər. Bundan ötrü Vyananı, Cenevrəni seçməyə ehtiyac yoxdur. Hesab edirəm ki, Türkiyə ilə bağlı bu məsələlərdə problem yoxdur. Nəzərə almaq lazımdır ki, Türkiyə böyük dövlətçilik tarixinə malik olan ölkədir. Üstəlik mart ayında Antaliyada keçiriləcək tədbirə Ermənistan da dəvət edilib. Belə olan halda bir dəfə Türkiyədə, növbəti dəfə Ermənistanda bir araya gəlib danışıq aparmaq olardı. Görünür Ermənistan hələ buna hazır olmadığı üçün hansısa neytral ölkədə görüş keçirilir. Hər halda növbəti görüşlərin ölkələrin özündə keçirmək olar”.
Partiya sədri onu da qeyd etdi ki, belə imkanlar var.
Vidadi ORDAHALLI
